ສຳນັກຂ່າວສານຫວຽດນາມ ປະຈຳ ຈາກາຕາ ອິນໂດເນເຊຍ ລາຍງານວ່າ: ວັນທີ 6 ມິຖຸນາ ຜ່ານມາ ໃນກອງປະຊຸມຄັ້ງທີ 17 ຂອງຄະນະກຳມະການຮ່ວມ ອາຊຽນ – ຍີ່ປຸ່ນ, ສອງຝ່າຍໄດ້ຢືນຢັນຄືນໃໝ່ຄຳໝັ້ນສັນຍາເພີ່ມທະວີຊຸກຍູ້ການພົວພັນຄູ່ຮ່ວມມືຍຸດທະສາດ ຊຶ່ງງເປັນຂີດໝາຍ 50 ປີແຫ່ງການພົວພັນມິດຕະພາບ ແລະ ການຮ່ວມມື.
ກອງປະຊຸມດັ່ງກ່າວມີ ທ່ານນາງ ອຸຣະວະດີ ສີພິຣົມ ຜູ້ຕາງໜ້າຖາວອນຂອງໄທ ປະຈຳ ອາຊຽນ ແລະ ທ່ານ ກິຢະ ມາຊະຮິໂກະ ເອກອັກຄະຣາຊະທູດ ຍີ່ປຸ່ນ ປະຈຳ ອາຊຽນ ເປັນປະທານຮ່ວມ, ໂດຍການເຂົ້າຮ່ວມຂອງບັນດາຜູ້ຕາງໜ້າຖາວອນປະຈຳ ອາຊຽນ ແລະ ຮອງເລຂາທິການໃຫຍ່ ອາຊຽນ ຮັບຜິດຊອບປະຊາຄົມການເມືອງ – ຄວາມໝັ້ນຄົງ.
ກອງປະຊຸມໄດ້ຮັບຮູ້ຄວາມຄືບໜ້າ ໃນການຮ່ວມມື ອາຊຽນ – ຍີ່ປຸ່ນ ໃນປີຜ່ານມາ ໂດຍຜ່ານການປະຕິບັດແຜນການປັບປຸງຖະແຫຼງການວິໄສທັດປີ 2013 ກ່ຽວກັບການພົວພັນມິດຕະພາບ ແລະ ການຮ່ວມມືອາຊຽນ – ຍີ່ປຸ່ນ. ບັນດາໂຄງການເຄື່ອນໄຫວໃນແຜນການ ໄດ້ຮັບການປະຕິບັດດ້ວຍຫຼາຍໂຄງການ ແລະ ຫຼາຍຮູບແບບ.
ສອງຝ່າຍເຫັນດີສືບຕໍ່ເພີ່ມທະວີການຮ່ວມມື ເພື່ອສ້າງຄວາມສະດວກໃຫ້ແກ່ການຟື້ນຟູພາກພື້ນໃນຂົງເຂດການຄ້າ ແລະ ການລົງທຶນ, ເສດຖະກິດດີຈີຕອນ, ຄວາມໝັ້ນຄົງ, ການທ່ອງທ່ຽວ, ພັດທະນາແບບຍືນຍົງ, ເຊື່ອມຈອດ, ນະຄອນອັດສະລິຍະ, ຄຸ້ມຄອງໄພພິບັດ, ສິ່ງແວດລ້ອມ ແລະ ການປ່ຽນແປງຂອງດິນຟ້າອາກາດ, ຄວາມ ໝັ້ນຄົງສະບຽງອາຫານ ແລະ. ຄວາມໝັ້ນຄົງດ້ານພະລັງງານ, ສາທາລະນະສຸກ, ກິລາ, ການພົບປະແລກປ່ຽນລະຫວ່າງປະຊາຊົນ.
ກອງປະຊຸມໄດ້ຊົມເຊີຍບັນດາການເຄື່ອນໄຫວທີ່ຈັດຂຶ້ນໃນປີນີ້ ເພື່ອສະເຫຼີມສະຫຼອງ 50 ປີແຫ່ງການພົວພັນມິດຕະພາບ ແລະ ການຮ່ວມມືໃນເດືອນທັນວາ ຢູ່ ນະຄອນຫຼວງໂຕກຽວ ເພື່ອແນໃສ່ຊຸກຍູ້ການຮ່ວມມືສອງຝ່າຍໃນຕໍ່ໜ້າ.
ສອງຝ່າຍໄດ້ປຶກສາຫາລືກ່ຽວກັບການພັດທະນາຂອງອາຊຽນ, ຍີ່ປຸ່ນ ແລະ ບັນດາບັນຫາຢູ່ພາກພື້ນ. ອາຊຽນ ກໍໄດ້ຊົມເຊີຍ ຍີ່ປຸ່ນ ໃນການສະໜັບສະໜູນຄວາມພະຍາຍາມຂອງກຸ່ມໃນການປະຕິບັດວິໄສທັດອາຊຽນ ສໍາລັບມະຫາສະໝຸດອິນເດຍ – ປາຊີຟິກ (AOIP).
ກອງປະຊຸມໄດ້ຊົມເຊີຍການສ້າງຕັ້ງກອງທຶນການເຊື່ອມໂຍງ ຍີ່ປຸ່ນ-ອາຊຽນ (JAIF) 3.0 ດ້ວຍການປະກອບສ່ວນເບື້ອງຕົ້ນເຖິງ 100 ລ້ານໂດລາ ຈາກ ຍີ່ປຸ່ນ ເພື່ອສະໜັບສະໜູນໂຄງການ ແລະ ການເຄື່ອນໄຫວຮ່ວມມືໃນຂົງເຂດສຳຄັນຂອງ AOIP.
