ຂ່າວຕ່າງປະເທດລາຍງານ ເມື່ອວັນທີ 7 ມິຖຸນາ ຜ່ານມາ, ອົງການສາກົນຫຼາຍແຫ່ງໄດ້ເປີດເຜີຍບົດລາຍງານໂດຍລະບຸວ່າ ປະຊາຊົນ 675 ລ້ານຄົນທົ່ວໂລກຍັງບໍ່ສາມາດເຂົ້າເຖິງໄຟຟ້າ ໂດຍສ່ວນຫຼາຍຢູ່ໃນພາກພື້ນຊັບຊາຮາຣາ ຫຼື ປະເທດໃນທະວີບອາຟຣິກາ ທີ່ຢູ່ໃຕ້ທະເລຊາຍຊາຮາຣາລົງໄປ.
ເຖິງແມ່ນວ່າຈະມີຄວາມພະຍາຍາມ ແລະ ມີຄວາມຄືບໜ້າໄປແລ້ວ ແຕ່ໂລກຍັງຄົງປະເຊີນກັບຊ່ອງວ່າງຂອງການເຂົ້າເຖິງພະລັງງານຢ່າງຕໍ່ເນື່ອງ ໂດຍອີງຕາມການລາຍງານຂອງອົງການພະລັງງານສາກົນ (IEA), ອົງການພະລັງງານໝູນວຽນສາກົນ (IRINA), ສຳນັກງານສະຖິຕິແຫ່ງສະຫະປະຊາຊາດ (UNSD), ທະນາຄານໂລກ (WB) ແລະ ອົງການອະນາໄມໂລກ (WHO). ເຖິງວ່າຈຳນວນຜູ້ທີ່ບໍ່ສາມາດເຂົ້າເຖິງໄຟຟ້າຈະຫຼຸດລົງເຄິ່ງໜຶ່ງໃນໄລຍະ 10 ປີຜ່ານມາ ຈາກເດີມ 1.100 ລ້ານຄົນໃນປີ 2010 ແຕ່ປະຊາຊົນອີກ 675 ລ້ານຄົນ ຍັງຄົງບໍ່ມີໄຟຟ້າໃຊ້ໃນປີ 2021 ໂດຍປະມານ 80% ຂອງໂຕເລກຂ້າງເທິງສະແດງໃຫ້ເຫັນວ່າແມ່ນຜູ້ຄົນທີ່ອາໄສຢູ່ໃນພາກພື້ນອາຟຣິກາໃຕ້ທະເລຊາຍຊາຮາຣາ ຊຶ່ງຂາດແຄນການເຂົ້າເຖິງໄຟຟ້າ ນັບຕັ້ງແຕ່ປີ 2010. ບົດລາຍງານໄດ້ກ່າວເນັ້ນເຖິງຄວາມຄືບໜ້າໃນສ່ວນອື່ນໆ ໂດຍສະເພາະຢ່າງຍິ່ງແມ່ນອັດຕາການໃຊ້ພະລັງງານໝູນວຽນທີ່ເພີ່ມຂຶ້ນ ເຖິງຢ່າງໃດກໍຕາມ, ບົດລາຍງານໄດ້ກ່າວເຕືອນວ່າ ຄວາມຄືບໜ້ານີ້ບໍ່ພຽງພໍໃນການບັນລຸເປົ້າໝາຍທີ່ອົງການສະຫະປະຊາດກຳນົດໄວ້. ທ່ານ ຟາຕີ ບິຣອນ ກຳມະການບໍລິຫານຂອງ IEA ກ່າວວ່າ ຂະນະທີ່ການປ່ຽນຜ່ານພະລັງງານສະອາດກໍາລັງເດີນໄປໄວກວ່າທີ່ຫຼາຍຄົນຄາດຄິດ ແຕ່ມັນກໍຍັງມີອີກຫຼາຍສິ່ງທີ່ຈຳເປັນຕ້ອງດຳເນີນການ ເພື່ອສົ່ງມອບການເຂົ້າເຖິງບໍລິການພະລັງງານສະໄໝໃໝ່ທີ່ຍືນຍົງ, ປອດໄພ ແລະ ມີລາຄາຖືກໃຫ້ກັບປະຊາຊົນຫຼາຍ ພັນລ້ານຄົນທີ່ອາໄສຢູ່ໂດຍປາສະຈາກພະລັງງານ.
ຍິ່ງໄປກວ່ານັ້ນ, ບົດລາຍງານຍັງພົບວ່າ ລະດັບໜີ້ທີ່ເພີ່ມຂຶ້ນໃນປັດຈຸບັນ ແລະ ລາຄາພະລັງງານທີ່ເພີ່ມສູງຂຶ້ນສົ່ງຜົນກະທົບຮ້າຍແຮງຕໍ່ທ່າອ່ຽງໃນການບັນລຸເປົ້າໝາຍຂອງການຮັບປະກັນການເຂົ້າເຖິງວິທີການປຸງອາຫານທີ່ສະອາດ ແລະ ໄຟຟ້າໃນລະດັບສາກົນພາຍໃນ 7 ປີຂ້າງໜ້າ ຊຶ່ງການຄາດຄະເນໃນຂະນະນີ້ສະແດງໃຫ້ເຫັນວ່າ ຖ້າຫາກບໍ່ມີການເພີ່ມຄວາມພະຍາຍາມໃຫ້ຫຼາຍຂຶ້ນ ປະຊາກອນໂລກປະມານ 1.900 ລ້ານຄົນ ຈະບໍ່ສາມາດເຂົ້າເຖິງວິທີການປຸງອາຫານທີ່ສະອາດ ແລະ ຜູ້ຄົນປະມານ 660 ລ້ານຄົນຈະບໍ່ມີໄຟຟ້າໃຊ້ໃນປີ 2030.
