ທ່ານ ໂອເລ້ ສີພານິດ ຫົວໜ້າໜ່ວຍງານຂົນສົ່ງສິນຄ້າ ປະຈໍາສະຖານີວຽງຈັນໃຕ້ໄດ້ໃຫ້ສຳພາດຕໍ່ສື່ມວນຊົນເມື່ອບໍ່ດົນມານີ້ວ່າ: ນັບແຕ່ເລີ່ມເປີດທາງລົດໄຟລາວ-ຈີນເປັນຕົ້ນມາຈົນຮອດວັນທີ 5 ມິຖຸນາ ປີ 2023, ບໍລິສັດທາງລົດໄຟລາວ-ຈີນ ສາມາດດຳເນີນການຂົນສົ່ງສິນຄ້າໄດ້ທັງໝົດ 4.097.300 ໂຕນ. ໃນນັ້ນຂົນສົ່ງສິນຄ້າຈາກ ສປປ ລາວ ໄປ ສປ ຈີນ ໄດ້ປະມານ 3.450.000 ກວ່າໂຕນ, ຂົນສົ່ງສິນຄ້າຈາກຈີນມາລາວໄດ້ 650.900 ກວ່າໂຕນ, ໃນນັ້ນປະກອບມີຢາງພາລາ, ແຮ່ເຫຼັກ, ເຂົ້າ, ຖ່ານ, ແປ້ງມັນຕົ້ນ, ແຮ່ສັງກະສີ, ເຄື່ອງໃຊ້ປະຈໍາວັນ, ເຂົ້າບາເລ, ໝາກໄມ້ ແລະ ອື່ນໆ. ສຳລັບສິນຄ້າທີ່ນຳເຂົ້າມາຈາກ ສປ ຈີນ ມີບາງສ່ວນຍັງສົ່ງອອກໄປປະເທດຫວຽດນາມ, ໄທ, ກຳປູເຈຍ, ມຽນມາ, ໃນນັ້ນມີໝາກໄມ້ບາງຊະນິດແມ່ນຂົນສົ່ງຈາກໄທຜ່ານລາວໄປຈີນ ໂດຍນຳໃຊ້ທາງລົດໄຟລາວ-ຈີນ. ເວົ້າສະເພາະການສົ່ງອອກແປ້ງມັນຕົ້ນແມ່ນສາມາດຂົນສົ່ງໄດ້ປະມານ 152.084 ໂຕນ ຊຶ່ງໃນປີ 2022 ຜ່ານມາ, ສາມາດຂົນສົ່ງໄດ້ 87.727 ໂຕນ ແລະ ໃນໄລຍະ 5 ເດືອນຕົ້ນປີ 2023 ສາມາດຂົນສົ່ງສິນຄ້າໄດ້ທັງໝົດ 1.741.590 ໂຕນ.
ໃນ 5 ເດືອນຕົ້ນປີ 2023 ນີ້, ບໍລິສັດທາງລົດໄຟລາວ-ຈີນ ສາມາດດຳເນີນການຂົນສົ່ງສິນຄ້າຜ່ານທາງລົດໄຟໄດ້ທັງໝົດ 1.741.590 ໂຕນ. ໃນນີ້ຂົນສົ່ງສິນຄ້າໄປ ສປ ຈີນໄດ້ 1.580.680 ໂຕນ, ຂົນສົ່ງສິນຄ້າຈາກຈີນມາລາວ 160.910 ໂຕນ ຊຶ່ງສິນຄ້າສົ່ງອອກປະກອບມີ: ຢາງພາລາ, ແຮ່ເຫຼັກ, ແຮ່ສັງກະສີ, ຫີນສົ້ມ, ໝາກໄມ້, ແປ້ງມັນຕົ້ນ, ເຂົ້າບາເລ. ສ່ວນສິນຄ້ານຳເຂົ້າມີ: ເຄື່ອງໃຊ້ໄຟຟ້າ, ເຄື່ອງໃຊ້ໃນຄົວເຮືອນ, ເຄື່ອງນຸ່ງຫົ່ມ, ອຸປະກອນລົດຈັກ, ລົດໃຫຍ່ ແລະ ອື່ນໆ.
ທ່ານ ໂອເລ້ ສີພານິດ ຍັງໃຫ້ຮູ້ອີກວ່າ: ເພື່ອເຮັດໃຫ້ສິນຄ້າປະເພດຕ່າງໆທີ່ມາຮອດສະຖານີມີຄວາມປອດໄພ, ທາງສະຖານີໄດ້ມີທີມງານກວດສອບຕູ້ສິນຄ້າແຕ່ລະປະເພດທີ່ມາຮອດສະຖານີ ຜ່ານຂະບວນການ ແລະ ຂັ້ນຕອນຕ່າງໆທີ່ທັນສະໄໝ, ວ່ອງໄວເພື່ອຮັບປະກັນໃຫ້ສິນຄ້າມີຄວາມປອດໄພ ແລະ ຮອດຈຸດໝາຍປາຍທາງຢ່າງວ່ອງໄວ ຊຶ່ງສິນຄ້າທີ່ໄດ້ດຳເນີນການຂົນສົ່ງສະເລ່ຍ 3 ຖ້ຽວຕໍ່ມື້.
ຂ່າວ-ພາບ: ຍຸພິນທອງ+ວັນເພັງ
