ເພື່ອເປັນການຕີລາຄາທົບທວນຄືນການນໍາພາຈັດຕັ້ງປະຕິບັດບັນດາທິດທາງ, ແຜນການ ແລະ ຄາດໝາຍທີ່ກອງປະຊຸມໃຫຍ່ ຄັ້ງທີ IX ຂອງໜ່ວຍພັກວາລະສານອະລຸນໃໝ່ ໄດ້ກໍານົດອອກໃນເຄິ່ງສະໄໝຜ່ານມາ, ເພື່ອກວດກາຄວາມຮັບຜິດຊອບການເມືອງ ຂອງຄະນະໜ່ວຍພັກ ແລະ ດໍາເນີນຊີວິດການເມືອງ, ການຕໍານິຕິຊົມຕົນເອງ ແລະ ຕິຊົມຊຶ່ງກັນ ແລະ ກັນພາຍໃນໜ່ວຍພັກ.
ຕອນເຊົ້າ ຂອງວັນທີ 7 ມິຖຸນາຜ່ານມາ, ໜ່ວຍພັກວາລະສານອະລຸນໃໝ່ ໄດ້ເປີດກອງປະຊຸມກາງສະໄໝ ພາຍໃຕ້ການເປັນປະທານຂອງ ສະຫາຍ ນາງ ວິລະວອນ ພັນທະວົງ ຄະນະປະຈຳພັກ, ຮອງຫົວໜ້າຄະນະໂຄສະນາອົບຮົມສູນກາງພັກ (ຄອສພ) ຄະນະຮັບຜິດຊອບຊີ້ນໍາການດໍາເນີນກອງປະຊຸມກາງສະໄໝຂອງແຕ່ລະໜ່ວຍພັກ ຄອສພ, ມີຜູ້ຕາງໜ້າກົມຈັດຕັ້ງ-ພະນັກງານ, ກົມກວດກາ ແລະ ສະມາຊິກພັກ ວາລະສານອະລຸນໃໝ່ ເຂົ້າຮ່ວມຢ່າງພ້ອມພຽງ.
ໃນກອງປະຊຸມ, ສະຫາຍ ວັນລາຕີ ຄໍາວານວົງສາ ຄະນະພັກ ຄອສພ, ເລຂາໜ່ວຍພັກ, ວ່າການຫົວໜ້າບັນນາທິການ ວາລະສານອະລຸນໃໝ່ ໄດ້ຂຶ້ນກ່າວເປີດກອງປະຊຸມວ່າ: ກອງປະຊຸມຂອງໜ່ວຍພັກວາລະສານອະລຸນໃໝ່ ແມ່ນມີຄວາມໝາຍສໍາຄັນ ແລະ ຖືເປັນໂອກາດດີ ທີ່ພວກເຮົາຈະໄດ້ພ້ອມກັນທົບທວນຄືນການນຳພາຈັດຕັ້ງປະຕິບັດມະຕິກອງປະຊຸມໃຫຍ່ ຂອງໜ່ວຍພັກ ໃນໄລຍະຜ່ານມາ ເພື່ອເສີມຂະຫຍາຍດ້ານຕັ້ງໜ້າ, ປັບປຸງແກ້ໄຂດ້ານອ່ອນ, ຂໍ້ຄົງຄ້າງ ແລະ ສູ້ຊົນຈັດຕັ້ງປະຕິບັດບັນດາຄາດໝາຍທີ່ກຳນົດອອກ ໃຫ້ມີຜົນສໍາເລັດ. ກອງປະຊຸມ, ໄດ້ຄົ້ນຄວ້າເຊື່ອມຊຶມ ບັນດາເອກະສານສໍາຄັນຂອງພັກຄື: ຄໍາສັ່ງຂອງຄະນະເລຂາທິການສູນກາງພັກ ເລກທີ 268/ຄລສພ, ລົງວັນທີ 20/01/2023; ຄໍາແນະນໍາຂອງຄະນະຈັດຕັ້ງສູນກາງພັກ ເລກທີ 25/ຄຈສພ, ລົງວັນທີ 24/01/2023, ມະຕິຂອງກົມການເມືອງສູນກາງພັກ ວ່າດ້ວຍມາດຖານຂອງພະນັກງານນໍາພາຄຸ້ມຄອງ ເລກທີ 030/ກມສພ, ລົງວັນທີ 03/01/2018; ຄໍາແນະນໍາກ່ຽວກັບການກະກຽມການດໍາເນີນຊີວິດການເມືອງກາງສະໄໝຂອງຄະນະບໍລິຫານງານພັກແຕ່ລະຂັ້ນ ແລະ ເຊື່ອມຊຶມກໍາແໜ້ນບາງເນື້ອໃນສໍາຄັນຂອງກົດລະບຽບພັກ ສະໄໝທີ XI; ທາບທາມຄວາມໄວ້ວາງໃຈຕໍ່ບຸກຄົນໃນຄະນະໜ່ວຍພັກ, ດຳເນີນຊີວິດການເມືອງ, ສະຫຼຸບຕີລາຄາການຈັດຕັ້ງປະຕິບັດມະຕິກອງປະຊຸມກາງສະໄໝຂອງໜ່ວຍພັກ ແລະ ທິດທາງແຜນການທ້າຍສະໄໝ, ຜ່ານບົດສຳຫຼວດການນຳພາລວມຂອງໜ່ວຍພັກ. ພ້ອມກັນນັ້ນ ກໍໄດ້ຮັບຟັງການໂອ້ລົມຈາກ ສະຫາຍ ນາງ ວິລະວອນ ພັນນທະວົງ ຊຶ່ງສະຫາຍໄດ້ເນັ້ນໜັກໃຫ້ ຄະນະໜ່ວຍພັກ, ສະມາຊິກພັກທັງໝົດ ຈົ່ງຖືສໍາຄັນ ແລະ ເອົາໃຈໃສ່ວຽກງານການເມືອງ-ແນວຄິດ ໃຫ້ເປັນປົກກະຕິ ແນໃສ່ສ້າງໃຫ້ມີແນວຄິດໂລ່ງລ່ຽນ, ສ້າງໜ່ວຍພັກໃຫ້ ປອດໃສ, ເຂັ້ມແຂງ ໜັກແໜ້ນ, ມີຄວາມເປັນເອກະພາບພາຍໃນຄະນະພັກ, ສະມາຊິກພັກ, ມີຄວາມສາມັກຄີເປັນປຶກແຜ່ນແໜ້ນໜາ, ພ້ອມກັນສືບຕໍ່ຈັດຕັ້ງປະຕິບັດບັນດາທິດທາງ, ຄາດໝາຍສູ້ຊົນທີ່ກອງປະຊຸມກາງສະໄໝ ໄດ້ວາງອອກ ໃຫ້ມີຜົນສໍາເລັດຢ່າງຈົບງາມ. ກອງປະຊຸມ ດໍາເນີນມາເປັນເວລາ 2 ວັນ, ໄດ້ປິດລົງໃນວັນທີ 8 ມິຖຸນາ 2023.
ຂ່າວ-ພາບ: ຄໍາພັດ ຄູນວີທອງ
