ວິທະຍຸກະຈາຍສຽງຫວຽດນາມລາຍງານວ່າ: ວັນທີ 6 ມິຖຸນາ ຜ່ານມານີ້, ທ່ານ ຣີຊີ ສູນາກ ນາຍົກລັດຖະມົນຕີ ອັງກິດ ໄດ້ເດີນທາງຮອດນະຄອນຫຼວງ ວໍຊິງຕັນ, ເລີ່ມຕົ້ນການຢ້ຽມຢາມ ອາເມຣິກາ ເປັນເວລາ 2 ວັນ ເພື່ອແນໃສ່ຊຸກຍູ້ການຮ່ວມມືດ້ານເສດຖະກິດລະຫວ່າງສອງປະເທດ ກໍຄືປຶກສາຫາລືກ່ຽວກັບບັນດາບັນຫາ ຊຶ່ງຕ່າງຝ່າຍຕ່າງມີຄວາມສົນໃຈ.
ໃນຂອບເຂດການຢ້ຽມຢາມ, ທ່ານ ຣີຊີ ສູນາກ ຈະເຈລະຈາກັບທ່ານ ໂຈ ໄບເດັນ ປະທານາທິບໍດີ ອາເມຣິກາ ໃນວັນທີ 8 ມິຖຸນາ ນີ້ ຕາມເວລາທ້ອງຖິ່ນ. ພາຍຫຼັງການພົບປະເຈລະຈາ, ທ່ານ ຣີຊີ ສູນາກຈະພົບປະກັບສະມາຊິກລັດຖະສະພາ ກໍຄືການນຳບັນດາວິສາຫະກິດ ອາເມຣິກາ. ຕາມແຈ້ງການຂອງລັດຖະບານ ອັງກິດ, ທ່ານ ຣີຊີ ສູນາກ ຈະເພີ່ມທະວີສະໜັບສະໜູນເຮັດໃຫ້ການຮ່ວມມືດ້ານເສດຖະກິດລະຫວ່າງ ລອນດອນ ແລະ ວໍຊິງຕັນ ເລິກເຊິ່ງຂຶ້ນກວ່າເກົ່າອີກ, ໃນສະພາບການຕະຫຼາດ ແລະ ແຫຼ່ງສະໜອງທົ່ວໂລກພວມປະເຊີນໜ້າກັບຄວາມສ່ຽງຫຼາຍຢ່າງ. ໃນການເດີນທາງໄປ ວໍຊິງຕັນ, ທ່ານ ຣີຊີ ສູນາກ ກໍໄດ້ປະກາດບ້ວງເງິນລົງທຶນສະສົມຂອງ ອາເມຣິກາ ຢູ່ ອັງກິດ ທີ່ມີມູນຄ່າຫຼາຍກວ່າ 14 ຕື້ປອນ (17 ຕື້ ໂດລາ).
