ສານປະຊາຊົນສູງສຸດ ຈັດພິທີປາຖະກະຖາ ຫວນຄືນວັນສຳຄັນຂອງຊາດຄື: ວັນຜ່າວົງປິດລ້ອມ ຂອງກອງພັນທີ 2 ວິລະຊົນທີ່ທົ່ງໄຫຫີນ ຊຽງຂວາງ ຄົບຮອບ 64 ປີ ແລະ ວິລະກຳໂຕນຄຸກຢ່າງມະຫັດສະຈັນ ຂອງບັນດາຜູ້ນຳຂອງພັກ ແລະ ແນວລາວຮັກຊາດ ຄົບຮອບ 63 ປີ ຂຶ້ນໃນວັນທີ 7 ມິຖຸນາ ນີ້ ທີ່ສານດັ່ງກ່າວ, ໃຫ້ກຽດ ປາຖະກະຖາໂດຍ ທ່ານ ພົຈວ ຄໍາໝັ້ນ ວັນນະວົງ ຮອງປະທານສະຫະພັນນັກຮົບເກົ່າ ແຫ່ງຊາດລາວ ຊຶ່ງທ່ານ ອານົງ ຍອຍສາຍຄໍາ ຮອງປະທານສານປະຊາຊົນສູງສຸດ, ມີຄະນະພັກ, ຄະນະນໍາສານ, ພ້ອມດ້ວຍພະນັກງານ-ລັດຖະກອນພາຍໃນສານປະຊາຊົນສູງສຸດ ເຂົ້າຮ່ວມຮັບຟັງ.
ທ່ານ ພົຈວ ຄໍາໝັ້ນ ວັນນະວົງ ໄດ້ຍົກໃຫ້ເຫັນຄວາມໝາຍສຳຄັນຂອງສອງເຫດການດັ່ງກ່າວ, ຊຶ່ງເປັນຄວາມສະຫຼຽວສະຫຼາດຂອງການນຳພັກ ແລະ ແນວລາວຮັກຊາດ ຊຶ່ງໄດ້ຊີ້ນຳຢ່າງໃກ້ຊິດຕໍ່ກຳລັງປະຕິວັດທີ່ຢູ່ແນວໜ້າ ແລະ ມີໄຫວພິບ, ຄວາມຕັດສິນໃຈຢາງເດັດຂາດຂອງພະນັກງານປະຕິວັດ ແລະ ຄວາມເປັນອັນໜຶ່ງອັນດຽວຂອງປະຊາຊົນບັນດາເຜົ່າ ຈຶ່ງສາມາດເຮັດໃຫ້ກອງພັນທີສອງຜ່າວົງປິດລ້ອມອັນແໜ້ນໜາຂອງສັດຕູໄປໄດ້ ຊຶ່ງມັນສ້າງຄວາມງຶດງໍ້ ແຕກຕື່ນໃຫ້ພວກມັນຢ່າງໃຫຍ່ຫຼວງ; ຕໍ່ມາ, ບໍ່ພໍທໍ່ໃດເດືອນເຫດການທີສອງກໍ່ເກີດຂຶ້ນ ຊຶ່ງຜູ້ນຳຝ່າຍແນວລາວຮັກຊາດຂອງພວກເຮົາ ຈຳນວນ 16 ທ່ານ ທີ່ຖືກພວກສັດຕູຈັບຕົວໄປຂັງທີ່ຄຸກໂພນເຄັງ ກໍໄດ້ໂຕນອອກຈາກຄຸກຂຶ້ນໄປສູ່ເຂດທີ່ໝັ້ນໄດ້ຢ່າງປອດໄພ.
ສອງເຫດການນີ້, ເປັນການສ້າງຄວາມແຕກຕື່ນຢ້ານກົວໃຫ້ແກ່ພວກສັດຕູຢ່າງໃຫຍ່ຫຼວງ ໂດຍແມ່ນໄຊຊະນະທີ່ແລກມາດ້ວຍຄວາມທຸກທໍລະມານ ແລະ ແສນລຳບາກນາໆປະການ ເຖິງວ່າຈະຖືກຈັບກຸມຄຸມຂັງກໍບໍ່ມີທາງຍອມຈຳນົນ ໂດຍເດັດຂາດອັນນີ້ກໍຍ້ອນບັນດາຜູ້ນຳເຮົາຖືປະເທດຊາດສູງກວ່າຊີວິດຂອງຕົນ ຊຶ່ງຈະຫາສິ່ງໃດມາປຽບປານກໍບໍ່ໄດ້, ໄຊຊະນະອັນພິລະອາດຫານໃນວິລະກຳຄັ້ງມະຫັດສະຈັນນີ້ໄດ້ກາຍເປັນບາດລ້ຽວອັນສຳຄັນຂອງປະເທດຊາດ ແລະ ເປັນໝາກຜົນແຫ່ງຄວາມສາມັກຄີ, ເປັນຈິດໜຶ່ງໃຈດຽວກັນຂອງຜູ້ນຳທີ່ຢູ່ໃນຄຸກ ພ້ອມທັງສາລະວັດ ແລະ ທຸກກຳລັງແຮງທີ່ໄດ້ປະກອບສ່ວນຊ່ວຍເຫຼືອເຮັດໃຫ້ບັນດາທ່ານຜູ້ນຳອອກຈາກຄຸກໄດ້ ເປັນຜົນສຳເລັດ. ນີ້ຄືວັນແຫ່ງໄຊຊະນະຂອງການປະຕິວັດທີ່ບໍ່ມີການນອງເລືອດກໍຄືກາລະໂອກາດພັນປີມີເທື່ອໜຶ່ງ.
ຕໍ່ກັບການປາຖະກະຖາເລົ່າຄືນມູນເຊື້ອ ສອງເຫດການປະຫວັດສາດ ຂອງສານປະຊາຊົນສູງສຸດ ຄັ້ງນີ້, ກໍເພື່ອເຮັດໃຫ້ພະນັກງານ-ລັດຖະກອນ ພາຍໃນສານປະຊາຊົນສູງສຸດໄດ້ຮັບຮູ້ ແລະ ເຂົ້າໃຈເຖິງຄວາມໝາຍຄວາມສຳຄັນ ຂອງສອງເຫດການດັ່ງກ່າວ ພ້ອມກັນຮ່ຳຮຽນເອົາເປັນແບບເປັນຢ່າງໃນການດຳລົງຊີວີດ, ການປະກອບສ່ວນໃນການສ້າງສາ ແລະ ພັດທະນາປະເທດຊາດໃນຕໍ່ໜ້າ ແລະ ຍາວນານ.
(ຂ່າວ-ພາບ: ອານຸພົນ)
