ໃນຕອນເຊົ້າວັນທີ 1 ມິຖຸນາ 2023 ແຂວງອັດຕະປື ໄດ້ຈັດພິທີປູກຕົ້ນໄມ້ ເນື່ອງໃນໂອກາດວັນປູກຕົ້ນໄມ້ແຫ່ງຊາດ ວັນທີ 1 ມິຖຸນາ, ວັນເດັກນ້ອຍສາກົນ ຄົບຮອບ 43 ປີ ( 1 ມິຖຸນາ 1980 – 1 ມິຖຸນາ 2023 ແລະ ວັນສິ່ງແວດລ້ອມໂລກກໍຄື: ວັນສິ່ງແວດລ້ອມແຫ່ງຊາດ ວັນທີ 5 ມິຖຸນາ ຊຶ່ງພິທີດັ່ງກ່າວ ໄດ້ຈັດຂຶ້ນ 2 ຈຸດ ທີ່ບໍລິເວນຫໍຫຼັກເມືອງ ແລະ ທີ່ຫໍປະຊຸມໃຫຍ່ ເມືອງສາມັກຄີໄຊ ໂດຍການໃຫ້ກຽດເຂົ້າຮ່ວມຂອງ ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ, ມີທ່ານ ເລັດ ໄຊຍະພອນ ເຈົ້າແຂວງອັດຕະປື, ມີພາກສ່ວນກ່ຽວຂ້ອງເຂົ້າຮ່ວມ.
ຈຸດປະສົງຂອງການປູກຕົ້ນໄມ້ໃນຄັ້ງນີ້ ແມ່ນເພື່ອແນໃສ່ຟື້ນຟູພື້ນທີ່ໃນ 2 ຈຸດດັ່ງກ່າວນີ້ໃຫ້ກາຍເປັນພື້ນທີ່ສີຂຽວ, ເປັນຮົ່ມ ທັງເປັນແຫຼ່ງເຕົ້າໂຮມເຊື້ອພັນໄມ້ປະດັບຕ່າງໆໃນຕົວເມືອງ ກໍຄືເພື່ອໃຫ້ 2 ຈຸດນີ້ ມີຫຼາຍສີສັນ ພ້ອມທັງເພີ່ມເນື້ອທີ່ສີຂຽວໃຫ້ກາຍເປັນປອດຫາຍໃຈເອົາອາກາດທີ່ສະອາດ ແລະ ຫຼຸດຜ່ອນມົນລະພິດທາງອາກາດໃຫ້ແກ່ຊາວແຂວງອັດຕະປືອີກດ້ວຍ.
ສຳລັບຈຸດຫໍຫຼັກເມືອງ ມີເນື້ອທີ່ທັງໝົດປະມານເກືອບເຮັກຕາ ໂດຍໄດ້ນຳເບ້ຍໄມ້ທີ່ປູກຕົວຈິງ 21 ເບ້ຍ ແລະ ພື້ນທີ່ຫໍປະຊຸມໃຫຍ່ຫຼາຍກວ່າ 1 ເຮັກຕາ, ມີເບ້ຍໄມ້ທີ່ປູກ 21 ເບ້ຍ ຊຶ່ງທັງສອງຈຸດເຫັນວ່າຕ້ອງໄດ້ຟື້ນຟູ ແລະ ປູກໄມ້ປະດັບຊະນິດຕ່າງໆ ເພື່ອເຮັດໃຫ້ໂຄງປະກອບດ້ານຊະນິດພັນໄມ້ປະດັບມີຄວາມຫຼາກຫຼາຍຍິ່ງຂຶ້ນ, ກາຍເປັນສະຖານທີ່ເພື່ອການສຶກສາຄົ້ນຄວ້າທາງດ້ານວິທະຍາສາດ ແລະ ການສຶກສາຮໍ່າຮຽນ ສຳລັບນັກຮຽນ, ນັກສຶກສາໃນອະນາຄົດ ແລະ ເປັນບ່ອນຈັດງານລ້ຽງ, ງານປະຊຸມຂັ້ນຕ່າງໆ ແລະ ອື່ນໆໂດຍມີເບ້ຍໄມ້ຫຼາຍຊະນິດເຊັ່ນ: ດອກຈໍາປາ, ຕົ້ນຄູນ ແລະ ດອກໄມ້ອື່ນໆ.
ທັງນີ້ ໃນປີ 2023 ພະແນກກະສິກໍາ ແລະ ປ່າໄມ້ແຂວງອັດຕະປື ມີແຜນປູກຕົ້ນໄມ້ ແລະ ພື້ນຟູປ່າໃນທົ່ວແຂວງທັງໝົດ 21.684 ເຮັກຕາ, ໃນນີ້ ແຜນປູກໄມ້ 3.660 ເຮັກຕາ, ໃນນັ້ນຈະປູກໃນປ່າປ້ອງກັນ 320 ເຮັກຕາ, ປ່າສະຫງວນ 22 ເຮັກຕາ ແລະ ປ່າຜະລິດ 3.240 ເຮັກຕາ, ສ່ວນນອກປະເພດປ່າມີ 73 ເຮັກຕາ.
ສໍາລັບແຜນຟື້ນຟູປ່າໄມ້ໃນທົ່ວແຂວງອັດຕະປື ປີ 2023 ມີທັງໝົດ18.024 ເຮັກຕາ, ໃນນັ້ນ, ປ່າປ້ອງກັນ 11.584 ເຮັກຕາ, ປ່າສະຫງວນ 5.000 ເຮັກຕາ ແລະ ປ່າຜະລິດ 1.440 ເຮັກຕາ, ສ່ວນໃຫຍ່ແມ່ນເປັນໄມ້ອຸດສາຫະກໍາເຊັ່ນ: ໄມ້ດູ່, ໄມ້ກະຍູງ, ໄມ້ແຄນ, ໄມ້ໃຫ້ໝາກ ແລະ ໄມ້ປະດັບອື່ນໆ ສ່ວນການກະກຽມປູກຕົ້ນໄມ້ໃນວັນທີ 1 ມິຖຸນາ ເປັນວັນປູກໄມ້ແຫ່ງຊາດຕິດພັນກັບການສະເຫຼີມສະຫຼອງວັນເດັກນ້ອຍສາກົນໃນທົ່ວແຂວງຈະປູກມີ 11 ຈຸດ, ມີເບ້ຍທັງໝົດ 8.952 ເບ້ຍ.
ຂ່າວ-ພາບ: ຊິບປະໄຊ
