ສະພາແຫ່ງຊາດ (ສພຊ) ໄດ້ຈັດພິທີສະເຫຼີມສະຫຼອງວັນເດັກນ້ອຍສາກົນ ແລະ ວັນປູກຕົ້ນໄມ້ແຫ່ງຊາດ ຂຶ້ນໃນວັນທີ 1 ມິຖຸນາ ນີ້ ທີ່ສະພາແຫ່ງຊາດ. ໂດຍເປັນກຽດເຂົ້າຮ່ວມ ຂອງທ່ານ ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ, ທ່ານ ປ້າ ນາລີ ສີສຸລິດ ພັນລະຍາ ທ່ານປະທານປະເທດ ແຫ່ງ ສປປ ລາວ, ທ່ານ ນາງ ວິພາວັນ ພົມວິຫານ ປະທານກອງທຶນຊ່ວຍເຫຼືອສັງຄົມແຫ່ງ ຊາດ, ບັນດາທ່ານ ຮອງປະທານຄະນະປະຈຳສະພາແຫ່ງຊາດ, ບັນດາຄະນະປະທານ ກຳມະການສະພາແຫ່ງຊາດ, ທ່ານ ມອນໄຊ ລາວມົວຊົ່ງ ເລຂາສູນກາງຊາວໜຸ່ມ ປປ ລາວ ແລະ ການນຳ, ພະນັກງານ-ລັດຖະກອນ, ພໍ່ແມ່ຜູ້ປົກຄອງ ແລະ ຫຼານນ້ອຍເຂົ້າຮ່ວມຢ່າງພ້ອມພຽງ.
ໃນງານມື້ນີ້ໄດ້ມີພິທີສະເຫຼີມສະຫຼອງວັນເດັກນ້ອນສາກົນ ແລະ ວັນປູກຕົ້ນໄມ້ແຫ່ງຊາດ, ຊົມການສະແດງສິລະປະຄື: ການສະແດງລະຄອນຕຸກກະຕາ ຈາກກອງລະຄອນແຫ່ງຊາດ ກົມສີລະປະວັດ ທະນະທຳ ກະຊວງຖະແຫຼງຂ່າວ, ວັດທະນາທຳ ແລະ ທ່ອງທ່ຽວ, ຊົມການສະແດງສິລະປະລວມໝູ່ຟ້ອນລວມໝູ່ ຈາກຫຼານນ້ອຍໂຮງຮຽນສິນໄຊ, ກິດຈະກຳຫຼິ້ນເກມຖາມ-ຕອບ, ແຕ້ມຮູບ ແລະ ມອບຂອງຂວັນໃຫ້ນ້ອງນ້ອຍ, ນອກຈາກນັ້ນ ຍັງມີບູດຈັດບຸບເຟອາຫານ, ນ້ຳດື່ມ, ຊາ, ກາເຟ, ກະແລັມແຈກໃຫ້ຫຼານນ້ອຍ ແລະ ຜູ້ເຂົ້າຮ່ວມງານໄດ້ກິນໄດ້ຊິມຢ່າງຄຶກຄື້ນມ່ວນຊື່ນ, ພ້ອມນີ້ຍັງໄດ້ມອບໃບຍ້ອງຍໍໃຫ້ແກ່ຜູ້ປະກອບສ່ວນໃນກິດຈະກຳສະເຫຼີມສະຫຼອງວັນເດັກນ້ອຍໃນມື້ນີ້.
ໃນພິທີດັ່ງກ່າວ, ທ່ານ ມອນໄຊ ລາວມົວຊົ່ງ ໄດ້ມີຄຳເຫັນວ່າ: ວັນທີ 1 ມິຖຸນາ ຂອງທຸກໆປີ ເປັນວັນປູກຕົ້ນໄມ້ແຫ່ງຊາດ ແລະ ວັນເດັກນ້ອຍສາກົນ ເພື່ອປູກຈິດສຳນຶກໃຫ້ແກ່ອະນຸຊົນ ແລະ ເຍົາວະຊົນ ກໍຄືທົ່ວສັງຄົມໃຫ້ເຫັນໄດ້ຄວາມສຳຄັນຂອງປ່າໄມ້, ການປົກປັກຮັກສາ, ພັດທະນາ ແລະ ນຳໃຊ້ປ່າໄມ້ຕາມທິດການພັດທະນາເຕີບໂຕສີຂຽວ ແລະ ຍືນຍົງ ຂອງອົງການສະຫະປະຊາຊາດ.
(ຂ່າວ-ພາບ: ນ.ພັດ)
