ໃນຕອນເຊົ້າຂອງວັນທີ 1 ມິຖຸນາ ນີ້ ທີ່ ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂ່ຳນັບຂອງ ທ່ານ Michael W. Michalak ຮອງປະທານອາວຸໂສສະພາທຸລະກິດອາຊຽນ-ອາເມຣິກາ, ຮັບຜິດຊອບພາກພື້ນອາຊີຕາເວັນອອກສ່ຽງໃຕ້ ໂດຍມີສຳນັກງານຕັ້ງຢູ່ປະທດສິງກະໂປ ພ້ອມດ້ວຍບັນດາຜູ້ບໍລິຫານບໍລິສັດທີ່ມີຊື່ສຽງຈາກ ສ ອາເມຣິກາ ຕັ້ງຢູ່ ສປປ ລາວ ເຊັ່ນ: ບໍລິສັດ RMA ນຳເຂົ້າລົດ Ford, ບໍລິສັດ Coca-Cola, Visa, ບໍລິສັດທາງກົດໝາຍ, ບໍລິສັດການຢາ ແລະ ອື່ນໆ ຈາກຂະແໜງການຜະລິດສິນຄ້າ, ດ້ານເຕັກໂນໂລຊີຂໍ້ມູນຂ່າວສານ, ດ້ານການບໍລິການການເງິນ, ດ້ານກົດໝາຍ ແລະ ດ້ານສາທາລະນະສຸກ.
ທ່ານຮອງນາຍົກລັດຖະມົນຕີ ສະເຫຼີມໄຊ ກົມມະສິດ ໄດ້ກ່າວສະແດງຄວາມຍິນດີຕ້ອນຮັບຄະນະດັ່ງກ່າວ ໂດຍໄດ້ຕີລາຄາສູງຕໍ່ການປະກອບສ່ວນອັນສຳຄັນຂອງສະພາທຸລະກິດອາຊຽນ-ອາເມຣິກາໃນໄລຍະຜ່ານມາ ໂດຍສະເພາະການພົວພັນຮ່ວມມືທາງດ້ານການຄ້າ ແລະ ການລົງທຶນ ໃນຂະ ແໜງຕ່າງໆທາງດ້ານເສດຖະກິດ, ສັງຄົມ ແລະ ສິ່ງແວດລ້ອມ. ພ້ອມນີ້, ທ່ານຮອງນາຍົກ ລັດຖະມົນຕີ ຍັງໄດ້ຊຸກຍູ້ໃຫ້ຄະນະສະພາທຸລະກິດອາຊຽນ-ອາເມຣິກາ ເພີ່ມທະວີການພົວພັນ ແລະ ຮ່ວມມືກັບອາຊຽນເວົ້າລວມ ເວົ້າສະເພາະກໍຄື ສປປ ລາວ ທີ່ຈະຮັບກຽດເປັນປະທານອາຊຽນໃນປີ 2024 ໂດຍສະເພາະການຍົກລະດັບການສ້າງຂີດຄວາມສາມາດຂອງຂະແໜງການທາງດ້ານຕ່າງໆ ແນໃສ່ການເສີມຂະຫຍາຍການຮ່ວມມືທາງດ້ານການຄ້າ ແລະ ການລົງທຶນໃຫ້ສູງຂຶ້ນ.
ໂອກາດນີ້, ທ່ານ ຮອງປະທານອາວຸໂສ Michael W. Michalak ໄດ້ກ່າວແນະນຳບັນດາຜູ້ລິຫານລະດັບສູງຂອງບໍລິສັດ ສ ອາເມຣິກາ ທີ່ເຂົ້າມາລົງທຶນຢູ່ ສປປ ລາວ ແລະ ໄດ້ມີການແລກປ່ຽນ ຄໍາຄິດເຫັນຢ່າງກົງໄປກົງມາ ໂດຍເນັ້ນໜັກການສ້າງຄວາມເຂັ້ມແຂງທາງດ້ານການພັດທະນາເສດຖະ ກິດດີຈີຕອນ, ການພັດທະນາພື້ນຖານໂຄງລ່າງ, ສາທາລະນະສຸກ, ສິ່ງແວດລ້ອມ ແລະ ການພັດທະນາແບບຍືນຍົງ. ທ່ານຮອງປະທານສະພາທຸລະກິດອາຊຽນ-ອາເມຣິກາ ຍັງແຈ້ງໃຫ້ຊາບວ່າຄະນະສະພາທຸລະກິດອາຊຽນ-ອາເມຣິກາ ຍິນດີຈະໃຫ້ການສະໜັບສະໜູນ ແລະ ຊ່ວຍເຫຼືອ ສປປ ລາວ ໃນການກະກຽມເປັນປະທານອາຊຽນ ປີ 2024, ພ້ອມທັງໄດ້ສະເໜີໃຫ້ລັດຖະບານ ສປປ ລາວ ສະໜັບສະໜູນບັນດາກິດຈະກຳຂອງສະພາທຸລະກິດອາຊຽນ-ອາເມຣິກາ ໃຫ້ສາມາດປະກອບສ່ວນຫຼາຍຂຶ້ນ ໂດຍສະເພາະໃນເວທີປຶກສາຫາລື ແລະ ແລກປ່ຽນທາງພາກທຸລະກິດ ໂດຍຜ່ານກົນໄກຂອງເສົາຄໍ້າເສດຖະກິດອາຊຽນ. ພ້ອມນີ້, ທ່ານ ຍັງໄດ້ແຈ້ງຕື່ມວ່າ ຈະມີການເຊື້ອເຊີນບັນດາລັດຖະມົນຕີເສດຖະກິດອາຊຽນ ໄປຢ້ຽມຢາມແລກປ່ຽນກັບສະພາທຸລະກິດອາຊຽນ-ອາເມຣິກາ ທີ່ ສ ອາເມຣິກາ ໃນໄລຍະທີ່ ສປປ ລາວ ເປັນປະທານອາຊຽນ ປີ 2024 ເພື່ອສົ່ງເສີມຮ່ວມມືທາງດ້ານການຄ້າ ແລະ ການລົງທຶນລະຫວ່າງ ອາຊຽນ ແລະ ສ ອາເມຣິກາ.
ໃນຕອນທ້າຍ, ທ່ານຮອງປະທານສະພາທຸລະກິດອາຊຽນ-ອາເມຣິກາ ໄດ້ກ່າວສະແດງຄວາມຂອບໃຈຢ່າງຈິງໃຈ ຕໍ່ການຕ້ອນຮັບອັນອົບອຸ່ນຂອງ ທ່ານຮອງນາຍົກລັດຖະມົນຕີ ສະເຫຼີມໄຊ ກົມມະສິດ ໂດຍຢືນຢືນວ່າຈະສືບຕໍ່ຮັດແໜ້ນ ແລະ ສົ່ງເສີມການພົວພັນຮ່ວມມືລະຫວ່າງສະພາທຸລະກິດອາຊຽນ ແລະ ສະພາທຸລະກິດອາຊຽນ-ອາເມຣິກາ ເພື່ອປະກອບສ່ວນໃນການສ້າງປະຊາຄົມອາຊຽນ ກໍຄືການກະກຽມເປັນປະທານອາຊຽນ ຂອງ ສປປ ລາວ ໃນປີ 2024 ໃຫ້ປະສົບຜົນສຳເລັດຢ່າງຈົບງາມ.
(ຂ່າວ-ພາບ: ກະຊວງການຕ່າງປະເທດ
