ວັນທີ 16 ພຶດສະພາ 2023 , ທີ່ຫ້ອງວ່າການ ແຂວງເຊກອງ ທ່ານ ເຫລັກໄຫລ ສີວິໄລ ເຈົ້າແຂວງເຊກອງໄດ້ໃຫ້ຕ້ອນຮັບ ທ່ານ ປີເຕີ ເຮ່ມອນ ເອກອັກຄະລັດຖະທູດ ແຫ່ງສະຫະລັດອາເມລິກາ ປະຈໍາ ສປປ ລາວ ເຂົ້າຢ້ຽມພົບປະ ໃນໂອກາດທີ່ທ່ານເດີນທາງມາເຂົ້າຮ່ວມກອງປະຊຸມວາງແຜນກ່ຽວກັບຄວາມສາມາດໃນການສ້າງຄວາມເຂັ້ມແຂງດ້ານສຸຂະພາບແມ່ – ເດັກ ແລະ ວຽກງານດ້ານໂພສະນາການ, ທີ່ໄດ້ຮັບທຶນສະໜັບສະໜູນຈາກໂຄງການຢູເຊດ ( USAiD ) ພ້ອມທັງສໍາຫລວດ ແລະ ປະເມີນຄວາມສາມາດຂອງໂຄງການ ແລະຈະເພີ່ມການຊ່ວຍເຫຼືອ ແລະ ຂະຫຍາຍໂຄງການທີ່ທາງ ສະຫະລັດ ໄດ້ຊ່ວຍເຫລືອແຂວງຕ່າງໆທາງພາກໃຕ້ຂອງ ສປປ ລາວ. ໃນໂອກາດນີ້, ທ່ານ ເຫລັກໄຫລ ສີວິໄລ ເຈົ້າແຂວງເຊກອງ ກໍ່ໄດ້ລາຍງານສະພາບທີ່ຕັ້ງ ແລະ ຈຸດພິເສດ, ການພັດທະນາພື້ນຖານໂຄງລ່າງ, ເສດຖະກິ-ສັງຄົມໃຫ້ທ່ານເອກອັກຄະລັດຖະທູດແຫ່ງ ສະຫະລັດອາເມລິກາ ປະຈໍາ ສປປ ລາວ ຮັບຊາບ ພ້ອມທັງໄດກ່າວສະແດງຄວາມຂອບໃຈ, ມາຍັງທ່ານເອກອັກຄະ ລັດຖະທູດແຫ່ງ ສະຫະລັດອາເມລິກາ ປະຈໍາ ສປປ ລາວທີ່ໄດ້ໃຫ້ການຊວ່ຍເຫຼືອດ້ານທຶນຮອນແກ່ແຂວງເຊກອງໃນໄລຍະຜ່ານມາ, ໂອກາດນີ້ທ່ານເຈົ້າແຂວງເຊກອງກໍ່ໄດ້ ສະເໜີຄວາມຕ້ອງການທຶນເພື່ອເລັງໃສ່ການແກ້ໄຂຄວາມທຸກຍາກ ເປັນຕົ້ນ: ແມ່ນດ້ານວຽກງານສາທາລະນະສຸກໃຫ້ສືບຕໍ່ສະໜັບສະໜູນທຶນໃນໂຄງການທີ່ຈັດຕັ້ງປະຕິບັດມາແລ້ວພ້ອມທັງຊ່ວຍເຫຼືອອຸປະກອນການແພດ,ວັກຊິນປ້ອງກັນໂຄວິດ-19, ເພີ່ມງົບປະມານ,ບຸກຄະລາກອນເຂົ້າໃນໂຄງການເກັບກູ້ລະເບີດບໍ່ທັນແຕກ ແລະໃຫ້ທຶນສະໜັບສະໜູນສ້າງສູນຄົນພິການຢູ່ແຂວງເຊກອງທີ່ມີໃນແຜນມາແລ້ວ.
ສໍາລັບແຂວງເຊກອງ ນອກຈາກ #ໂຄງການສ້າງຄວາມເຂັມແຂງດ້ານສຸຂະພາບແມ່ ແລະ ເດັກແລະໂພສະນາການແລ້ວ, ຍັງໄດ້ໃຫ້ທຶນສະໜັບສະໜູນໃນໂຄງການເກັບກູ້ລະເບີດບໍ່ທັນແຕກ, ພ້ອມນັ້ນຈະນໍາເອົາຂໍ້ມູນທີ່ແຂວງສະເໜີ ໄປສຶກສາຄົ້ນຄ້ວາເພື່ອຊ່ວຍເຫຼືອໃນຕໍ່ໜ້າ.
