ຕາມຂ່າວຈາກວິທະຍຸສາກົນແຫ່ງ ສປ ຈີນ ເວທີປຶກສາຫາລືການຄ້າອົງການສະຫະປະຊາຊາດ (ສປຊ) ຄັ້ງທີ3 ຈັດຂຶ້ນໂດຍ ກອງປະຊຸມການຄ້າ ແລະ ການພັດທະນາສະຫະປະຊາຊາດ ເມື່ອບໍ່ດົນມານີ້ ຢູ່ປະເທດສະວິດ ໂດຍມີສັນຍາສະບັບໜຶ່ງຈະຊຸກຍູ້ການຄ້າ ລະຫວ່າງ ປະເທດພວມພັດທະນາໄດ້ກາຍເປັນຈຸດສຸມໃນກອງປະຊຸມຄັ້ງນີ້. ຫລັງຈາກບຣາຊິນໄດ້ໃຫ້ ສັດຕະຍາບັນສັນຍາສະບັບດັ່ງກ່າວ, ຂໍພຽງແຕ່ມີປະເທດສະມາຊິກອີກປະເທດໜຶ່ງໃຫ້ສັດຕະຍາບັນ, ລະບົບໃຫ້ຄວາມ ສະດວກດ້ານການຄ້າທົ່ວໂລກ ຂອງປະເທດພວມພັດທະນາກໍຈະມີຜົນບັງຄັບໃຊ້ຢ່າງເປັນທາງການ. ພາຍຫລັງສັນຍາ ສະບັບນີ້ມີຜົນບັງຄັບໃຊ້ແລ້ວ ຈະຊຸກຍູ້ການຄ້າ ລະຫວ່າງປະເທດພວມພັດທະນາຕື່ມອີກ ເຊັ່ນ: ປະເທດພວມພັດທະນາ ຢູ່ພາກພື້ນອາເມລິກາລາຕີນ ຈຳນວນໜຶ່ງແມ່ນປະເທດຜະລິດທັນຍາຫານ, ແຕ່ມີປະເທດຈຳນວນໜຶ່ງຄືອິນເດຍ ເປັນຕົ້ນຊ້ຳພັດຕ້ອງການນຳເຂົ້າທັນຍາຫານ. ຖ້າວ່າພາສີ ລະຫວ່າງ ເຂົາເຈົ້າໄດ້ຮັບການຫລຸດຜ່ອນຈະສາມາດຊ່ວຍແກ້ໄຂວິກິດການດ້ານທັນຍາຫານໃນປັດຈຸບັນ.
(ບັນນາທິການຂ່າວ: ຕ່າງປະເທດ)
ຮຽບຮຽງ ຂ່າວໂດຍ: ສະໄຫວ ລາດປາກດີ
