ຕາມຂ່າວຈາກວິທະຍຸສາກົນຫວຽດນາມ ເມື່ອບໍ່ດົນມານີ້ວາລະສານທ່ອງທ່ຽວສາກົນ Conde Nast Traveler ໄດ້ຄັດເລືອກເອົາ 50 ເທດສະບານເມືອງນ້ອຍທີ່ສວຍງາມທີ່ສຸດໃນໂລກ ໃນນັ້ນມີເທດສະບານເມືອງຊາປາ (ແຂວງ ລາວກາຍ) ຂອງສສ ຫວຽດນາມ ໄດ້ຮັບເລືອກເປັນເມືອງທີ່ສວຍງາມທີ່ສຸດໃນໂລກ ເນື່ອງຈາກຊາປາ ແມ່ນເທດສະບານເມືອງຢູ່ເຂດພູ ດອຍ ທີ່ສະຫງົບງຽບນອນຢູ່ແຂວງລາວກາຍ, ທາງທິດຕາເວັນຕົກພາກເໜືອຂອງ ສສ ຫວຽດນາມ. ດິນແດນແຫ່ງນີ້ ໄດ້ເປັນທີ່ຮູ້ຈັກກັນດີດ້ວຍທັດສະນີຍະພາບຂອງພູຜາປ່າໄມ້ທີ່ໃຫຍ່ໂຕມະໂຫຖານ, ມີນາຂັ້ນໄດທີ່ກວ້າງໃຫຍ່ຈົນສຸດສາຍຕາ, ນ້ຳຕົກຕາດທີ່ງົດງາມດັ່ງໃນຝັນ ແລະ ເສັ້ນທາງຄົດງໍ. ບໍ່ພຽງແຕ່ເທົ່ານັ້ນ Conde Nast Traveler ຍັງເນັ້ນໜັກເຖິງຫລາຍສະຖານທີ່ທ່ອງທ່ຽວທີ່ສວຍງາມຢູ່ອ້ອມເທດສະບານເມືອງດັ່ງກ່າວພວມລໍຖ້າແຂກທ່ອງທ່ຽວມາຢ້ຽມຊົມອີກດ້ວຍ.
(ບັນນາທິການຂ່າວ: ຕ່າງປະເທດ)
ຮຽບຮຽງ ຂ່າວໂດຍ: ສະໄຫວ ລາດປາກດີ
