ບັນຫາອຸບັດຕິເຫດຕາມທ້ອງຖະໜົນຍັງເປັນໜຶ່ງປະກົດການຫຍໍ້ທໍ້ທີ່ເກີດຂຶ້ນໃນສັງຄົມ ແລະ ຍັງເປັນບັນຫາຊໍາເຮື້ອແກ້ໄຂບໍ່ທັນໄດ້ດີເທົ່າທີ່ຄວນ ຊຶ່ງສ້າງຄວາມເສຍຫາຍໃຫ້ແກ່ພາຫະນະ ແລະ ຊັບສິນ ເງິນຄຳ ເປັນຈຳນວນມະຫາສານ, ຍ້ອນຜູ້ຂັບຂີ່ລົດໄປ-ມາຕາມຖະໜົນຫົນທາງຈໍານວນໜຶ່ງຍັງບໍ່ປະຕິບັດກົດລະບຽບຈະລາຈອນທາງບົກຢ່າງເຂັ້ມງວດເຊັ່ນ: ເມົາແລ້ວຂັບຂີ່, ຂັບຂີ່ລົດໄວເກີນຂອບເຂດ ແລະ ອື່ນໆ ຈຶ່ງພາໃຫ້ເກີດອຸບັດເຫດ ແລະ ນຳຄວາມສູນເສຍຕ່າງໆຕາມມາ.
ຂໍ້ມູນຈາກກົມໃຫຍ່ຕຳຫຼວດຈະລາຈອນກະຊວງປ້ອງກັນຄວາມສະຫງົບໄດ້ລາຍງານໃຫ້ຮູ້ກ່ຽວກັບອຸບັດເຫດທີ່ເກີດຂຶ້ນໃນທົ່ວປະເທດປະຈຳເດືອນເມສາ (4) ຜ່ານມາວ່າ: ໃນທົ່ວປະເທດມີອຸບັດເຫດເກີດຂຶ້ນທັງ ໝົດ 702 ລາຍ ເພີ່ມຂຶ້ນຈາກເດືອນມີນາ 85 ລາຍ, ພາຫະນະເປ່ເພ 1.244 ຄັນ, ເພີ່ມຂຶ້ນຈາກເດືອນມີນາ 157 ຄັນ, ມີຄົນໄດ້ຮັບບາດເຈັບ 1.173 ຄົນ ຍິງ 355 ຄົນ ເພີ່ມຂຶ້ນຈາກເດືອນມີນາ 199 ຄົນ, ຄົນເສຍຊີວິດ 90 ຄົນ ຍິງ 22 ຄົນ, ເພີ່ມຂຶ້ນຈາກເດືອນມີນາ 5 ຄົນ. ໃນນັ້ນ, ອຸບັດເຫດທີ່ເກີດຂຶ້ນຫຼາຍກວ່າໝູ່ ແມ່ນ ນະຄອນຫຼວງວຽງຈັນ ມີອຸບັດເຫດເກີດຂຶ້ນທັງໝົດ 104 ລາຍ, ພາຫະນະເປ່ເພ 212 ຄັນ, ຄົນໄດ້ຮັບບາດເຈັບ 125 ຄົນ, ເສຍຊີວິດ 15 ຄົນ, ອັນດັບທີ 2 ແຂວງຈໍາປາສັກ 96 ລາຍ, ແຂວງສະຫວັນນະເຂດ 80 ລາຍ ແລະ ແຂວງອື່ນໆ ຕາມລຳດັບ ຊຶ່ງມີສາເຫດມາຈາກຫຼາຍກໍລະນີຄື: ຍ້ອນຜູ້ຂັບຂີ່ລົດ ດື່ມແລ້ວຂັບຂີ່ລົດ, ຂັບຂີ່ລົດໄວເກີນກຳນົດ, ປ່ຽນທິດທາງເດີນກະທັນຫັນ, ບໍ່ປ່ອຍສິດ, ແຊງຂຶ້ນໜ້າບໍ່ຮັບປະກັນ, ເຕັກນິກລົດບໍ່ດີ, ລ່ວງປ້າຍຫ້າມ ແລະ ອື່ນໆ. ສໍາລັບເວລາອຸບັດເຫດທີ່ມັກເກີດຂຶ້ນຫຼາຍແມ່ນ ເວລາ 1:00 ໂມງ ຫາ 7:00 ໂມງຕອນເຊົ້າ ແລະ 16:00 ໂມງແລງ. ໃນນັ້ນ, ອຸບັດເຫດຍັງເກີດຂຶ້ນຫຼາຍທີ່ສຸດແມ່ນວັນສຸກ, ວັນເສົາ ແລະ ໃນໂມງຮິບດ່ວນເຂົ້າການ – ເລີກການ.
ແນວໃດກໍຕາມເພື່ອເຮັດໃຫ້ບັນຫາອຸບັດເຫດດັ່ງກ່າວ ໃຫ້ຫຼຸດໜ້ອຍຖອຍລົງຢູ່ໃນສັງຄົມ ທຸກຄົນ ຕ້ອງເປັນເຈົ້າການປະຕິບັດກົດລະບຽບຈະລາຈອນທາງບົກຢ່າງເຂັ້ມງວດ, ມີສະຕິຕໍ່ການຂັບຂີ່ລົດ, ຮູ້ຈັກໃຫ້ກຽດຊຶ່ງກັນ ແລະ ກັນ, ຄ່ອຍໄປ-ຄ່ອຍມາ ແລະ ອື່ນໆ. ຖ້າທຸກຄົນມີສະຕິໃນການຂັບຂີ່ລົດຕາມທ້ອງຖະໜົນ ເຊື່ອແນ່ວ່າ ອຸບັດເຫດຈະຫຼຸດໜ້ອຍຖອຍລົງ, ບໍ່ນຳຄວາມສູນເສຍມາສູ່ໂຕທ່ານເອງ ແລະ ຄົນອ້ອມຂ້າງທີ່ໃຊ້ລົດໃຊ້ຖະໜົນຮ່ວມກັນ ໂດຍສະເພາະບໍ່ນໍາຄວາມສູນເສຍມາສູ່ພາຫະນະ, ຊັບສິນ, ເສຍຊີວິດ ແລະ ອື່ນໆ.
ໂດຍ: ວັນເພັງ
