ຂ່າວສານຊີອາໄອລາຍງານ ເມື່ອທ້າຍອາທິດຜ່ານມາ, ອົງການອະນາໄມໂລກ (WHO) ເປີດເຜີຍວ່າ: ພະຍາດໂຄວິດ-19 ຈະບໍ່ເປັນ “ພາວະສຸກເສີນດ້ານສາທາລະນະສຸກທີ່ໄດ້ຮັບຄວາມສົນໃຈຈາກປະຊາຄົມໂລກ” ອີກ ພ້ອມທັງຍົກເລີກການເຕືອນໄພລະດັບສູງສຸດທີ່ຕັ້ງໄວ້ໃນວັນທີ 30 ມັງກອນປີ 2020 ຜ່ານມາ.
ໃນວັນທີ 4 ພຶດສະພາ ຜ່ານມາ, ຄະນະກຳມະການສຸກເສີນຂອງອົງການອະນາໄມໂລກໄດ້ຈັດກອງປະຊຸມປະເມີນສະພາບການແຜ່ລະບາດຂອງພະຍາດໂຄວິດ-19 ໃນທົ່ວໂລກ. ຫຼັງຈາກນັ້ນ, ທ່ານ ດຣ. ເທໂດສ ອາດຮານອມ ເກເບຣເຢຊຸສ ຜູ້ອຳນວຍການໃຫຍ່ WHO ໄດ້ປະກາດຂໍ້ຕົກລົງດັ່ງກ່າວໂດຍອີງຕາມຜົນການປະເມີນ. ທ່ານ ດຣ. ເທໂດສ ກ່າວຕື່ມວ່າ: ນີ້ບໍ່ໝາຍຄວາມວ່າພະຍາດໂຄວິດ-19 ບໍ່ເປັນໄພຂົ່ມຂູ່ຕໍ່ລະບົບສາທາລະນະສຸກຂອງໂລກອີກແລ້ວ ເມື່ອພະຍາດໂຄວິດ-19 ລະບາດເຮັດໃຫ້ໂລກຕົກຢູ່ໃນຄວາມອັນຕະລາຍອີກເທື່ອໜຶ່ງ, ທ່ານຈະເຕົ້າໂຮມຜູ້ຊ່ຽວຊານປະເມີນສະຖານະການ. ໂດຍອີງຕາມຂໍ້ມູນສະຖິຕິຈາກອົງການອະນາໄມໂລກຊີ້ໃຫ້ເຫັນວ່າ: ໃນໄລຍະ 3 ປີກວ່າ ຜ່ານມາ, ມີຜູ້ຕິດເຊື້ອພະຍາດໂຄວິດ-19 ທົ່ວໂລກບັນລຸເຖິງ 760 ລ້ານກວ່າຄົນ ແລະ ມີຜູ້ເສຍຊີວິດຫຼາຍກວ່າ 6,9 ລ້ານຄົນ.
