ກຳມາທິການແຜນການ ການເງິນ ແລະ ການກວດສອບ ສະພາແຫ່ງຊາດ ຈັດກອງປະຊຸມສຳມະນາວິທະຍາສາດ ຂັ້ນວິຊາການ ກ່ຽວກັບການເພີ່ມທະວີການຄຸ້ມຄອງການລົງທຶນຂອງລັດໃຫ້ມີປະສິດທິພາບ ແລະ ປະສິດທິຜົນ ຂຶ້ນໃນວັນທີ 2 ພຶດສະພາ ຜ່ານມາ ທີ່ຫ້ອງປະຊຸມສະພາແຫ່ງຊາດ, ຜ່ານລະບົບກອງປະຊຸມທາງໄກ, ໂດຍການເປັນປະທານຮ່ວມຂອງ ທ່ານ ລີເບີ ລີບົວປາວ ປະທານກຳມາທິການແຜນການ, ການເງິນ ແລະ ກວດສອບ, ທ່ານ ຄຳເຈນ ວົງໂພສີ ລັດຖະມົນຕີກະຊວງແຜນການ ແລະ ການລົງທຶນ, ບັນດາທ່ານປະທານ, ຮອງປະທານກຳມາທິການພາຍໃນສະພາແຫ່ງຊາດ, ລັດຖະມົນຕີ, ຮອງລັດຖະມົນຕີ, ມີພາກສ່ວນກ່ຽວຂ້ອງ, ມີປະທານສະພາ, ຮອງປະທານສະພາປະຊາຊົນແຂວງ ໃນຂອບເຂດທົ່ວປະເທດເຂົ້າຮ່ວມ.
ສໍາລັບແຂວງສາລະວັນ ນຳໂດຍ ທ່ານ ສີເຮັງ ຫອມສົມບັດ ປະທານຄະນະສະມາຊິກສະພາແຫ່ງຊາດ ເຂດເລືອກຕັ້ງ 14 ປະທານສະພາປະຊາຊົນແຂວງສາລະວັນ, ພ້ອມຄະນະ.
ທ່ານ ລີເບີ ລີບົວປາວ ໄດ້ກ່າວວ່າ: ກອງປະຊຸມສຳມະນາໃນຄັ້ງນີ້ ແມ່ນເພື່ອແນໃສ່ປະກອບສ່ວນເຂົ້າໃນການປະຕິບັດວາລະແຫ່ງຊາດກ່ຽວກັບການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ໃຫ້ບັນລຸຕາມແຜນ ກໍຄືການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໃຫ້ຂະຫຍາຍຕົວ ຕາມທິດທີ່ມີຄຸນນະພາບ, ໝັ້ນທ່ຽງ ແລະ ຍືນຍົງ ຊຶ່ງເປັນເປົ້າໝາຍ ທີ 1 ຂອງແຜນພັດທະນາເສດຖະກິດ-ສັງຄົມແຫ່ງຊາດ ຕາມທີ່ໄດ້ກຳນົດໃນແຜນ 5 ປີ ຄັ້ງທີ IX (2021-2025). ເພື່ອປັບປຸງວຽກງານການຈັດສັນງົບປະມານ ການລົງທຶນຂອງລັດໃຫ້ສອດຄ່ອງຕາມລັດຖະທຳມະນູນ, ກົດໝາຍ ໃຫ້ມີຜົນສັກສິດ ແລະ ມີປະສິດທິພາບ ທັນເວລາ ພິຈາລະນາຮັບຮອງຢູ່ກອງປະຊຸມສະພາແຫ່ງຊາດ ແລະ ຈັດຕັ້ງປະຕິບັດຕາມແຜນງົບປະມານປະຈຳປີໃຫ້ມີຜົນສັກສິດຕາມທີ່ໄດ້ກຳນົດໃນກົດໝາຍ ໂດຍສະເພາະ ການຈັດສັນງົບປະມານຕົວຈິງ ຮັບປະກັນຄວາມຍຸຕິທຳ, ມີຈຸດສຸມ, ເປັນບຸລິມະສິດ, ມີການກະຈາຍ ແລະ ການດຸ່ນດ່ຽງການລົງທຶນລະຫວ່າງຂະແໜງການສູນກາງ ແລະ ທ້ອງຖິ່ນ ແລະ ລະຫວ່າງເຂດແຄ້ວນ ໃຫ້ສົມເຫດສົມຜົນ, ປັບປຸງຫຼັກການ ແລະ ກົນໄກການຈັດສັນງົບປະມານໃຫ້ຈະແຈ້ງ, ນຳໃຊ້ເຕັກນິກການຈັດສັນງົບປະມານໃຫ້ມີຄວາມທັນສະໄໝຫຼາຍຂຶ້ນ ແລະ ການສ້າງແຜນການລົງທຶນຂອງລັດໃນຕໍ່ໜ້າ ສອດຄ່ອງຕາມຄວາມສາມາດສະໜອງແຫຼ່ງທຶນຕົວຈິງ ຊຶ່ງກອງປະຊຸມໄດ້ຍົກໃຫ້ເຫັນບັນຫາທີ່ຕັ້ງຂຶ້ນທາງດ້ານນິຕິກຳ, ຫຼັກການ, ກົນໄກປະສານສົມທົບກ່ຽວກັບການຈັດສັນງົບປະມານ ແລະ ການພິຈາລະນາຮັບຮອງງົບປະມານ ແລະ ດ້ານເຕັກນິກວິຊາການ, ໃນການສະເໜີວິທີແກ້ໄຂແຕ່ລະບັນຫາໃຫ້ຈະແຈ້ງ, ຊັດເຈນ ເພື່ອຫັນໃຫ້ເປັນນິຕິກຳຢ່າງເປັນລະບົບ ແລະ ສາມາດຈັດຕັ້ງປະຕິບັດໃຫ້ສອດຄ່ອງກັບຕົວຈິງ.
ກອງປະຊຸມຄັ້ງນີ້ ຍັງໄດ້ຮັບຟັງການນຳສະເໜີບົດຄົ້ນຄວ້າວິທະຍາສາດກ່ຽວກັບການເພີ່ມທະວີການຄຸ້ມຄອງການລົງທຶນຂອງລັດ ໃຫ້ມີປະສິດທິພາບ ແລະ ປະສິດທິຜົນ, ພ້ອມທັງໄດ້ຮ່ວມກັນປະກອບຄຳຄິດຄຳເຫັນ, ສົນທະນາແລກປ່ຽນ ແລະ ຖອດຖອນເປັນບົດຮຽນ ກ່ຽວກັບບັນດາເນື້ອໃນທີ່ໄດ້ສະເໜີ ເພື່ອສະເໜີຂັ້ນເທິງພິຈາລະນາ ແລະ ດຳເນີນການໃນຂັ້ນຕໍ່ໄປ ຕາມຄວາມເໝາະສົມຮັບໃຊ້ ໃນການກະກຽມໃນການສ້າງແຜນການລົງທຶນຂອງລັດ ປະຈຳປີ 2024 ໃຫ້ມີປະສິດທິພາບ ແລະ ປະສິດທິຜົນດີ ຂຶ້ນກວ່າເກົ່າ.
ຂ່າວ-ພາບ: ທິດລານີ ໂຄດໂຍທາ
