ສຳນັກງານເສດຖະກິດ ແລະ ສັງຄົມຂອງສະຫະປະຊາຊາດ (ສປຊ) ລາຍງານ ໃນວັນທີ 25 ເມສານີ້ວ່າ: ຈຳນວນປະຊາກອນ ຂອງອິນເດຍ ຈະລື່ນກາຍ ສປ ຈີນ ເປັນປະເທດທີ່ມີປະຊາກອນຫລາຍທີ່ສຸດໃນໂລກ ໃນເດືອນເມສານີ້ ໂດຍຈະມີປະຊາກອນ ເກືອບ 1.430 ລ້ານຄົນ ເນື່ອງຈາກ ປະຊາກອນ ສປ ຈີນ ເລີ່ມຫລຸດລົງ ຫລັງຈາກ ເພີ່ມຂຶ້ນ ໃນລະດັບ 1.426 ລ້ານຄົນ ເມື່ອປີກາຍນີ້. ຂະນະທີ່ ສປຊ ຄາດການວ່າ: ຈຳນວນ ປະຊາກອນ ສປ ຈີນ ຈະຫລຸດລົງຕໍ່ເນື່ອງໄປຢູ່ປະມານ 1.000 ລ້ານຄົນ ພາຍໃນ ທ້າຍສະຕະວັດນີ້.
ຫລັງຈາກ ສປ ຈີນ ຢືນຢູ່ແຖວໜ້າ ປະເທດ ທີ່ມີປະຊາກອນ ຫລາຍທີ່ສຸດໃນໂລກ ເປັນໄລຍະເວລາ ຍາວນານ ມາແລ້ວ. ສຳລັບປະຊາກອນ ສປ ຈີນ ຫລຸດລົງນັ້ນ ຍ້ອນອັດຕາການເກີດຫລຸດລົງຈາກຫລາຍປັດໄຈ ສຳຄັນ ໂດຍສະເພາະເລື່ອງຄ່າຄອງຊີບທີ່ສູງຂຶ້ນ, ຈຳນວນແມ່ຍິງ ທີ່ຫັນໄປເຂົ້າສູ່ການເຮັດວຽກຫລາຍຂຶ້ນ ແລະ ຕ້ອງມີການສຶກສາສູງຂຶ້ນ. ຂະນະທີ່ ປະຊາກອນ ອິນເດຍ ຈະມີທ່າອ່ຽງເພີ່ມຂຶ້ນຢ່າງຕໍ່ເນື່ອງໃນຫລາຍປີຕໍ່ໜ້າ.
(ບັນນາທິການຂ່າວ: ຕ່າງປະເທດ)
ຮຽບຮຽງ ຂ່າວໂດຍ: ສະໄຫວ ລາດປາກດີ
