ສະຫາຍ ສິນລະວົງ ຄຸດໄພທູນ ກໍາມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ ພ້ອມດ້ວຍຄະນະ ໄດ້ເຂົ້າຢ້ຽມຂໍ່ານັບ ສະຫາຍ ຫວໍ ວັນ ເຖືອງ, ປະທານປະເທດ ແຫ່ງ ສາທາ ລະນະລັດສັງຄົມນິຍົມ ຫວຽດນາມ ຢູ່ທີ່ສຳນັກງານປະທານປະເທດ ສສ ຫວຽດ ນາມ ໃນວັນທີ 25 ເມສາ 2023.
ໃນການເຂົ້າຢ້ຽມຂໍ່ານັບຄັ້ງນີ້, ການນຳຂັ້ນສູງຂອງສອງຝ່າຍໄດ້ຕີລາຄາສູງ ຕໍ່ການພົວພັນຮ່ວມມືລະຫວ່າງ ສອງພັກ-ສອງລັດ ກໍ່ຄືສອງຊາດ ລາວ-ຫວຽດນາມ ໄລຍະຜ່ານມາ ເຊິ່ງເປັນການປະກອບ ສ່ວນສໍາຄັນເຂົ້າໃນການເພີ່ມພູນຄູນສ້າງສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະປະຊາຊົນສອງຊາດລາວ-ຫວຽດ ນາມ, ພ້ອມນີ້, ທ່ານປະທານປະເທດ ສສ ຫວຽດນາມ ໄດ້ຕີລາຄາສູງຕໍ່ບົດບາດຂອງອົງການແນວໂຮມ ເຊິ່ງເປັນພາກສ່ວນທີ່ສຳຄັນໃນລະບົບການເມືອງຂອງສອງປະເທດ ແລະຈະສະໜັບສະໜູນ ໃຫ້ສອງອົງການແນວໂຮມ ໄດ້ຂະຫຍາຍການພົວພັນຮ່ວມມືລົງສູ່ທ້ອງຖິ່ນຢ່າງທົ່ວເຖິງ.
ໂອກາດນີ້, ປະທານສູນກາງແນວລາວສ້າງຊາດ ໄດ້ລາຍງານກ່ຽວກັບແຜນການເຄື່ອນໄຫວ ຂອງຄະນະຜູ້ແທນ ທີ່ໄດ້ມາຢ້ຽມຢາມ ແລະເຮັດວຽກຢູ່ ສສ ຫວຽດ ນາມ ຢ່າງເປັນທາງການ ລະຫວ່າງວັນທີ 24-28 ເມສາ 2023 ແລະຜົນຂອງການພົບປະສອງຝ່າຍ ລະຫວ່າງ ຄະນະກຳມະການສູນກາງແນວລາວສ້າງຊາດ ກັບຄະນະກຳມະການສູນກາງແນວໂຮມປະເທດຊາດຫວຽດນາມ ໃຫ້ຮັບຊາບ; ພ້ອມນີ້, ໄດ້ສະແດງຄວາມຂອບໃຈ ຕໍ່ຄຳເຫັນອັນຈົບງາມຂອງສະຫາຍປະທານປະເທດ ຫວໍ ວັນ ເຖືອງ ທີ່ມີເນື້ອໃນຊີ້ນຳສຳຄັນຫຼາຍປະການ ຕໍ່ການຮ່ວມມືຂອງສອງອົງການແນວໂຮມ ແລະບັນດາອົງການຄູ່ສັນຍາຮ່ວມມື ໃນສະເພາະໜ້າ ແລະຍາວນານ ຍິນດີຮັບເອົາຄຳເຫັນຂອງ ສະຫາຍ ໄປຈັດຕັ້ງປະຕິບັດໃຫ້ເກີດດອກອອກຜົນ; ພ້ອມທັງກ່າວອວຍພອນສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະປະຊາຊົນສອງຊາດລາວ-ຫວຽດນາມ ຈົ່ງໝັ້ນຄົງຂະໜົງແກ່ນ, ຈະເລີນງອກງາມ ແລະເກີດດອກອອກຜົນຍິ່ງໆຂຶ້ນ.
ພາບ ແລະຂ່າວໂດຍ: ຈິດຕະພົງ ໂພທິລັກ, ບກ: ພ. ບຸບຜາ
