ບົດບາດຂອງຄະນະກຳມາທິການແມ່ນໍ້າຂອງສາກົນ ດ້ານບົດບາດຍິງ-ຊາຍ (ເພື່ອຂ່ຳນັບຮັບຕ້ອນກອງປະຊຸມສຸດຍອດຂອງຄະນະກຳມາທິການແມ່ນ້ຳຂອງສາກົນຄັ້ງທີ 4, ທີ່ນະຄອນຫຼວງວຽງຈັນ ໃນວັນທີ 2-5 ເມສາ 2023) ຄວາມເທົ່າທຽມທາງດ້ານບົດບາດຍິງ-ຊາຍມີຄວາມສຳຄັນຢ່າງຍິ່ງຕໍ່ການພັດທະນາແບບຍືນຍົງຢູ່ອ່າງແມ່ນໍ້າຂອງ. ຍຸດທະສາດການພັດທະນາຄວາມເທົ່າທຽມທາງດ້ານບົດບາດຍິງ-ຊາຍ ໄດ້ຄຳນຶງເຖິງເພດສະພາບທີ່ມີຄວາມສຳຄັນຕໍ່ການເຕີບໂຕທາງດ້ານເສດຖະກິດ, ການຫຼຸດຜ່ອນຄວາມທຸກຍາກ ແລະ ຈຸດປະສົງສ້າງຄວາມສະເໝີພາບ ໂດຍເຮັດໃຫ້ໝັ້ນໃຈໄດ້ວ່າ ທຸກຄົນຈະໄດ້ຮັບຜົນປະໂຫຍດຈາກການພັດທະນາຮ່ວມກັນຢ່າງເທົ່າທຽມ.
ທັງເພດຍິງ ແລະ ເພດຊາຍຕ່າງມີສ່ວນຮ່ວມໃນການພັດທະນາແຫຼ່ງນໍ້າ ແລະ ທັງສອງເພດໄດ້ຮັບຜົນກະທົບໃນຮູບແບບຕ່າງໆ. ເຂດພື້ນທີ່ຊົນນະບົດຂອງອ່າງແມ່ນໍ້າຂອງຕອນລຸ່ມ, ເພດຍິງມີໜ້າທີ່ຮັບຜິດຊອບຫຼັກກ່ຽວກັບນໍ້າ. ການຫຼຸດລົງຂອງເຂົ້າປາອາຫານ ເນື່ອງຈາກນໍ້າ ແລະ ການພັດທະນາທີ່ກ່ຽວຂ້ອງ ສົ່ງຜົນກະທົບຕໍ່ເພດຍິງຫຼາຍຂຶ້ນ. ເນື່ອງຈາກວ່າ, ພວກເຂົາເຈົ້າຈະຕ້ອງຮັບຜິດຊອບໃນການປູກຝັງ ແລະ ການກຽມອາຫານ. ໃນລະດູນໍ້າຖ້ວມ ແລະ ແຫ້ງແລ້ງ, ເພດຍິງ ຍິ່ງມີຄວາມສ່ຽງຫຼາຍຂຶ້ນກວ່າເພດຊາຍ ເນື່ອງຈາກວ່າພວກເຂົາຕ້ອງເພິ່ງພາຊັບພະຍາກອນທຳມະຊາດທີ່ສູງກວ່າ ແລະ ຈາກອຸປະສັກທາງສັງຄົມທີ່ຈໍາກັດຄວາມສາມາດໃນການປັບໂຕຂອງພວກເຂົາເຈົ້າ.
ຈາກສະຖານະການດັ່ງກ່າວ, ອົງການທີ່ກ່ຽວຂ້ອງກັບນໍ້າສ່ວນໃຫຍ່ຈຶ່ງສົ່ງເສີມຄວາມເທົ່າທຽມທາງດ້ານບົດບາດຍິງ-ຊາຍ ແລະ ຫຼາຍອົງກອນກໍໃຫ້ຄວາມສຳຄັນຕໍ່ນະໂຍບາຍດັ່ງກ່າວ. ນະໂຍບາຍຂອງລັດຖະບານ, ການດຳເນີນການທາງດ້ານສາທາລະນະ ແລະ ການເຕີບໂຕທາງດ້ານເສດຖະກິດໃນລະດັບສູງຢ່າງຕໍ່ເນື່ອງ ແລະ ການຫຼຸດຜ່ອນຄວາມທຸກຍາກ ລ້ວນແຕ່ຊ່ວຍຫຼຸດຊ່ອງວ່າງລະຫວ່າງເພດໃນຫຼາຍດ້ານ ເຊັ່ນ: ການເຂົ້າເຖິງການສຶກສາ, ສຸຂະພາບ, ການເຂົ້າເຖິງນໍ້າປະປາ ແລະ ສຸຂະອະນາໄມຕ່າງໆ. ທະນາຄານໂລກ ລະບຸວ່າ ກິດຈະກຳທີ່ຄໍານຶງເຖິງຄວາມເທົ່າທຽມທາງເພດມີທ່າອ່່ຽງທີ່ຈະບັນລຸວັດຖຸປະສົງໄດ້ຫຼາຍກວ່າໂຄງການທີ່ບໍ່ຄໍານຶງເຖິງຄວາມເທົ່າທຽມທາງດ້ານບົດບາດຍິງ-ຊາຍ ແລະ ການສົ່ງເສີມເພດຍິງເປັນຫົວໃຈສຳຄັນຂອງການບັນລຸເປົ້າໝາຍການພັດທະນາແບບຍືນຍົງທັງໝົດ.
ຄໍາໝັ້ນສັນຍາຂອງຄະນະກຳມາທິການແມ່ນໍ້າຂອງ ໃນການຊຸກຍູ້ບົດບາດ-ຍິງຊາຍ ໃນໄລຍະ 2 ທົດສະວັດທີ່ຜ່ານມາ, ໂດຍໄດ້ເນັ້ນໃສ່ຍຸດທະສາດ ແລະ ນະໂຍບາຍດ້ານບົດບາດ-ຍິງຊາຍ ຂອງ ຄມສ ໃນຫົວຂໍ້: ຄໍາໝັ້ນສັນຍາກ່ຽວກັບບົດບາດຍິງ-ຊາຍ ໃນການພັດທະນາຊັບພະຍາກອນນໍ້າຢູ່ອ່າງແມ່ນໍ້າຂອງຕອນລຸ່ມ ຊຶ່ງຖືກສ້າງຂຶ້ນໃນປີ 2020. ການຄໍານຶງເຖິງບົດບາດຍິງ-ຊາຍເປັນເລື່ອງສຳຄັນລະດັບຊາດ ເພື່ອເພີ່ມຜົນໄດ້ຮັບທາງດ້ານການພັດທະນາເສດຖະກິດ ແລະ ສັງຄົມທີ່ເທົ່າທຽມກັນ, ບັນດາປະເທດສະມາຊິກ ຄມສ ຍັງໄດ້ພັດທະນາຍຸດທະສາດ ແລະ ແຜນລະດັບຊາດທາງດ້ານບົດບາດຍິງ-ຊາຍຂອງຕົນ.
ໃນລະດັບອົງກອນ, ຄມສ ໄດ້ສະໜັບສະໜູນການສົ່ງເສີມບົດບາດຍິງ-ຊາຍ ໂດຍມີ: ການນຳເອົາບົດບາດຍິງ-ຊາຍ ເຂົ້າຢູ່ໃນຍຸດທະສາດພັດທະນາອ່າງ ແລະ ແຜນຍຸດທະສາດແມ່ນໍ້າຂອງ, ເພີ່ມທະວີຄວາມອາດສາມາດດ້ານວິຊາການ ແລະ ລະບົບຄວາມຮັບຜິດຊອບຕໍ່ບົດບາດຍິງ-ຊາຍ ເຂົ້າໃນວຽກງານວິຊາການຂອງ ຄມສ, ສົ່ງເສີມວັດທະນະທຳຂອງອົງກອນທີ່ອ່ອນໄຫວຕໍ່ບົດບາດຍິງ-ຊາຍ ແລະ ສະພາບແວດລ້ອມໃນການເຮັດວຽກ,ສົ່ງເສີມການມີສ່ວນຮ່ວມຂອງພາກສ່ວນທີ່ກ່ຽວຂ້ອງ ແລະ ການຖ່າຍທອດບົດບາດຍິງ-ຊາຍ ໂດຍຜ່ານການສຳມະນາ ແລະ ການຝຶກອົບຮົມເລື່ອງບົດບາດຍິງ-ຊາຍ, ພັດທະນາແນວທາງທີ່ກ່ຽວຂ້ອງກັບບົດບາດຍິງ-ຊາຍ, ຊຸດເຄື່ອງມື ແລະ ເຄື່ອງມືທີ່ສົ່ງເສີມຂີດຄວາມສາມາດທາງເພດ.
ໃນລະດັບປະເທດ, ຄມສ ໄດ້ສະໜັບສະໜູນອົງການແຫ່ງຊາດຢ່າງຕັ້ງໜ້າ ໃນການຊຸກຍູ້ ແລະ ສົ່ງເສີມ ບົດບາດຍິງ-ຊາດ ໃນການລິເລີ່ມທີ່ກ່ຽວຂ້ອງກັບນໍ້າ, ໃນການພັດທະນາແຜນປະຕິບັດງານ ບົດບາດຍິງ-ຊາຍ ສະເພາະຂອງປະເທດ ແລະ ການສ້າງຂີດຄວາມສາມາດຕ່າງໆ.
