ຕາມຂ່າວຈາກວິທະຍຸສາກົນຫວຽດນາມ, ທ່ານ ບຸ່ຍ ແທັງເຊີນ, ລັດຖະມົນຕີກະຊວງການຕ່າງປະເທດ ສສ ຫວຽດນາມ ໄດ້ໂອ້ລົມກັບ ທ່ານ ຈິນກາງ, ລັດຖະມົນຕີກະຊວງການຕ່າງປະເທດ ສປ ຈີນ ຜ່ານທາງໂທລະສັບ ເມື່ອບໍ່ດົນມານີ້ໂດຍທັງສອງຝ່າຍ ໄດ້ແລກປ່ຽນ ກ່ຽວກັບ ທິດທາງ ຊຸກຍູ້ ການຮ່ວມມືໃນໄລຍະຈະມາເຖິງ ແລະ ຕົກລົງເຫັນດີເພີ່ມທະວີການ ແລກປ່ຽນຄະນະຜູ້ແທນຂັ້ນສູງ ແລະ ທຸກຂັ້ນ ເນື່ອງໃນໂອກາດສະເຫລີມສະຫລອງວັນສ້າງຕັ້ງການພົວພັນຄູ່ຮ່ວມມື ຍຸດທະ ສາດ ຮອບດ້ານ ຄົບຮອບ 15 ປີ(2008 – 2023); ສືບຕໍ່ຍູ້ແຮງ ແລະ ຍົກສູງ ປະສິດທິຜົນ ການຮ່ວມມື ແບບຕ່າງຝ່າຍ ຕ່າງມີຜົນປະໂຫຍດ ໃນບັນດາ ຂົງເຂດ. ຈາກນັ້ນ ທ່ານ ຈິນກາງ ກ່າວຢັ້ງຢືນວ່າ: ສສ ຫວຽດນາມ ແມ່ນຄູ່ ຮ່ວມມື ສຳຄັນຂອງ ສປ ຈີນ ໃນຫລາຍຂົງເຂດ ແລະ ສອງຝ່າຍສືບຕໍ່ເປີດກວ້າງ ແລະ ເຮັດໃຫ້ ການຮ່ວມມືດ້ານເສດຖະກິດ-ການຄ້າ, ການລົງທຶນເລິກເຊິ່ງຂຶ້ນຕື່ມອີກ, ເຊື່ອມຕໍ່ ຍຸດທະສາດ, ການພົວພັນ ແລກປ່ຽນ ວັດທະນະທຳ, ການສຶກສາ, ການທ່ອງທ່ຽວ; ສົມທົບກັນ ຢ່າງແໜ້ນແຟ້ນ ບົນເວທີປາໄສ ພາກພື້ນ ແລະ ສາກົນ.ສຳລັບ ກ່ຽວກັບ ບັນຫາ ທະເລ ຈີນໃຕ້, ທັງສອງຝ່າຍ ໄດ້ຕົກລົງ ເຫັນດີ ເປັນເອກະພາບ ຈະສືບຕໍ່ ປະຕິບັດ ຂໍ້ຕົກລົງ ສະບັບຕ່າງໆ ແລະ ຄວາມຮັບຮູ້ລວມ ຂອງການນຳ ຂັ້ນສູງ ຂອງ ສອງພັກ, ສອງລັດ ຢ່າງເຂັ້ມງວດ ແລະ ຮັກສາສະພາບແວດລ້ອມແຫ່ງສັນຕິພາບ, ສະຖຽນລະພາບຢູ່ພາກພື້ນ.
(ບັນນາທິການຂ່າວ: ຕ່າງປະເທດ)
ຮຽບຮຽງຂ່າວໂດຍ: ສະໄຫວ ລາດປາກດີ
