ສປຈີນ-ອິຕາລີ ຊຸກຍູ້ຮ່ວມມືດ້ານການບິນ

ສຳນັກຂ່າວ ຊິນຮວາຂອງ ສປຈີນ, ສາຍການບິນ ແອຣໄຊນ່າ (Air China) ໄດ້ກັບຄືນມາເປີດຖ້ຽວບິນ ໂດຍກົງ ລະຫວ່າງ ນະຄອນຫລວງ ໂຣມ ຂອງ ອິຕາລີ ແລະ ນະຄອນຫລວງ ປັກກິ່ງ ຂອງ ຈີນ ຫລັງຈາກ ໄດ້ຢຸດຕິ ການບໍລິການ ເປັນເວລາ 3 ປີ ຜ່ານມາ ນັບຕັ້ງແຕ່ ເກີດການແພ່ລະບາດ ຂອງ ພະຍາດໂຄວິດ-19, ໂດຍມີການ ກຳນົດ ໃຫ້ບໍລິການ ໄປ-ກັບ ຈຳນວນ 4 ຖ້ຽວຕໍ່ອາທິດ. ໂດຍເຮືອບິນ ແອຣບັສ ເອ 350-900 (Airbus A350-900) ລະຫວ່າງ ສະໜາມບິນ ຢານຟິອູມິຊີໂນ ຂອງ ນະຄອນຫລວງໂຣມ ແລະ ສະໜາມບິນ ສາກົນ ນະຄອນຫລວງ ປັກກິ່ງ ໃນທຸກວັນຈັນ, ອັງຄານ, ພະຫັດ ແລະ ເສົາ. ທັງນີ້, ສະຖາບັນສະຖິຕິແຫ່ງຊາດ ອິຕາລີ ໃຫ້ຮູ້ວ່າ ອິຕາລີຕ້ອນຮັບ ນັກທ່ອງທ່ຽວຊາວຈີນ ປະມານ 5,36 ລ້ານເທື່ອຄົນ ໃນປີ 2019 ເຮັດໃຫ້ ອິຕາລີ ຖືເປັນໜຶ່ງ ໃນກຸ່ມປະເທດ ເອີຣົບ ທີ່ມີ ນັກທ່ອງທ່ຽວ ຊາວຈີນ ໄປຢ້ຽມຢາມ ຫລາຍທີ່ສຸດ ໃນປີດັ່ງກ່າວ.