ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ຈັດປາຖະກະຖາວັນສຳຄັນຂອງຊາດ ເປັນຕົ້ນ ວັນສ້າງຕັ້ງພັກປະຊາຊົນລາວ ຄົບຮອບ 68 ປີ, ວັນນັກຮົບເສຍອົງຄະ ແລະ ເສຍສະຫລະຊີວິດເພື່ອປະເທດຊາດ ຄົບຮອບ 77 ປີ ໃນວັນທີ 27 ມີນາ 2023 ໂດຍການປາຖະກະ ຖາຂອງ ທ່ານ ວັນສີ ກົວມົວ ຮອງລັດຖະມົນຕີກະຊວງ ຖວທ, ມີບັນດາຮອງລັດຖະມົນຕີ, ພະນັກ ງານຫລັກແຫລ່ງ, ສະມາຊິກພັກ, ພະນັກງານ-ລັດຖະກອນ ອ້ອມຂ້າງກະຊວງເຂົ້າຮ່ວມ.
ໃນໂອກາດດັ່ງກ່າວ, ທ່ານ ວັນສີ ກົວມົວ ໄດ້ຍົກໃຫ້ເຫັນເຖິງ ຄວາມໝາຍຄວາມສຳຄັນ, ປະ ຫວັດຄວາມເປັນມາ ແລະ ພາລະກິດອັນພົ້ນເດັ່ນຂອງພັກປະຊາຊົນປະຕິວັດລາວ ຕະຫລອດໄລຍະ 68 ປີ ຜ່ານມາ ໂດຍມີບາງຕອນວ່າ: ນັບແຕ່ປີ 1975 ເປັນຕົ້ນມາ ສປປ ລາວ ໄດ້ກ້າວເຂົ້າສູ່ໄລຍະໃໝ່ຂອງການປະຕິວັດ, ພັກປະຊາຊົນປະຕິວັດລາວ ໄດ້ກາຍເປັນພັກກຳອຳນາດ ຊຶ່ງມີລັດປະຊາທິປະໄຕປະຊາຊົນ ເປັນເຄື່ອງມືອັນແຫລມຄົມ ເພື່ອຄຸ້ມຄອງສັງຄົມ. ໃນເງື່ອນໄຂທີ່ເປັນພັກກຳອຳນາດ ທີ່ຕັ້ງ ແລະ ບົດບາດຂອງພັກ ໄດ້ມີການປ່ຽນແປງຄື: ພັກ ຍັງເປັນກອງນຳໜ້າທາງການເມືອງຂອງຊົນຊັ້ນກຳ ມະກອນ ແລະ ທັງເປັນຜູ້ນຳພາສັງຄົມ, ຄວາມຮັບຜິດຊອບຂອງພັກກໍ່ເພີ່ມຂຶ້ນສູງກວ່າເກົ່າ, ພັກມີຄວາມຮັບຜິດຊອບຕໍ່ຊາຕາກຳຂອງຊາດຢ່າງຮອບດ້ານ ຄື: ພັກໄດ້ກໍານົດແນວທາງໜ້າທີ່ປ້ອງກັນຊາດ-ປ້ອງກັນຄວາມສະຫງົບ ເຊິ່ງເປັນວຽກງານທີ່ສຳຄັນ, ປຸກລະດົມປວງຊົນທັງຊາດເຮັດວຽກປ້ອງກັນ ຊາດ-ປ້ອງກັນຄວາມສະຫງົບ ສາມາດປົກປັກຮັກສາເອກະລາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງປະເທດໄວ້ໃຫ້ໝັ້ນຄົງ; ພັກໄດ້ເອົາໃຈໃສ່ນໍາພາແກ້ໄຂ ແລະ ຟື້ນຟູເສດຖະກິດ-ສັງຄົມ ໂດຍສຸມໃສ່ແກ້ໄຂສິ່ງເສດເຫລືອຂອງສົງຄາມ ກໍຄື ລະບອບສັງຄົມເກົ່າທີ່ປະໄວ້ ແລະ ຟື້ນຟູຊີວິດການເປັນຢູ່ຂອງປະຊາຊົນ, ປັບປຸງວຽກງານວັດທະນະທຳ-ສັງຄົມ ແລະ ປັບປຸງວຽກງານເສດຖະກິດ, ສືຶບຕໍ່ນຳພາຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ I (1981-1985) ໃຫ້ບັນລຸຕາມຄາດໝາຍ; ພັກໄດ້ກໍານົດຍຸດທະສາດ ແລະ ຍຸດໂທບາຍດ້ານການພົວພັນຕ່າງປະເທດໃນແຕ່ລະໄລຍະຢ່າງຖືກຕ້ອງ, ໄດ້ນຳພາ-ຊີ້ນຳການດຳເນີນນະໂຍບາຍຕ່າງປະເທດຢ່າງສອດຄ່ອງ ເຮັດໃຫ້ປະເທດເຮົາມີເພື່ອນມິດທັງຢູ່ໃກ້ ແລະ ໄກ ນັບມື້ນັບຫລາຍ, ບົດບາດຂອງປະເທດເຮົາໃນເວທີສາກົນ ກໍ່ໄດ້ຮັບການເຊີດຊູນັບມື້ນັບສູງຂຶ້ນ; ພັກໄດ້ເປັນເຈົ້າການລິເລີ່ມນໍາພາການປ່ຽນແປງໃໝ່ຢ່າງຮອບດ້ານ ແລະ ມີຫລັກການ, ໄດ້ຮັບຜົນສຳເລັດອັນສຳຄັນຫລາຍປະການ ທັງສ້າງປະຖົມປັດໄຈ ເພື່ອກ້າວຂຶ້ນສັງຄົມນິຍົມເທື່ອລະກ້າວ.
ໂອກາດນີ້, ທ່ານ ວັນສີ ກົວມົວ ໄດ້ໃຫ້ກຽດມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2022 ໃຫ້ແຕ່ລະໜ່ວຍພັກອ້ອມຂ້າງກະຊວງ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ ຕື່ມອີກ.
ຂ່າວ: ສົມຫວັງ
ພາບ: ຂັນໄຊ
