ງານເທສະການອາຫານລີງໄດ້ເປີດຂຶ້ນຢ່າງເປັນທາງການທາງການ ໃນຕອນເຊົ້າວັນທີ 24 ມີນາ 2023 ທີ່ດົງລີງ,ບ້ານດົງເມືອງ ເມືອງຈຳພອນ ແຂວງສະຫວັນນະເຂດ. ໂດຍການໃຫ້ກຽດເຂົ້າຮ່ວມ ຂອງທ່ານ ນາງ ຫຼິງທອງ ແສງຕາວັນ ຮອງເຈົ້າແຂວງສະຫວັນນະເຂດ,ທ່ານ ຄຳວິໃສ ຜຸຍຍະວົງ ຫົວໜ້າຄະນະໂຄສະນາອົບຮົມແຂວງ,ທ່ານ ປອ ພູລຳພອນ ສີຫາວົງ ເຈົ້າເມືອງຈຳພອນ,ທ່ານ ໂພສີສ້ອຍ ກຸທິລາດ ຫົວໜ້າພະແນກຖະແຫຼງຂ່າວ,ວັດທະນະທຳ ແລະ ທ່ອງທ່ຽວແຂວງ,ບັນດາທ່ານການນຳຂອງແຂວງ,ຂອງເມືອງ ພ້ອມດ້ວຍມວນຊົນ,ນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າຮ່ວມຢ່າງຫຼວງຫຼາຍ.
ກ່ອນຈະເຂົ້າສູ່ພິທີເປີດງານຢ່າງເປັນທາງການນັ້ນ ບັນດາແຂກ ແລະ ນັກທ່ອງທ່ຽວແມ່ນໄດ້ຮັບຊົມການສະແດງສິລະປະວັນນະຄະດີ ເປັນບົດຟ້ອນ,ບົດເພງ,ບົດລຳ, ຈາກສິລະປິນຂອງແຂວງ,ຂອງເມືອງ ຂອງບ້ານ,ຂອງໂຮງຮຽນ ແລະ ກິດຈະກຳການທ່ອງທ່ຽວອີກຫຼາຍໆຢ່າງ ທີ່ສະແດງໃຫ້ເຫັນເຖິງວິຖີການດຳລົງຊີວິດຂອງປະຊາຊົນຊາວເມືອງຈຳພອນ ເຊິ່ງເປັນເມືອງອູ່ເຂົ້າອູ່ປາຂອງແຂວງສະຫວັນນະເຂດ ແລະ ເປັນເມືອງທີ່ມີແຫຼ່ງທ່ອງທ່ຽວທາງດ້ານທຳມະຊາດ,ທາງດ້ານປະຫວັດສາດ ແລະ ທາງດ້ານວັດທະນະທຳຫຼາຍແຫ່ງ. ການຈັດງານ ເທສະການ ອາຫານລີງໃນຄັ້ງນີ້ແມ່ນເປັນຄັ້ງທໍາອິດ ແລະ ໜຶ່ງໃນກິດຈະກໍາ ທີ່ນອນຢູ່ໃນແຜນຟື້ນຟູ ແລະ ສົ່ງເສີມການທ່ອງທ່ຽວຂອງແຂວງປີ 2022 – 2023 ຫຼັງຈາກຖືກຜົນກະທົບການແຜ່ລະບາດພະຍາດໂຄວິດ 19 ໂດຍຈຸດປະສົງ ເພື່ອເປັນການສົ່ງເສີມການທ່ອງທ່ຽວທາງດ້ານທໍາມະຊາດດົງລີງ ທີ່ຕິດພັນກັບການທ່ອງທ່ຽວວັດທະນະທໍາ – ປະຫວັດສາດ ເຊື່ອມຕໍ່ວົງຈອນການທ່ອງທ່ຽວເມືອງຈໍາພອນ ພ້ອມທັງເປັນການອະນຸລັກຮັກສາວັດທະນະທໍາ ແລະ ວິຖີການດໍາລົງຊີວິດຂອງຊຸມຊົນຄົນເມືອງຈໍາພອນ ທີ່ມີຄຸນຄ່າ ແລະ ເປັນເອກະລັກ ໃຫ້ເປັນມໍລະດົກທ້ອງຖິ່ນ ແລະ ດຶງດູດນັກທ່ອງທ່ຽວ ທາງພາຍໃນ ແລະ ຕ່າງປະເທດເຂົ້າມາແຂວງສະຫວັນນະເຂດ ພ້ອມທັງເປັນການກະຕຸກຊຸກຍູ້ ເຮັດໃຫ້ທຸລະກິດທ່ອງທ່ຽວ ມີລາຍຮັບ ແລະ ເຕີບໃຫຍ່ຂະຫຍາຍຕົວເປັນກ້າວໆ ແນໃສ່ພັດທະນາ ແລະ ສົ່ງເສີມ ເມືອງຈໍາພອນໃຫ້ກາຍເປັນຈຸດໝາຍປາຍທາງຂອງນັກທ່ອງທ່ຽວ ແລະ ເປັນເມືອງທ່ອງທ່ຽວ ນີ້ແມ່ນການລາຍງານ ຂອງ ທ່ານ ປອ ພູລຳພອນ ສີຫາວົງ ເຈົ້າເມືອງຈຳພອນ
ຈາກນັ້ນ ທ່ານ ນາງ ຫຼິງທອງ ແສງຕາວັນ ຮອງເຈົ້າແຂວງສະຫວັນນະເຂດ ທັງເປັນປະທານຈັດງານ ກໍ່ໄດ້ກ່າວເປີດງານຢ່າງເປັນທາງການວ່າ: ຈຸດປະສົງ ໃນການຈັດງານຄັ້ງນີ້ ແມ່ນແນໃສ່ການຟື້ນຟູ ແລະ ສົ່ງເສີມການທ່ອງທ່ຽວ ພ້ອມທັງເປັນການຕຸ້ນເສດຖະກິດດ້ານການທ່ອງທ່ຽວຂອງແຂວງສະຫວັນນະເຂດ ເວົ້າລວມ, ເວົ້າສະເພາະການທ່ອງທ່ຽວເມືອງຈໍາພອນ ໃຫ້ມີທ່າອ່ຽງ ຂະຫຍາຍຕົວຂື້ນເທື່ອລະກ້າວ ແລະ ພັດທະນາ, ສົ່ງເສີມ ເມືອງຈໍາພອນ ໃຫ້ກາຍເປັນເມືອງທ່ອງທ່ຽວທາງດ້ານ ທໍາມະຊາດ,ປະຫວັດສາດ,ວັດທະນະທໍາ, ກະສິກໍາ ຕິດພັນກັບການບໍລິການທ່ອງທ່ຽວ ທີ່ມີຄຸນນະພາບ
ນອກຈາກນີ້ ນັກທ່ອງທ່ຽວ ແລະ ແຂກທີ່ເຂົ້າຮ່ວມ ກໍ່ໄດ້ພ້ອມກັນຈັດຕັ້ງຂະບວນແຫ່ກວຽນໝາກໄມ້ ໃຫ້ອາຫານລີງ ແລະ ທ່ອງທ່ຽວຕາມວົງຈອນທ່ອງທ່ຽວຂອງເມືອງເຊັ່ນ ຊົມທິວທັດທີ່ສວຍງາມຂອງອ່າງນໍ້າສຸຍ ໃຫ້ອາຫານລີງ ແລະ ທ່ຽວຊົມຫໍໄຕປີດົກທີ່ບ້ານໜອງລຳຈັນຕື່ມອີກ.
ຂ່າວ-ພາບ: ອັກສອນສິນ ພົມມະຈັນ
