ຂ່າວຕ່າງປະເທດລາຍງານ ເມື່ອທ້າຍອາທິດຜ່ານມາ, ມາເລເຊຍ ໄດ້ເປີດເຜີຍໂຄງການການທ່ອງທ່ຽວໃນຮູບແບບການແພດ ໂດຍມີໂຮງໝໍຂັ້ນນຳເຂົ້າຮ່ວມຈຳນວນ 4 ແຫ່ງ ເພື່ອສົ່ງເສີມການຟື້ນຕົວຂອງອຸດສາຫະກຳການແພດ.
ສະພາການທ່ອງທ່ຽວໃນຮູບແບບສຸຂະພາບຂອງມາເລເຊຍ ໄດ້ອອກຖະແຫຼງການໂດຍລະບຸວ່າ ກຸ່ມໂຮງໝໍຂັ້ນນຳໄດ້ເພີ່ມຄວາມພະຍາຍາມມອບການບໍລິການແບບຄົບວົງຈອນດີທີ່ສຸດໃຫ້ແກ່ຄົນເຈັບ ເພື່ອເນັ້ນຢ້ຳເຖິງສະຖານະຂອງມາເລເຊຍ ໃນຖານະເປັນຈຸດໝາຍປາຍທາງທີ່ປອດໄພ ແລະ ເຊື່ອຖືໄດ້ສຳລັບບໍລິການສຸຂະພາບ ອີກທັງຍັງມີສ່ວນຊຸກຍູ້ໃຫ້ໂຮງໝໍໃນມາເລເຊຍໄດ້ຮັບການຍອມຮັບໃນລະດັບສາກົນ. ການເຂົ້າຮ່ວມຂອງໂຮງໝໍທັງ 4 ແຫ່ງໄດ້ແກ່ ສະຖາບັນຫົວໃຈແຫ່ງຊາດ, ໂຮງໝໍໄອສແລນ, ສູນການແພດມະໂກຕາ ແລະ ສູນການແພດສຸບັງຈາຢາ ສະທ້ອນໃຫ້ເຫັນເຖິງຄວາມກ້າວໜ້າຄັ້ງສຳຄັນສຳລັບອຸດສາຫະກຳການເບິ່ງແຍງສຸຂະພາບຂອງມາເລເຊຍໃນການບັນລຸເປົ້າໝາຍການເປັນຈຸດໝາຍການທ່ອງທ່ຽວໃນຮູບແບບການແພດທີ່ສຳຄັນພາຍໃນປີ 2025.
ທັງນີ້, ໂຄງການດັ່ງກ່າວຈະຊ່ວຍເລັ່ງການຟື້ນຟູ ແລະ ການເຕີບໂຕຂອງອຸດສາຫະກຳການທ່ອງທ່ຽວໃນຮູບແບບສຸຂະພາບ ໂດຍຕໍ່ຍອດມາຈາກການເຕີບໂຕທາງບວກເມື່ອປີ 2022 ຊຶ່ງອຸດສາຫະກຳນີ້ສາມາດສ້າງລາຍໄດ້ຫຼາຍກວ່າ 1.300 ລ້ານຣິງກິດ ຄິດເປັນ 76% ຂອງຜົນການດຳເນີນງານໃນໄລຍະກ່ອນເກີດການແຜ່ລະບາດຂອງພະຍາດໂຄວິດ-19 ທີ່ 1.700 ລ້ານຣິງກິດ ໃນປີ 2019.
