ສຳນັກຂ່າວຣອຍເຕີ, ບັນດາບໍລິສັດແຖວໜ້າຂອງຍີ່ປຸ່ນຕົກລົງເພີ່ມຄ່າຈ້າງຫລາຍທີ່ສຸດໃນຮອບ 25 ປີ ພາຍຫລັງການເຈລະຈາດ້ານແຮງງານປະຈຳປີປິດລົງແລ້ວເມື່ອບໍ່ດົນມານີ້. ຂະນະທີ່ ທ່ານ ຟູມິໂອ ຄີຊິດາ (Fumio Kishida), ນາຍົກລັດຖະມົນຕີຍີ່ປຸ່ນ ຮຽກຮ້ອງໃຫ້ເພີ່ມເງິນເດືອນເພື່ອຊົດເຊີຍຄ່າຄອງຊີບທີ່ສູງຂຶ້ນ ຫລັງຈາກເງິນເດືອນຂອງແຮງງານໃນປະເທດ ບໍ່ມີການປັບຂຶ້ນນັບແຕ່ທ້າຍປີ 1990 ອີກທັງ ປັດຈຸບັນຍັງຢູ່ໃນລະດັບຕ່ຳກວ່າຄ່າສະເລ່ຍຂອງກຸ່ມປະເທດທີ່ຮັ່ງມີ ໃນອົງການ ເພື່ອການຮ່ວມມືທາງເສດຖະກິດ ແລະ ການພັດທະນາ (OECD).
ດັ່ງນັ້ນ ທ່ານ FumioKishida ຮຽກຮ້ອງໃຫ້ມີການຈ່າຍເງິນຄ່າຈ້າງສູງຂຶ້ນ ເນື່ອງຈາກສະກຸນເງິນເຢັນອ່ອນຄ່າ ແລະ ລາຄາສິນຄ້າແພງຂຶ້ນຊຸກຍູ້ໃຫ້ຕົ້ນທຶນການນຳເຂົ້າ ລວມທັງເຮັດໃຫ້ອັດຕາເງິນເຟີ້ເພີ່ມຂຶ້ນສູ່ລະດັບສູງສຸດໃນຮອບ 4 ທົດສະວັດຜ່ານມາ. ນອກນີ້ຍັງຕັ້ງເປົ້າປັບຂຶ້ນຄ່າແຮງງານ ຂັ້ນຕ່ຳທົ່ວປະເທດໃນຕໍ່ໜ້າ.
(ບັນນາທິການຂ່າວ: ຕ່າງປະເທດ)
ຮຽບຮຽງຂ່າວໂດຍ: ສະໄຫວ ລາດປາກດີ
