ຕາມຂ່າວຈາກວິທະຍຸສາກົນຫວຽດນາມ, ສປປ ລາວ ຈະເປັນເຈົ້າພາບຈັດກອງປະຊຸມຂັ້ນສູງຄະນະກຳມາທິການແມ່ຂອງ ສາກົນ (MRC) ແລະ ກອງປະຊຸມສາກົນ MRC ຄັ້ງທີ 4 ຢູ່ນະຄອນຫລວງວຽງຈັນ ໃນລະຫວ່າງ ວັນທີ 2–5 ເມສານີ້ ໂດຍມີ ບັນດາຜູ້ນຳລັດຖະບານ ທີ່ມາຈາກ 4 ປະເທດ ສະມາຊິກ ລວມມີ: ໄທ, ສປປ ລາວ, ກຳປູເຈຍ ແລະ ສສ ຫວຽດນາມ ພ້ອມທັງບັນດາການນຳທີ່ມາຈາກບັນດາປະເທດຄູ່ເຈລະຈາພ້ອມກັບ ບັນດາຄູ່ຮ່ວມມືພັດທະນາເພື່ອຕີລາຄາ ກ່ຽວກັບ ສະພາບການຮ່ວມມືແມ່ຂອງ ກໍ່ຄືຍົກອອກບັນດາການກຳນົດທິດຍຸດທະສາດ ແລະ ເພື່ອດຶງດູດການເຂົ້າຮ່ວມ ຂອງບັນດາ ນັກຊ່ຽວຊານພາກພື້ນ ແລະ ທົ່ວໂລກ ທີ່ມາຈາກຫລາຍຂົງເຂດຄື: ນ້ຳ ແລະ ບັນດາແຫລ່ງຊັບພະຍາກອນທຳມະຊາດທີ່ກ່ຽວຂ້ອງ, ພະລັງງານ, ທັນຍາຫານ, ຄົມມະນາຄົມ, ເພື່ອປຶກສາຫາລື ກ່ຽວກັບບັນດາຂໍ້ມູນຂ່າວຫລ້າສຸດ, ບັນດາມາດຕະການປະດິດຄິດສ້າງດີທີ່ສຸດກ່ຽວຂ້ອງເຖິງແມ່ນ້ຳຂອງ ແລະ ບັນດາຂົງເຂດແມ່ນ້ຳອື່ນໆ ອີກ.
(ບັນນາທິການຂ່າວ: ຕ່າງປະເທດ)
ຮຽບຮຽງຂ່າວໂດຍ: ສະໄຫວ ລາດປາກດີ
