ຕາມຂ່າວຈາກ ວິທະຍຸ ສາກົນ ແຫ່ງ ສປ ຈີນ ວັນທີ 7 ມີນານີ້, ອົງການ ພາສີ ຂອງ ສປ ຈີນ ແຈ້ງໃຫ້ຮູ້ວ່າ: ໄລຍະ 2 ເດືອນ ຜ່ານມານີ້, ຍອດມູນຄ່າ ຂາເຂົ້າ- ຂາອອກ ຂອງສປ ຈີນ ມີເຖິງ 6,180 ຕື້ຢວນ, ໃນນັ້ນ ການສົ່ງອອກ ສິນຄ້າ ໄດ້ສ້າງສະຖິຕິ ສູງສຸດ ເມື່ອທຽບໃສ່ ໄລຍະດຽວກັນ ໃນປະຫວັດສາດ, ດັ່ງນັ້ນ ການຄ້າ ກັບຕ່າງ ປະເທດ ຂອງ ສປ ຈີນ ມີສະ ພາບຄວາມໝັ້ນທຽງ ໃນການເລີ່ມຕົ້ນ. ຂະນະທີ່ ສປ ຈີນ ໄດ້ສົ່ງອອກ ສິນ ຄ້າ ຕໍ່ອາຊຽນ ຄິດເປັນມູນຄ່າ 570 ຕື້ຢວນ, ເພີ່ມຂຶ້ນ 17,9% ເມື່ອທຽບ ໃສ່ ໄລຍະດຽວກັນ ຂອງປີ 2022. ອາຊຽນ ສືບຕໍ່ ເປັນຄູ່ ການຄ້າໃຫຍ່ ແຖວໜ້າ ຂອງ ສປ ຈີນ ກວມຍອດມູນຄ່າ ການຄ້າ ກັບຕ່າງປະເທດ ຂອງ ສປ ຈີນ ເຖິງ 15,4%.ນອກນີ້, ມູນຄ່າ ຂາເຂົ້າ-ຂາອອກ ຕໍ່ປະເທດ ຢູ່ລຽບຕາມ “ໜຶ່ງ ແລວ ໜຶ່ງເສັ້ນທາງ” ມີເຖິງ 2,120 ຕື້ຢວນ, ເພີ່ມຂຶ້ນ 10,1% ເມື່ອທຽບໃສ່ ໄລຍະດຽວກັນ ຂອງປີ 2022. ຍອດມູນຄ່າ ຂາເຂົ້າ-ຂາອອກ ຕໍ່ປະເທດ ສະ ມາຊິກ ສັນຍາ ການພົວພັນ ຄູ່ຮ່ວມ ເສດຖະກິດ ຮອບດ້ານ ໃນພາກພື້ນ (RCEP) ອື່ນໆ ມີເຖິງ 1,910 ຕື້ຢວນ, ເພີ່ມຂຶ້ນ 3,1% ເມື່ອທຽບໃສ່ ປີຜ່ານມາ./.
(ບັນນາທິການຂ່າວ: ຕ່າງປະເທດ), ຮຽບຮຽງຂ່າວໂດຍ: ສະໄຫວ ລາດປາກດີ
