ຕາມຂ່າວຈາກນະຄອນຫລວງມະນິລາ, ສະພາແຫ່ງຊາດຟີລິບປິນ ໄດ້ໃຫ້ສັດຕະຍາບັນຕໍ່ສັນຍາຄູ່ຮ່ວມມືເສດຖະກິດພາກພື້ນ (RCEP) ເມື່ອດົນມານີ້ ຫລັງຈາກກະຊວງເສດຖະກິດຟີລິບປິນ ຕັ້ງຄວາມຫວັງວ່າ: ຈະຊ່ວຍເພີ່ມຄວາມສະດວກໃນການນຳເຂົ້າສິນຄ້າກະສິກຳເພື່ອຫລຸດຜ່ອນວິກິດການເງິນເຟີ້ ເຊິ່ງສະຖານະການປະຈຸບັນຍັງຄົງເປັນສະຖິຕິສູງສຸດໃນຮອບ 14 ປີ. ປັດຈຸບັນອາເຊັບ (RCEP) ມີສະມາຊິກ 15 ປະເທດ ປະກອບດ້ວຍສະມາຊິກສະມາຄົມປະຊາຊາດແຫ່ງອາຊີຕາເວັນອອກສ່ຽງໃຕ້ (ອາຊຽນ) 10 ປະເທດ ແລະ ຄູ່ເຈລະຈາອີກ 5 ປະເທດ ໄດ້ແກ່ ສປ ຈີນ, ຍີ່ປຸ່ນ, ສ.ເກົາຫລີ, ອົດສະຕຣາລີ ແລະ ນູແວນເຊລັງ. ອາເຊັບ (RCEP) ຖືເປັນຂໍ້ຕົກລົງການຄ້າເສລີ (FTA) ຂະໜາດໃຫຍ່ທີ່ສຸດໃນໂລກເນື່ອງຈາກມູນຄ່າ GDP ຂອງສະມາຊິກອາເຊັບ ລວມກັນກວມເອົາ 1 ໃນ 3 ຂອງໂລກດ້ວຍມູນຄ່າປະມານ 26,2 ພັນຕື້ໂດລາສະຫະລັດ ກວມເອົາ ປະຊາກອນ 2.200 ລ້ານຄົນ ຫລື 1 ໃນ 3 ຂອງປະຊາກອນໂລກ ແລະ ຍັງເປັນ FTA ສະບັບທໍາອິດໃນປະຫວັດສາດ ທີ່ໄດ້ຮັບການລົງນາມ ໂດຍ ສປ ຈີນ, ຍີ່ປຸ່ນ ແລະ ສ.ເກົາຫລີ ຮ່ວມລົງນາມພ້ອມກັນຕັ້ງແຕ່ຕົ້ນ.
(ບັນນາທິການຂ່າວ: ຕ່າງປະເທດ)
ຮຽບຮຽງຂ່າວໂດຍ: ສະໄຫວ ລາດປາກດີ
