ຕາມຂ່າວຈາກວິທະຍຸສາກົນ ແຫ່ງ ສປ ຈີນ ເມື່ອບໍ່ດົນມານີ້ີ້ເວັບໄຊລັດຖະບານໄທ ແຈ້ງຂ່າວວ່າ: ລັດຖະບານໄທ ໄດ້ອະນຸມັດ ຂໍ້ສະເໜີຂອງກະຊວງການຄ້າໄທ ຈະເລີ່ມຕົ້ນຂະບວນການດຳເນີນການເຈລະຈາສັນຍາການຄ້າເສລີກັບສະຫະພາບເອີຣົບ (ອີຢູ) ຄືນໃໝ່ ເນື່ອງຈາກອີຢູ ແມ່ນເຂດເສດຖະກິດຂະໜາດໃຫຍ່ທີ່ມີພວມບົ່ມຊ້ອນ, ການດຳເນີນການເຈລະຈາສັນຍາ ການຄ້າເສລີ ກັບອີຢູ ຄືນໃໝ່ແມ່ນວຽກງານອັນສຳຄັນທີ່ຄວນເລັ່ງຈັດຕັ້ງປະຕິບັດ, ເຊິ່ງມີຜົນດີຕໍ່ການຊຸກຍູ້ຜົນປະໂຫຍດລວມຂອງໄທ, ເພີ່ມທະວີໂອກາດດ້ານການຄ້າ ແລະ ການລົງທຶນຂອງໄທ. ສຳລັບອີຢູ ແມ່ນຄູ່ການຄ້າໃຫຍ່ອັນດັບ 4 ຂອງໄທ, ປັດຈຸບັນ, ຜະລິດຕະພັນທີ່ໄທສົ່ງອອກໄປອີຢູ ຕົ້ນຕໍ ລວມມີ: ອຸປະກອນ ແລະ ເຄື່ອງອາໄຫລ່ຄອມພິວເຕີ, ເພັດນິນຈິນດາ, ແອເຢັນ ແລະ ເຄື່ອງອາໄຫລ່ແອເຢັນ, ຜະລິດຕະພັນຢາງພາລາ, ອາຫານ ແລະ ອື່ນໆ ສ່ວນຜະລິດຕະພັນທີ່ໄທນຳເຂົ້າຈາກອີຢູ ຕົ້ນຕໍແມ່ນເຄື່ອງຈັກ ແລະ ເຄື່ອງອາໄຫລ່ຂອງເຄື່ອງຈັກ, ຢາປົວພະຍາດ, ຜະລິດຕະພັນເຄມີ ແລະ ອື່ນໆ ອີກ.
(ບັນນາທິການຂ່າວ: ຕ່າງປະເທດ)
ຮຽບຮຽງ ຂ່າວໂດຍ: ສະໄຫວ ລາດປາກດີ
