ກະຊວງສຶກສາທິການ ແລະ ກິລາ (ສສກ) ຮ່ວມກັບທະນາຄານໂລກ ຈັດກອງປະຊຸມຫາລືປັບປຸງໂຄງການ ແລະ ຕິດຕາມຊຸກຍູ້ການຈັດຕັ້ງປະຕິບັດວຽກງານໂຄງການກອງທຶນຮ່ວມມືສາກົນ ເພື່ອການສຶກສາ ໄລຍະ III “ໂຄງການຮຽນຮູ້ ແລະ ຄວາມເທົ່າທຽມ” ເມື່ອວັນທີ 13 ກຸມພາ 2023 ທີ່ຫ້ອງປະຊຸມ ກະຊວງສຶກສາທິການ ແລະ ກິລາ (ຕຶກໄອຊີທີ), ໂດຍໃຫ້ກຽດເປັນປະທານຮ່ວມຂອງທ່ານ ຮສ.ປອ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກິລາ ແລະ ທ່ານ ນາງ ທາລາ ບີເທວ ນັກເສດຖະສາດອາວຸໂສ ຫົວໜ້າແຜນງານໂຄງການຈາກທະນາຄານໂລກ, ມີຫົວໜ້າ-ຮອງຫົວໜ້າກົມ, ຜູ້ຊ່ຽວຊານ, ຄະນະທີມງານຈາກທະນາຄານໂລກ, ຄູ່ຮ່ວມພັດທະນາ, ຄະນະຮັບຜິດຊອບວຽກງານທີ່ກ່ຽວຂ້ອງເຂົ້າຮ່ວມທັງແບບເຊິ່ງໜ້າ ແລະ ຜ່ານລະບົບທາງໄກ.
ການຈັດກອງປະຊຸມໃນຄັ້ງນີ້, ແມ່ນເພື່ອປຶກສາຫາລືກ່ຽວກັບວຽກບູລິມະສິດຫຼັກຂອງລັດຖະບານ ແລະ ເພື່ອຮັບປະກັນວ່າວຽກບູລິມະສິດດັ່ງກ່າວແມ່ນສົ່ງຜົນສະທ້ອນອອກໃຫ້ເຫັນໃນການໂຄງການ; ເພື່ອປຶກສາຫາລືຖອດຖອນບົດຮຽນ, ບັນຫາຂໍ້ຄົງຄ້າງ ແລະ ສິ່ງທີ່ໄດ້ຕົກລົງເຫັນດີຂອງບັນດາກິດຈະກໍາ ແລະ ຕົວຊີ້ບອກຕ່າງໆ, ຊຶ່ງເປັນສິ່ງທີ່ຈໍາເປັນໃນການປັບປຸງໂຄງການຄັ້ງນີ້; ໃຫ້ການສະໜັບສະໜູນດ້ານວິຊາການ ເພື່ອເລັ່ງຂະບວນການ ການຈັດຕັ້ງປະຕິບັດກິດຈະກໍາຂອງແຕ່ລະອົງປະກອບ ແລະ ບັນດາກິດຈະກໍາຕ່າງໆຂອງໂຄງການທີ່ກໍາລັງຈັດຕັ້ງປະຕິບັດຢູ່ ແລະ ທົບທວນຄືນການຈັດຕັ້ງປະຕິບັດ ແລະ ແກ້ໄຂແຕ່ລະປະເດັນ ບັນຫາທີ່ກ່ຽວຂ້ອງກັບວຽກງານການຈັດຊື້-ຈັດຈ້າງ, ວຽກງານປ້ອງກັນດ້ານສິ່ງແວດລ້ອມ ແລະ ສັງຄົມ ແລະ ວຽກງານຄຸ້ມຄອງການເງິນໂຄງການ.
ໂອກາດດັ່ງກ່າວ, ທ່ານ ລັດຖະມົນຕີ ກະຊວງສຶກສາທິການ ແລະ ກິລາ ກ່າວວ່າ: ໃນການມາເຮັດວຽກຂອງທີມງານທະນາຄານໂລກຄັ້ງທີ່ຜ່ານມາ ເຫັນໄດ້ວ່າ ມີຫຼາຍສິ່ງທ້າທາຍໄດ້ຮັບການແກ້ໄຂ ແລະ ໜ່ວຍງານຕ່າງໆສາມາດເຂົ້າໃຈຈະແຈ້ງຂຶ້ນໃນການຈັດຕັ້ງປະຕິບັດກິດຈະກຳຂອງໂຄງການສຳເລັດຫຼາຍດ້ານ. ຢ່າງໃດກໍຕາມ, ເພື່ອເຮັດໃຫ້ການຈັດຕັ້ງປະຕິບັດກິດຈະກຳໄດ້ຢ່າງມີປະສິດທິພາບ, ມີປະສິດທິຜົນ ແລະ ສາມາດປະຕິບັດໃຫ້ສຳເລັດຕາມຈຸດປະສົງຂອງໂຄງການ ແມ່ນຮຽກຮ້ອງໃຫ້ທີມງານຈາກທະນາຄານໂລກ ແລະ ທີມງານຈາກກອງທຶນຮ່ວມມືສາກົນ, ທີມງານຈາກກະຊວງສຶກສາທິການ ແລະ ກິລາ ໂດຍສະເພາະ ແຕ່ລະກົມ, ສະຖາບັນ, ສູນ ແລະ ທຸກໜ່ວຍງານທີ່ກ່ຽວຂ້ອງໃນການຈັດຕັ້ງປະຕິບັດໂຄງການ ແລະ ຕິດຕາມຊຸກຍູ້ສົ່ງເສີມການຈັດຕັ້ງປະຕິບັດວຽກງານໂຄງການກອງທຶນຮ່ວມມືສາກົນ ເພື່ອການສຶກສາ ໄລຍະນີ້ ຊ່ວຍເອົາໃຈໃສ່ໃຫ້ການຮ່ວມມືຢ່າງໃກ້ຊິດ ເພື່ອປັບປຸງໂຄງການຄືນໃໝ່ ແລະ ກຳນົດກິດຈະກຳທີ່ເປັນບູລິມະສິດ ແລະ ຄວາມອາດສາມາດໃນການຈັດຕັ້ງປະຕິບັດກິດຈະກຳໃຫ້ສຳເລັດຕາມແຜນ.
ໂດຍ ບົວລະພາ
