ຂ່າວຕ່າງປະເທດລາຍງານ ເມື່ອວັນທີ 14 ກຸມພາທີ່ຜ່ານມາ, ສະຖາບັນຈຸລະຊີວະວິທະຍາ ສັງກັດຢູ່ສະຖາບັນໆ ດິດວິທະຍາສາດກວາງຕົງ ສປ ຈີນ ໄດ້ເປີດເຜີຍວ່າ: ຄະນະນັກວິໄຈຈີນໄດ້ນຳສະເໜີຂໍ້ມູນທີ່ສາມາດພິສູດໄດ້ວ່າ ອາຫານ ແລະ ສ່ວນປະສົມທີ່ອຸດົມສົມບູນໄປດ້ວຍເຊເລນຽມ (Selenium) ສາມາດຊ່ວຍເຮັດໃຫ້ພະຍາດອັນໄຊເມີ (Alzheimer) ດີຂຶ້ນໄດ້.
ຜົນການສຶກສາດັ່ງກ່າວໄດ້ຮັບການຕີພິມລົງໃນວາລະສານບົດວິຈານວິທະຍາສາດການອາຫານ ແລະ ໂພຊະນາການ (Critical Reviews in Food Science and Nutrition) ຊີ້ໃຫ້ເຫັນວ່າ: ແຫຼ່ງອາຫານທີ່ເຕັມໄປດ້ວຍ Selenium ສາມາດສະກັດກັ້ນການອັກເສບ ແລະ ພາວະຄວາມຄຽດທີ່ເກີດຈາກອອກຊິເດເຊິນ (Oxidation) ຊຶ່ງສະແດງໃຫ້ເຫັນເຖິງຄວາມເປັນໄປໄດ້ຂອງວິທີການບໍລິໂພກອາຫານຮູບແບບໃໝ່ສຳລັບຜູ້ປ່ວຍເປັນພະຍາດ Alzheimer. ພະຍາດ Alzheimer ເປັນໂຣກທາງລະບົບປະສາດທີ່ມີລັກສະນະສະເພາະຄື: ການສູນເສຍຄວາມຈຳ ແລະ ຄວາມສາມາດໃນການຮຽນຮູ້ທີ່ຫຼຸດລົງ ອາດຈະສົ່ງຜົນໃຫ້ຄວາມສາມາດໃນການເຮັດກິດຈະກຳປະຈຳວັນຂອງຜູ້ປ່ວຍຫຼຸດລົງ ແລະ ນຳໄປສູ່ຄຸນນະພາບຊີວິດທີ່ຮ້າຍແຮງລົງ ໂດຍແຫຼ່ງອາຫານທີ່ເຕັມໄປດ້ວຍ Selenium ນັ້ນໄດ້ຮັບຄວາມສົນໃຈເພີ່ມຂຶ້ນໃນການສຶກສາກ່ຽວກັບພະຍາດ Alzheimer. ຄະນະນັກວິໄຈຈາກສະຖາບັນວິທະຍາສາດກວາງຕົງ ໄດ້ຮ່ວມມືກັບສະຖາບັນອີກຫຼາຍແຫ່ງໄດ້ສະເໜີກົນໄກການຮ່ວມປິ່ນປົ່ວທີ່ເປັນໄປໄດ້ຂອງແຫຼ່ງອາຫານທີ່ເຕັມໄປດ້ວຍ Selenium ເພື່ອບັນເທົາອາການຂອງພະຍາດ Alzheimer ໂດຍແຫຼ່ງອາຫານທີ່ມີ Selenium ສູງພົບເຫັນໄດ້ທົ່ວໄປໃນພືດ ແລະ ຈຸລິນຊີຫຼາຍຊະນິດເຊັ່ນ: ຜັກຕະກູນກະລໍ່າ, ຢີສ (Yeast) ແລະ ເຫັດ.
ນອກຈາກນີ້, ການສຶກສາຍັງສະແດງໃຫ້ເຫັນວ່າ: ການຍ່ອຍສະຫຼາຍດ້ວຍເອນຊາມ (Enzyme) ແລະ ຂະບວນການທາງກາຍະພາບເຊັ່ນ: ຄວາມຮ້ອນ, ຄວາມດັນສູງ ແລະ ການປະກອບອາຫານດ້ວຍໄມໂຄຼເວບ (Microwave) ເປັນເຕັກນິກຫຼັກໃນການປັບປ່ຽນຄຸນສົມບັດຂອງ Selenium ໃນອາຫານ.
