ຕາມຂ່າວຈາກວິທະຍຸສາກົນຫວຽດນາມ ດ້ວຍຖານະເປັນປະທານອາຊຽນ ປີ 2023 ອິນໂດເນເຊຍ ພວມກະກຽມຂັ້ນຕອນ ເພື່ອຊ່ວຍຕີມໍແລດສະເຕ ເຂົ້າເປັນສະມາຊິກຢ່າງເປັນທາງການ ຂອງອາຊຽນ. ພາຍຫລັງ ຖະແຫລງການຮ່ວມ ໃນວັນທີ 13 ກຸມພານີ້ ທ່ານ Taur Matan Ruak, ນາຍົກລັດຖະມົນຕີ ຕີມໍແລດສະເຕ ຢູ່ວັງ Bogor, ແຂວງ Java ຕາເວັນຕົກ, ປະເທດ ອິນໂດເນເຊຍ, ທ່ານ Joko Widodo, ປະທານາທິບໍດີອິນໂດເນເຊຍ ໃຫ້ຮູ້ວ່າ: ກ່ຽວກັບດ້ານຫລັກການແລ້ວ, ຕີມໍແລດສະເຕ ໄດ້ຮັບຮູ້ ເປັນສະມາຊິກຂອງ ອາຊຽນແລ້ວ. ຂັ້ນຕອນ ເພື່ອກາຍເປັນ ສະມາຊິກ ທາງການພວມໄດ້ຮັບ ການກະກຽມ, ນຳໜ້າແມ່ນອິນໂດເນເຊຍ ດ້ວຍຖານະເປັນປະທານອາຊຽນ. ສ່ວນ ທ່ານ Retno Marsudi, ລັດຖະມົນຕີກະຊວງການຕ່າງປະເທດອິນໂດເນເຊຍ ສະແດງຄວາມເຊື່ອໝັ້ນວ່າ: ເລື່ອງຕີມໍແລດສະເຕ ກາຍເປັນສະມາຊິກອາຊຽນ ຈະປະກອບສ່ວນ ຮັບປະກັນຄວາມສະຖຽນລະພາບ ແລະ ຄວາມວັດທະນາຖາວອນຂອງພາກພື້ນ.
(ບັນນາທິການຂ່າວ: ຕ່າງປະເທດ)
ຮຽບຮຽງຂ່າວໂດຍ: ສະໄຫວ ລາດປາກດີ
