ພາຍຫລັງທີ່ໄດ້ເຮັດວຽກຢູ່ແຂວງຊຽງຂວາງ ເພື່ອເປັນການສືບຕໍ່ປຸກລະດົມ ແລະ ຊຸກຍູ້ວຽກງານການປ້ອງກັນ ແລະ ຄວບຄຸມພະຍາດໂຄວິດ-19 ແລະ ການໂຄສະນາປັບປຸງຊິວິດການເປັນຢູ່ຂອງ ແມ່ຍິງ ແລະ ເດັກ ທ່ານ ເຍ່ຍເກີຢ່າ ໜໍ່ຈໍ່ຈົງຕົວ ຮອງປະທານສູນກາງແນວລາວສ້າງຊາດ ພ້ອມຄະນະໄດ້ລົງເຮັດວຽກທີ່ເມືອງຮ້ຽມ ແຂວງຫົວພັນ ໃນວັນທີ 7 ກຸມພາ ປີ 2023.
ໃນໂອກາດມາເຮັດວຽກຢູ່ແຂວງຫົວພັນ ຄັ້ງນີ້ ທ່ານ ເຍ່ຍເກີຢ່າ ໜໍ່ຈໍ່ຈົງຕົວ ຮອງປະທານສູນກາງແນວລາວສ້າງຊາດ ໄດ້ນໍາເອົາອຸປະກອນ ໄອທີ 2 ຊຸດ ລວມມີ: ແລັບທອັບ, LCD project ພ້ອມດ້ວຍຈໍ ແລະ ຕູ້ລໍາໂພງເຄື່ອນທີ່ມູນຄ່າ ກວ່າ 44 ລ້ານກີບ ມາມອບໃຫ້ແນວລາວສ້າຊາດ ເມືອງຮ້ຽມ ແລະ ເມືອງຊ່ອນ ແຂວງຫົວພັນ ເພື່ອນໍາໃຊ້ໃນໂຄງການສື່ສານຕ້ານຄວາມສ່ຽງ ແລະ ການມີສ່ວນຮ່ວມຂອງຊຸມຊົນ (RCCE) ຊຶ່ງແມ່ນແມ່ນກິດຈະກໍາທີ່ດໍາເນີນການເພື່ອສົ່ງເສີມການສັກຢາວັກຊີນທັງສໍາລັບ Covid-19 ແລະ ການສັກຢາປ້ອງກັນປົກກະຕິ
ເຂົ້າຮ່ວມໃນພິທີມອບ-ຮັບ ອຸປະກອນຄັ້ງນີ້ ຍັງມີທ່ານ ວີເຕັງ ຈື່ໄມເຕັງ ຮອງປະທານແນວລາວສ້າງຊາດແຂວງຫົວພັນ, ທ່ານ ຄຳແພງ ແສງຄໍາສັນ ຮອງປະທານແນວລາວສ້າງຊາດເມືອງຮ້ຽມ, ທ່ານ ແສງຈັນ ຢ້າງນ້າວຊົວ ຮອງປະທານແນວລາວສ້າງຊາດເມືອງຊ່ອນ, ທ່ານ ຕະບອງເພັດ ພຸດທະວົງ ຜູ້ຊ່ຽວຊານວຽກງານໂຄສະນາ ແລະ ສື່ສານມວນຊົນ ອົງການຢູນີເຊັບ ແລະ ຕາງຫນ້າພະແນກສາທາລະນະສຸກແຂວງຫົວພັນ, ພະນັກງານຈາກແຂວງ ແລະ ພະນັກງານຈາກເມືອງທີ່ກ່ຽວຂ້ອງ.
ໃນພິທີມອບ-ຮັບ ທ່ານເຍ່ຍເກີຢ່າ ໜໍ່ຈໍ່ຈົງຕົວ ຍັງໄດ້ສະແດງຄວາມຂອບໃຈ ອົງການຢູນີເຊັບ, ລັດຖະບານອົດສະຕາລີ, USAID, ກອງທຶນສຸກເສີນຂອງອົງການ UNICEF ແລະ ອິຕາລີ. ທ່ານຍັງໄດ້ຊີ້ນໍາ ໃຫ້ພາກສ່ວນຕ່າງໆ ຈົ່ງນໍາໃຊ້ອຸປະກອນ ໃຫ້ຖືກເປົ້າຫມາຍ ແລະ ມີປະສິທິຜົນສູງສຸດ.
ໃນພິທີມອບ-ຮັບ ທ່ານ ຕະບອງເພັດ ພຸດທະວົງ ຜູ້ຊ່ຽວຊານວຽກງານໂຄສະນາ ແລະ ສື່ສານມວນຊົນ ອົງການຢູນີເຊັບ ໄດ້ກ່າວຊົມເຊີຍຜົນສຳເລັດຂອງການໂຄສະນາວຽກງານການປ້ອງກັນ ແລະ ຄວບຄຸມພະຍາດໂຄວິດ-19 ແລະ ການໂຄສະນາປັບປຸງຊິວິດການເປັນຢູ່ຂອງແມ່ຍິງ ແລະ ເດັກ ໂດຍສະເພາະການສື່ສານຄວາມສ່ຽງ ແລະ ການມີສ່ວນຮ່ວມຂອງຊຸມຊົນ. ອົງການຢູນີເຊັບ ແມ່ນມີຄວາມຫມຸ້ງຫມັ້ນທີ່ຈະໃຫ້ການສະຫນັບສະຫນູນສູນກາງແນວລາວສ້າງຊາດ ໃນປັບປຸງຊີວິດການເປັນຢູ່ທີ່ດີຂອງແມ່ ແລະ ເດັກ ໃນສປປ ລາວ.
ໄລຍະຜ່ານມາຫ້ອງການແນວລາວສ້າງຊາດແຂວງຫົວພັນ ແລະ ເມືອງຊຽງຄໍ້ ແຂວງຫົວພັນ ກໍ່ໄດ້ຮັບການສະຫນັບສະຫນູນດ້ານອຸປະກອນຕ່າງໆ ເຊັ່ນ: ຄອມພິວເຕີ, ແລັບທອບ, LCD projector, ລໍາໂພງເຄື່ອນທີ່ ແລະ ອື່ນໆ.
