(ເນື່ອງໃນໂອກາດວັນສ້າງຕັ້ງພັກກອມມູນິດ ຫວຽດນາມ ຄົບຮອບ 93 ປີ) ເມື່ອລະດູບານໃໝ່ວຽນມາ, ໃນທ່າມກາງບັນຍາກາດຕ້ອນຮັບບຸນປີໃໝ່ປະຈຳຊາດຢ່າງເບີກບານມ່ວນຊື່ນ, ປະຊາຊົນ ຫວຽດນາມ ກໍມີຄວາມປິຕິຍິນດີຂ່ຳນັບຮັບຕ້ອນວັນສ້າງຕັ້ງພັກກອມມູນິດ ຫວຽດນາມ. ລະດູບານໃໝ່ປີ 2023 ແມ່ນລະດູບານໃໝ່ປີທີ 93 ຂອງພັກ, ພັກກອມມູນິດ ຫວຽດນາມ ໄດ້ນຳພາປະຊາຊົນລຸກຮືຂຶ້ນຕ້ານສັດຕູຜູ້ຮຸກຮານຍາດເອົາເອກະລາດ, ເສລີພາບມາໃຫ້ປະເທດ, ສ້າງສາ ແລະ ພັດທະນາປະເທດຊາດ, ນຳເອົາຊີວິດການເປັນຢູ່ທີ່ອີ່ມໜຳສຳລານ, ສົມບູນພູນສຸກມາໃຫ້ທົ່ວປວງຊົນ.
ລະດູບານໃໝ່ເປັນສັນຍາລັກແຫ່ງພະລັງຊີວິດ, ຄວາມໜຸ່ມແໜ້ນ ແລະ ສິ່ງທີ່ດີງາມທີ່ສຸດ. ພັກກອມມູນິດ ຫວຽດນາມ ສ້າງຕັ້ງໂດຍ ປະທານ ໂຮ່ຈິມິນ, ນຳພາ ແລະ ຫຼໍ່ຫຼອມໃຫ້ກຳເນີດມາໄດ້ກົງກັບມື້ທຳອິດຂອງລະດູບານໃໝ່. ກ່ອນນີ້ 93 ປີ, ວັນທີ 3 ກຸມພາ 1930, ຊາດຫວຽດນາມ ໄດ້ສ້າງຂີດໝາຍອັນຮຸ່ງເຮືອງເຫຼືອງເຫຼື້ອມ ດ້ວຍການສ້າງຕັ້ງພັກກອມມູນິດ ຫວຽດນາມ.
ຜົນສຳເລັດຂອງການປະຕິວັດ ເດືອນສິງຫາ ປີ 1945 ແມ່ນໜຶ່ງໃນບັນດາໜ້າປະຫວັດສາດທີ່ສະຫງ່າອົງອາດທີ່ສຸດໃນປະຫວັດສາດຂອງຊາດຫວຽດນາມ, ແມ່ນບາດລ້ຽວໃຫຍ່ນຳຊາດຫວຽດນາມ ກ້າວເຂົ້າສູ່ໜ້າສັງກາດໃໝ່ – ສັງກາດເອກະລາດແຫ່ງຊາດ ຕິດພັນກັບລັດທິສັງຄົມນິຍົມ.
ບັນດາຂີດໝາຍໃນເສັ້ນທາງປະຕິວັດຂອງຫວຽດນາມ ສ່ວນຫຼາຍແມ່ນຢູ່ໃນລະດູບານໃໝ່. ບັ້ນຮົບ ດຽນບຽນຝູ ກໍເລີ່ມໃນລະດູບານໃໝ່ ປີ 1954, ແມ່ນກຳລັງແຮງເພື່ອບຸກໂຈມຕີດັບສູນຄັ້ງໃຫຍ່ສຸດ, ພົ້ນເດັ່ນທີ່ສຸດຂອງກອງທັບ ແລະ ປະຊາຊົນ ຫວຽດນາມ ໃນການຕໍ່ສູ້ຕ້ານພວກລ່າເມືອງຂຶ້ນຝຣັ່ງ, ແມ່ນການຕັດສິນໃຈດັບສູນເຈດຈຳນົງຮຸກຮານຂອງພວກລ່າເມືອງຂຶ້ນ. ການບຸກໂຈມຕີ ແລະ ການລຸກຮືຂຶ້ນຄັ້ງໃຫຍ່ໃນລະດູບານໃໝ່ ປີ 1975, ຈຸດສູງສຸດຂອງບັ້ນຮົບ ໂຮ່ຈິມິນປະຫວັດສາດປົດປ່ອຍພາກໃຕ້ຫວຽດນາມ, ທ້ອນໂຮມປະເທດຊາດເປັນເອກະພາບໂດຍສົມບູນ.
ກອງປະຊຸມໃຫຍ່ຜູ້ແທນທົ່ວປະເທດຄັ້ງຕ່າງໆຂອງພັກກອມມູນິດ ຫວຽດນາມ ກໍໄດ້ຈັດຂຶ້ນໃນລະດູບານໃໝ່. ພາຍຫຼັງກອງປະຊຸມໃຫຍ່ແຕ່ລະສະໄໝ, ພັກ ລ້ວນແຕ່ວາງອອກນະໂຍບາຍສຳຄັນ, ນຳລະດູບານໃໝ່ທີ່ມີຄວາມຜາສຸກມາໃຫ້ປະເທດຊາດ.
93 ປີ ລະດູບານໃໝ່ທີ່ມີພັກນຳພາ, ປະເທດ ຫວຽດນາມ ຈາກປະເທດທີ່ທຸກຍາກ, ຫຼ້າຫຼັງ, ເປັນຫົວເມືອງຂຶ້ນ ໄດ້ບືນຕົວຂຶ້ນກາຍເປັນປະເທດພວມພັດທະນາ, ມີລາຍຮັບປານກາງ, ມີຖານະບົດບາດ, ທີ່ຕັ້ງ ແລະ ອິດທິພົນຊື່ສຽງຂອງປະເທດຊາດ ນັບມື້ນັບໄດ້ຍົກສູງຂຶ້ນໃນເວທີສາກົນ. ທ່ານ ຫງວຽນຝູຈ້ອງ ເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດ ຫວຽດນາມ ເນັ້ນໜັກວ່າ: ໃນໄລຍະ 90 ກວ່າປີຜ່ານມາ, ພັກກອມມູນິດ ຫວຽດນາມ ໄດ້ສ້າງຕັ້ງ, ປັບປຸງ ແລະ ນັບມື້ນັບຍົກສູງບົດບາດນຳພາ, ກຳລັງແຮງ ແລະ ອິດທິພົນຊື່ສຽງຂອງພັກ ດ້ວຍຄຸນທາດ, ມານະຈິດ ແລະ ສະຕິປັນຍາ; ດ້ວຍທິດທາງອັນຖືກຕ້ອງ ນຳເອົາຜົນປະໂຫຍດທີ່ແທດຈິງມາໃຫ້ປະຊາຊົນ ແລະ ປະເທດຊາດ. ນັບແຕ່ມີພັກ, ປະຊາຊົນ ໄດ້ມີຜູ້ນຳພາທີ່ຖືກຕ້ອງ ແລະ ຍ້ອນເຫດນັ້ນ ພວກເຮົາຈຶ່ງຍາດໄດ້ໄຊຊະນີ້ຕໍ່ໃສ່ໄຊຊະນະໃໝ່. ໃນສະໄໝປະເທດຊາດປ່ຽນແປງໃໝ່, ພັກກອມມູນິດ ຫວຽດນາມ ໄດ້ນຳພາປະຊາຊົນຜ່ານຜ່າທຸກຄວາມຫຍຸ້ງຍາກ, ສິ່ງທ້າທາຍ ແລະ ບັນລຸໄດ້ຜົນງານໃຫຍ່ຫຼວງຫຼາຍຢ່າງ. ບໍ່ມີເວລາໃດທີ່ ປະເທດຫວຽດນາມ ມີພາລະກິດທີ່ໃຫຍ່ຫຼວງ, ມີກຳລັງຄວາມສາມາດບົ່ມຊ້ອນ, ມີຖານະບົດບາດ, ທີ່ຕັ້ງ ແລະ ອິດທິພົນຊື່ສຽງໃນເວທີສາກົນຄືໃນວັນນີ້.
ລະດູບານໃໝ່ໄດ້ວຽນມາບັນຈົບຄົບຮອບອີກວາລະໜຶ່ງ ໃນທຸກເຂດທຸກພາກຂອງປະເທດຊາດ.ປະຊາຊົນໃນທົ່ວປະເທດ ແລະ ຊາວຫວຽດນາມ ອາໄສຢູ່ຕ່າງປະເທດ ພວມຕ້ອນຮັບລະດູບານໃໝ່ດ້ວຍຄວາມເບີກບານມ່ວນຊື່ນ ແລະ ດ້ວຍຄວາມເຊື່ອໝັ້ນໃໝ່. ຄວາມເຊື່ອໝັ້ນນັ້ນ ໄດ້ຮັບການປັບປຸງໃນທຸກຂົງເຂດຂອງປະເທດຊາດ. ໃນບັນຍາກາດທີ່ເບີກບານມ່ວນຊື່ນ, ຊົມເຊີຍວັນສ້າງຕັ້ງພັກ, ຕ້ອນຮັບລະດູບານໃໝ່, ປະຊາຊົນ ຫວຽດນາມ ກ້າວເຂົ້າສູ່ປີໃໝ່ດ້ວຍຈິດໃຈໃໝ່, ບັນຍາກາດໃໝ່ ແລະ ໝັ້ນໝາຍບັນລຸຜົນສຳເລັດອັນໃໝ່. ທົ່ວພັກ, ທົ່ວປວງຊົນ ແລະ ທົ່ວກອງທັບ ໄດ້ຮ່ວມແຮງຮ່ວມໃຈ ຕັດສິນໃຈປະຕິບັດມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XIII ຂອງພັກກອມມູນິດ ຫວຽດນາມ ຢ່າງມີໄຊ, ນຳພາປະເທດຊາດພັດທະນາຍິ່ງໆຂຶ້ນໄປ.
