ເຊວຊີ ເປັນທີມທີ່ໃຊ້ຈ່າຍເງິນເສີມທີມໃນໄລຍະຕະຫຼາດເດືອນມັງກອນຫຼາຍທີ່ສຸດໃນ ພຣີເມຍລີກ ໂດຍໃຊ້ໄປຫຼາຍເຖິງ 323 ລ້ານປອນ ເກືອບເຄິ່ງໜຶ່ງຂອງທີ່ທັງລີກໃຊ້ໄປໃນຕະຫຼາດຮອບນີ້ ຕະຫຼາດລະດູໜາວນີ້ ພຣີເມຍລີກ ມີຍອດຊື້ນັກເຕະເຂົ້າມາປະມານ 780 ລ້ານປອນ ມີນັກເຕະເຂົ້າມາໃໝ່ 52 ຄົນ ຫຼາຍກວ່າລີກ 1 ຝຣັ່ງ, ບຸນເດສລີກາ ເຢຍລະມັນ, ກັລໂຊ ຊີຣີ ອາ ອີຕາລີ ແລະ ລາລີກາ ແອັດສະປາຍ ລວມກັນອີກ.
ສ່ວນເລື່ອງການຂາຍນັ້ນ ພຣີເມຍລີກ ຂາຍນັກເຕະອອກໄປທີ່ 105 ລ້ານປອນ ລວມເງິນໃຊ້ຈ່າຍຫຼັກ ຫັກລົບກັນແລ້ວ ເທົ່າກັບ 675 ລ້ານປອນ. ນັກເຕະທີ່ຄ່າຕົວແພງທີ່ສຸດຄື ເອນໂຊ ເຟີນານເດຊ ທີ່ຍ້າຍຈາກ ເບນຟີກາ ມາຢູ່ກັບ ເຊວຊີ ໃນລາຄາ 106,8 ລ້ານປອນ ກ່ອນທີ່ຕະຫຼາດຈະປິດບໍ່ເທົ່າໃດນາທີເທົ່ານັ້ນ ຕິດຕາມດ້ວຍ ມິໄຄໂລ ມູດຣິກ ທີ່ຍ້າຍຈາກ ຊັກຕາ ໂດເນັດ ມາຢູ່ ເຊວຊີ ເຊັ່ນດຽວກັນ ໃນລາຄາ 88 ລ້ານປອນ ເປັນການຕັດຕໍ່ໜ້າຄູ່ແຂ່ງຮ່ວມເມືອງຢ່າງອາເຊນອລ ເຊິ່ງກອງເຊຍບານໄດ້ເຫັນຜົນງານໄປແລ້ ວຫຼັງລົງຫຼີ້ນຕົວສໍາຮອງໃນເກມກັບ ລີເວີພູລ.
ທີມທີ່ໃຊ້ເງິນຫຼາຍທີ່ສຸດຈະເປັນໃຜໄປບໍ່ໄດ້ ເຊວຊີ ນັ້ນເອງ ທີ່ໃຊ້ເງິນໄປຫຼາຍເຖິງ 323 ລ້ານປອນ ເກືອບເຄິ່ງໜຶ່ງຂອງລີກທັງໝົດໃຊ້ໄປ ກັບນັກເຕະໃໝ່ 8 ຄົນ ນອກຈາກ 2 ອັນດັບຕົ້ນຢ່າງ ເອນໂຊ່ ແລະ ມູດຣິກ ຍັງມີ ເບີນົວ ບາເດຍຊິລ 35 ລ້ານປອນ, ໂນນີ ມາດູເອເກ 29 ລ້ານປອນ, ມາໂລ ກູສໂຕ 26 ລ້ານປອນ, ອັນເດຣ ຊານໂຕສ 18 ລ້ານປອນ ແລະ ເດວິດ ດາໂຕຣ ໂຟຟານາ 8 ລ້ານປອນ ລວມເຖິງອີກ 10 ລ້ານປອນເປັນຄ່າຢືມຂອງ ຊູເອົາ ເຟລິກ ດ້ວຍ.
