ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ເຕດ ບຸນນາກ ເລຂາທິການສະພາກາຊາດ ແຫ່ງຣາຊະອານາຈັກໄທ ໃນວັນທີ 2 ກຸມພາ 2023 ທີ່ສໍານັກງານນາຍົກລັດຖະມົນຕີ ໃນໂອກາດມາເຄື່ອນໄຫວວຽກງານຢູ່ ສປປ ລາວ.
ໂອກາດດັ່ນີ້, ທ່ານຮອງນາຍົກລັດຖະມົນຕີ ໄດ້ສະແດງຄວາມຕ້ອນຮັບ ແລະ ຊົມເຊີຍ ທ່ານ ເຕດ ບຸນນາກ ທີ່ໄດ້ນໍາພາຄະນະ ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ຊຶ່ງເປັນການປະກອບສ່ວນ ຊ່ວຍເຫລືອ ເຊິ່ງກັນ ແລະ ກັນ ລະຫວ່າງ ສປປ ລາວ-ຣາຊະອານາຈັກໄທ ໂດຍສະເພາະ ແມ່ນລະຫວ່າງອົງການກາແດງແຫ່ງຊາດລາວ ແລະ ສະພາກາຊາດແຫ່ງຣາຊະອານາຈັກໄທ. ພ້ອມນີ້, ທ່ານຮອງນາຍົກລັດຖະມົນຕີ ຍັງໄດ້ຕີລາຄາສູງຕໍ່ການພົວພັນຮ່ວມມື ຊ່ວຍເຫລືອ ຂອງສະພາກາຊາດໄທ ຊຶ່ງເປັນການເສີມສ້າງສາຍພົວພັນມິດຕະພາບ ແລະ ການຮ່ວມມື ທີ່ເຄີຍມີມາແລ້ວນັ້ນ ໃຫ້ນັບມື້ຂະຫຍາຍຕົວຂຶ້ນເລື້ອຍໆ.
ພ້ອມກັນນີ້, ທ່ານ ເຕດ ບຸນນາກ ໄດ້ຕາງໜ້າຄະນະ ສະແດງຄວາມຂອບໃຈ ມາຍັງທ່ານຮອງນາຍົກລັດ ຖະມົນຕີ ທີ່ໃຫ້ການຕ້ອນຮັບຢ່າງອົບອຸ່ນ ແລະ ພ້ອມທັງລາຍງານໃຫ້ຊາບເຖິງຈຸດປະສົງຂອງການມາຢ້ຽມຢາມ ແລະ ເຮັດວຽກຢູ່ ສປປ ລາວ ເພື່ອສືບຕໍ່ເສີມຂະຫຍາຍການພົວພັນຮ່ວມມືກັບ ອົງການກາແດງແຫ່ງຊາດລາວ.
ຂ່າວ: ວຽງສະຫວັນ
