ໃນວັນທີ 2 ກຸມພາ ນີ້ ທີ່ສານປະຊາຊົນສູງສຸດ (ສປສສ)ໄດ້ຈັດພິທີປະກາດເລື່ອນຊັ້ນຜູ້ພິພາກສາ ຂອງສານປະຊາຊົນພາຍໃຕ້ການເປັນປະທານ ແລະ ມອບມະຕິຂອງຄະນະປະຈຳສະພາແຫ່ງຊາດ ໂດຍທ່ານ ນາງ ວຽງທອງ ສີພັນດອນ ຄະນະເລຂາທິການສູນກາງພັກ ປະທານສານປະຊາຊົນສູງສຸດແລະ ທ່ານ ບຸນຂວາງ ທະວີສັກ ຮອງປະທານສານປະຊາຊົນສູງສຸດ ໄດ້ມອບຂໍ້ຕົກລົງຂອງປະທານສານປະຊາຊົນສູງສຸດ ຊຶ່ງມີພະນັກງານຫຼັກແຫຼ່ງ ແລະ ແຂກຖືກເຊີນເຂົ້າຮ່ວມ.
ໃນພິທີດັ່ງກ່າວ ມະຕິຂອງຄະນະປະຈຳສະພາແຫ່ງຊາດ ຕົກລົງແຕ່ງຕັ້ງ ທ່ານ ແສງສຸວັນ ຈັນທະລຸນນະວົງ ຜູ້ພິພາກສາຊັ້ນສີ່ ຮັກສາການປະທານສານປະຊາຊົນພາກກາງ ເປັນຫົວໜ້າຄະນະສານແຮງງານ ສານປະຊາຊົນສູງສຸດ; ແຕ່ງຕັ້ງ ທ່ານ ພົມສຸວັນ ພິລາຈັນ ຜູ້ພິພາກສາຊັ້ນສີ່ ຫົວໜ້າຄະນະສານແຮງງານ ສານປະຊາຊົນສູງສຸດ ເປັນປະທານສານປະຊາຊົນພາກກາງ ແລະ ຂໍ້ຕົກລົງປະທານສານປະຊາຊົນສູງສຸດ ຕົກລົງ ແຕ່ງຕັ້ງທ່ານ ສຸລິຈັນ ວໍລະເດດ ຜູ້ພິພາກສາຊັ້ນໜຶ່ງ ເປັນຜູ້ພິພາກສາຊັ້ນສອງ ປະຈຳຢູ່ ສານປະຊາຊົນເຂດ III ນະຄອນຫຼວງວຽງຈັນ; ທ່ານ ດວງປັນຍາ ສາຍນໍລາດ ຜູ້ພິພາກສາຊັ້ນສອງ ເປັນຜູ້ພິພາກສາຊັ້ນສາມ ປະຈຳຢູ່ ສານປະຊາຊົນນະຄອນຫຼວງວຽງຈັນ ແລະ ຕົກລົງແຕ່ງຕັ້ງ ທ່ານ ນາງ ພອນ ບຸນຂັນ ຜູ້ພິພາກສາຊັ້ນສອງ ເປັນຜູ້ພິພາກສາຊັ້ນສາມ ປະຈຳຢູ່ ສານປະຊາຊົນນະຄອນຫຼວງວຽງຈັນ.
ໃນພິທີທີ່ມີຄວາມໝາຍສຳຄັນນີ້ ທ່ານ ນາງ ວຽງທອງ ສີພັນດອນ ໄດ້ໂອລົມ ແລະ ເນັ້ນໃຫ້ຜູ້ທີ່ໄດ້ຮັບຕໍ່າແໜງໃໝ່ບາງຕອນວ່າ:ຕ້ອງພ້ອມກັນສືບຕໍ່ສຶກສາອົບຮົມ ພະນັກງານ-ຜູ້ພິພາກສາ ທາງດ້ານແນວຄິດ,ຄຸນທາດການເມືອງ,ຄຸນສົມບັດ ສິນທຳປະຕິບັດ, ຈັນຍາບັນ-ຈັນຍາທຳ ສ້າງຄວາມເຂັ້ມແຂງດ້ານວຽກງານວິຊາສະເພາະ ວິຊາການໃຫ້ນັບມື້ສູງຂຶ້ນ,ເຮັດໃຫ້ພະນັກງານມີນໍ້າໃຈຮັກຊາດ ມີຄວາມຈົງຮັກພັກດີຕໍ່ພັກ-ລັດ,ສັດຊື່ບໍລິສຸດ ຮັບໃຊ້ປະຊາຊົນ ດ້ວຍຄວາມຈິງໃຈ ເປັນທຳເຄົາລົບ ແລະ ປະຕິບັດກົດໝາຍຢ່າງເຂັ້ມງວດ.
(ຂ່າວ-ພາບ:ອານຸພົນ)
