ເມື່ອບໍ່ດົນມານີ້, ທ່ານ ພູທະນູເພັດ ໄຊສົມບັດ ຮອງລັດຖະມົນຕີກະຊວງການເງິນ,ໄດ້ຕ້ອນຮັບ ທ່ານນາງ ໂຈສນາ ພົວຣີ(Dr. Jyotsna PURI) ຮອງປະທານກອງທຶນສາກົນເພື່ອການພັດທະນາກະສິກໍາ(IFAD) ເພື່ອເປັນການປະກອບສ່ວນອັນສໍາຄັນເຂົ້າໃນການເສີມຂະຫຍາຍ ສາຍພົວພັນ ແລະ ການຮ່ວມມືຂອງສອງຝ່າຍ ເຊິ່ງໄລຍະຜ່ານມາ ການພົວພັນຮ່ວມມືຂອງ ສປປ ລາວ ແລະ IFAD ມີຫລາຍດ້ານທີ່ພົ້ນເດັ່ນ ເປັນຕົ້ນ ການສ້າງຍຸດທະສາດການຮ່ວມມືກັບ ສປປ ລາວ, ການຮ່ວມມືດ້ານການເງິນ ແລະ ການພົວພັນວຽກງານຕ່າງໆ.
ໃນໄລຍະຜ່ານມາ IFAD ໄດ້ສະໜັບສະໜູນສະໜູນ ສປປ ລາວ ເປັນທຶນຮອນ, ດ້ານວິຊາການເຂົ້າໃນການຈັດຕັ້ງປະຕິບັດຍຸດທະສາດ, ແຜນພັດທະນາຂະແໜງກະສິກໍາ ແລະ ປ່າໄມ້ ໂດຍເນັ້ນໃສ່ການພັດທະນາຊົນນະບົດ, ການຜະລິດກະສິກໍາເປັນສິນຄ້າ ເພື່ອບັນລຸເປົ້າໝາຍທີ່ກໍານົດຢູ່ໃນແຜນພັດທະນາເສດຖະກິດ-ສົງຄົມ 5 ປີຄັ້ງທີ 9 ແລະ ວາລະແຫ່ງຊາດ, ສປປ ລາວມີຄວາມຕ້ອງການທຶນ ເພື່ອພັດທະນາເສດຖະກິດ-ສັງຄົມ ໂດຍສະເພາະ ຢູ່ເຂດຊົນນະບົດ, ເຂດຫ່າງໄກສອກຫລີກໂດຍສອດຄ່ອງກັບບຸລິມະສິດ ແລະ ຍຸດທະສາດຂອງ IFAD.
ສະນັ້ນ, ເພື່ອເປັນການເສີມຂະຫຍາຍການຮ່ວມມືໃນຕໍ່ໜ້າ ອາດສະເໜີ IFAD ສືບຕໍ່ຊຸກຍູ້, ສະໜັບສະໜູນ ສປປ ລາວ ໃນວຽກງານການຍົກລະດັບການຜະລິດກະສິກໍາ ເປັນທັນສະ ໄໝ ໄດ້ຄຸນນະພາບ, ສາມາດແຂ່ງຂັນກັບຕະຫລາດພາກພື້ນ ແລະ ສາກົນ. ສໍາລັບຍຸດທະນາສາດການຮ່ວມມືສອງຝ່າຍ 2025-2030 ສະເໜີໃຫ້ກຳນົດຂົງເຂດການຮ່ວມມືໂດຍອີງໃສ່ແຜນ 5 ປີຄັ້ງທີ 9, ຍຸດທະສາດການພັດທະນາຂະແໜງກະສິກໍາ 2025 ແລະ ວິໄສທັດ 2030, ເສີມຂະ ຫຍາຍການຮ່ວມມືຍຸດທະສາດ ການເຊື່ອມໂຍງ-ເຊື່ອມຈອດລວງເລິກກັບປະເທດໃນພາກພື້ນຂອງ ສປປ ລາວ ເນື່ອງຈາກ ສປປ ລາວ ມີທ່າແຮງໃນການຂົນສົ່ງສິນຄ້າຜ່ານທາງລົດໄຟ, ສະເໜີໃຫ້ມີການສົ່ງເສີມພາກເອກະຊົນໃຫ້ມີສ່ວນຮ່ວມ ໃນການເຮັດທຸລະກິດກະສິກຳຫລາຍຂຶ້ນ, ສະເໜີອົງການ IFAD ຊ່ວຍສືບຕໍ່ລະດົມທຶນ ແລະ ອື່ນໆ.
ຂ່າວ-ພາບ: ກະຊວງການເງິນ
