ແຫລ່ງຂ່າວຈາກ ແຂວງໄຊສົມບູນ ໃຫ້ຮູ້ວ່າ: ພິທີເຊັນສັນຍາ ສຳປະທານສິດໃນການປ່ອຍປາ ແລະ ຄຸ້ມຄອງການຈັບປາເງິນ ຢູ່ອ່າງເກັບນໍ້າ ເຂື່ອນນໍ້າງື່ມ 1 ແລະ ເຂື່ອນນໍ້າງື່ມ 2 ທີ່ນອນຢູ່ໃນຂອບເຂດ ແຂວງໄຊສົມບູນ ໄດ້ຈັດຂຶ້ນໃນຂອງວັນທີ 30 ມັງກອນຜ່ານມາ, ຮ່ວມລົງນາມຄັ້ງນີ້, ມີ ທ່ານ ໄຊຍະເດດ ວົງສາຣະວັນ ຫົວໜ້າພະແນກແຜນການ ແລະ ການລົງທຶນແຂວງ, ທ່ານພຸດ ອິນທະວົງ ຫົວໜ້າພະແນກກະສິກຳ ແລະ ປ່າໄມ້ແຂວງ ພ້ອມດ້ວຍ ເຈົ້າເມືອງອະນຸວົງ ແລະ ເຈົ້າເມືອງລ້ອງຊານ ຝ່າຍບໍລິສັດ ເຊັນໂດຍ ທ່ານ ນາງ ເຢຫລົງມາ ອຳນວຍການບໍລິສັດເຄວີ ປູກຝັງ-ລ້ຽງສັດ ອ່າງນໍ້າງື່ມຂາເຂົ້າ-ຂາອອກຈຳກັດ ໂດຍມີ ທ່ານ ແດງ ປະທຸມທອງ ຮອງເລຂາພັກແຂວງ, ປະທານສະພາປະຊາຊົນ ແຂວງໄຊສົມບູນ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ທ່ານ ສີອຳພອນ ໄຊສະຫວັດ ຫົວໜ້າຂະແໜງສົງເສີມການລົງທຶນ ພະແພກແຜນການ ແລະ ການລົງທຶນ ແຂວງໄຊສົມບູນ ໄດ້ໃຫ້ຮູ້ວ່າ: ສັນຍາສະບັບນີ້ແມ່ນໄດ້ຕົກລົງເຫັນດີ ໃຫ້ບໍລິສັດເຄວີ (KV) ປູກຝັງ-ລ້ຽງສັດ ອ່າງນໍ້າງື່ມຂາເຂົ້າ-ຂາອອກຈຳກັດ ພັດທະນາໂຄງການສຳປະທານສິດໃນການປ່ອຍປາ ແລະ ຄຸ້ມຄອງການຈັບປາເງິນ ຢູ່ອ່າງເກັບນໍ້າ ເຂື່ອນນໍ້າງື່ມ 1 ແລະ ເຂື່ອນນໍ້າງື່ມ 2 ທີ່ນອນຢູ່ໃນຂອບເຂດ ແຂວງໄຊສົມບູນ, ໂຄງການດັ່ງກ່າວມີອາຍຸສັນຍາ 25 ປີ. ໃນນັ້ນ, ໄລຍະການປະເມີນໂຄງການ 5 ປີ ແລະ ດໍາເນີນກິດຈະການປົກກະຕິ 20 ປີ, ສ່ວນພັນທະດ້ານການເງິນ ບໍລິສັດໄດ້ວາງ ເງິນຄໍ້າປະກັນສັນຍາ 30.000 ໂດລາສະຫະລັດ, ປະກອບສ່ວນງົບປະມານໃຫ້ແຂວງ ພາຍຫລັງສົ່ງອອກ ຫລື ຈໍາໜ່າຍ 500.000 ກີບ/ໂຕນ ແລະ ປະກອບທຶນຊ່ວຍແຂວງ 30 ລ້ານກີບຕໍ່ປີ, ປະກອບ ສ່ວນໃນການປ່ອຍປາລົງອ່າງນໍ້າງື່ມ 1 ແລະ ນໍ້າງື່ມ 2 ຈຳນວນ 3 ລ້ານກີບຕໍ່ປີ, ປະກອບທຶນພັດທະນາທ້ອງຖິ່ນ ໃຫ້ເມືອງອະນຸວົງ ແລະ ເມືອງລ້ອງຊານ ເມືອງລະ 10 ລ້ານກີບ/ປີ (ໄລຍະ 3 ປີ ທໍາອິດ), ຫລັງຈາກນັ້ນ ໃນປີທີ 4 ຈະເພີ່ມເປັນ 20 ລ້ານກີບ/ປີ. ເພື່ອເປັນການປະກອບສ່ວນໃນການສ້າງສາພັດທະນາປະເທດຊາດ ໂດຍສະເພາະແມ່ນການຊຸກຍູ້ ສົ່ງເສີມການລ້ຽງປາ ເພື່ອເປັນສິນຄ້າຕອບສະ ໜອງໃຫ້ແກ່ຜູ້ບໍລິໂພກ ຊຶ່ງເປັນການປະກອບສ່ວນທີ່ສຳຄັນ ເຂົ້າໃນການສ້າງສາພັດທະນາແຂວງ ແລະ ເປັນການສະໜັບສະໜູນການພັດທະນາທ້ອງຖິ່ນ ໃນຂອບເຂດພື້ນທີ່ດັ່ງກ່າວ ໃຫ້ມີຊີວິດການເປັນຢູ່ທີ່ດີຂຶ້ນ.
ຂ່າວ-ພາບ: ພຸດທະສອນ
