ໃນປີ 2023 ນີ້, ນະຄອນຫລວງວຽງຈັນ (ນວ) ຈະເພີ່ມທະວີ ສົ່ງເສີມໃຫ້ໂຮງງານອຸດສາຫະກຳປຸງແຕ່ງ ແລະ ຫັດຖະກຳ ໃຫ້ຂະຫຍາຍຕົວຂຶ້ນຢ່າງຕໍ່ເນື່ອງ, ມູນຄ່າຜະລິດຕະພັນອຸດສາຫະກຳປຸງແຕ່ງ ຂະຫຍາຍຕົວບໍ່ໃຫ້ຫລຸດ 11,5%, ການຜະລິດຫັດຖະກຳບໍ່ໃຫ້ຫລຸດ 8%, ພ້ອມທັງ ຈະຊຸກຍູ້ການສ້າງລະບົບຈໍລະຈອນສິນຄ້າ ແລະ ເຂດໂລຈິສຕິກໃຫ້ເກີດຂຶ້ນ ເພື່ອຮອງຮັບໃຫ້ແກ່ການເກີດຂຶ້ນຂອງທາງລົດໄຟ ລາວ-ຈີນ. ພ້ອມນັ້ນ, ຍັງຈະເພີ່ມທະວີຈັດຕັ້ງປະຕິບັດແຜນງານ, ໂຄງການ, ໜ້າວຽກ ແລະ ກິດຈະກຳຂອງໂຄງການຄໍ້າປະກັນສະບຽງອາຫານ ແລະ ຜະລິດເປັນສິນຄ້າ, ການຜະລິດກະສິກຳສະອາດ ເພື່ອການຊົມໃຊ້ພາຍໃນ ຫລຸດຜ່ອນການນຳເຂົ້າ ແລະ ເປັນສິນຄ້າສົ່ງອອກ.
ທ່ານ ອາດສະພັງທອງ ສີພັນດອນ ເຈົ້າຄອງ ນວ ລາຍງານໃຫ້ຮູ້ ໃນກອງປະຊຸມສະໄໝສາ ມັນ ເທື່ອທີ 4 ຂອງສະພາປະຊາຊົນ ນວ ຊຸດທີ II ເມື່ອບໍ່ດົນນີ້ວ່າ: ເພື່ອເຮັດໃຫ້ເສດຖະກິດຂອງ ນວ ຂະຫຍາຍຕົວຢ່າງຕໍ່ເນື່ອງ ໃນປີ 2023 ນີ້, ນະຄອນຫລວງວຽງຈັນ ຈະເລັ່ງແກ້ໄຂບັນດາຂອດຂັ້ນ ແລະ ສິ່ງກີດຂວາງຕ່າງໆຢ່າງແຂງແຮງ, ເພື່ອສ້າງສະພາບແວດລ້ອມ ທີ່ອໍານວຍໃຫ້ແກ່ການດຶງດູດການລົງທຶນ, ສຸມໃສ່ຄົ້ນຄວ້າ, ກຳນົດບັນຊີໂຄງການລົງທຶນ ທີ່ເປັນບູລິມະສິດ ເພື່ອພັດທະນາໃນຮູບແບບການລົງທຶນຮ່ວມ ລະຫວ່າງພາກລັດ ແລະ ພາກເອກະຊົນ(PPP) ໂດຍສອດຄ່ອງກັບແຜນຍຸດທະສາດການພັດທະນາ ຕາມແຜນພັດທະນາເສດຖະກິດ-ສັງຄົມ ແຫ່ງຊາດ ຫລື ແຜນຂອງຂະແໜງການ ແລະ ທ້ອງຖິ່ນ, ສືບຕໍ່ດຶງດູດການລົງທຶນເຂົ້າມາໃນເຂດເສດຖະກິດພິເສດ ຢູ່ນະຄອນຫລວງວຽງຈັນ.
ທ່ານ ອາດສະພັງທອງ ສີພັນດອນ ໃຫ້ຮູ້ອີກວ່າ: ໃນປີ 2022 ຜ່ານມານີ້, ເສດຖະກິດ ຂອງນະຄອນຫລວງວຽງຈັນ ຂະຫຍາຍຕົວໃນລະດັບ 4,83% (ແຜນດັດແກ້ 4,36%, ແຜນສູ້ຊົນ 6,5%), ລວມຍອດຜະລິດຕະພັນພາຍໃນ (GDP) ບັນລຸໄດ້ 62.243,93 ຕື້ກີບ (ແຜນ ການດັດແກ້ 58.412,26 ຕື້ກີບ, ຄາດໝາຍສູ້ຊົນ 63.076 ຕື້ກີບ), GDP ສະເລ່ຍຕໍ່ຫົວຄົນ 62,91 ລ້ານກີບ (ມະຕິສະພາດັດແກ້ 60,28 ລ້ານກີບ), ໃນນັ້ນ ຂະແໜງກະສິກຳ ຂະຫຍາຍຕົວເພີ່ມຂຶ້ນ 3,91% ກວມເອົາ 13,77% ຂອງ GDP, ຂະແໜງອຸດສາຫະກຳ ຂະຫຍາຍຕົວເພີ່ມຂຶ້ນ 6,54% ກວມເອົາ 49,05% ຂອງ GDP, ຂະແໜງການບໍລິການ ຂະຫຍາຍຕົວເພີ່ມຂຶ້ນ 2,52% ກວມເອົາ 36,36% ຂອງ GDP.
ຂ່າວ: ທະນູທອງ
ຂໍ້ມູນ-ພາບ: ປະຊາຊົນ
