ສະພາການຄ້າ ແລະ ອຸດສາຫະກຳແຫ່ງຊາດລາວ (ສຄອຊ) ຈະເປີດງານຜະລິດຕະພັນລາວ ປະຈໍາປີ 2023 (Made In Laos 2023) ຈະໄດ້ຈັດຂຶ້ນໃນລະຫວ່າງວັນທີ 10-19 ກຸມພາ 2023 ຢູ່ສູນການຄ້າລາວ-ໄອເຕັກ ເພື່ອເປັນການຟື້ນຟູເສດຖະກິດ ແລະ ສົ່ງເສີມຜະລິດຕະພັນລາວສູ່ສາກົນ ເຊິ່ງພິທີຖະແຫລງຂ່າວການຈັດງານດັ່ງກ່າວ ຈັດຂຶ້ນໃນວັນທີ 30 ມັງກອນ 2023 ໂດຍການເປັນປະທານຮ່ວມຂອງ ທ່ານ ໄຊສົມເພັດ ນໍລະສິງ ຫົວໜ້າກົມສົ່ງເສີມການຄ້າ ກະຊວງອຸດສາຫະກໍາ ແລະ ການຄ້າ, ທ່ານ ນາງ ຈັນທະຈອນ ວົງໄຊ ຮອງປະທານ ສຄອຊ, ມີພາກສ່ວນກ່ຽວຂ້ອງ ເຂົ້າຮ່ວມ.
ທ່ານ ນາງ ຈັນທະຈອນ ວົງໄຊ ໄດ້ໃຫ້ຮູ້ວ່າ: ສຄອຊ ຮ່ວມກັບ ສະພາການຄ້າ ແລະ ອຸດສາຫະ ກຳ (ສຄອ) ແຂວງທົ່ວປະເທດ ຈະຈັດງານ ຜະລິດຕະພັນລາວ ປະຈຳປີ 2023 (Made in Laos 2023) ຂຶ້ນໃນລະຫວ່າງວັນທີ 10-19 ກຸມພາ 2023 ທີ່ສູນວາງສະແດງສິນຄ້າລາວ-ໄອເຕັກ ແລະ ປີນີ້ ສຄອ ແຂວງຈຳປາສັກ ເປັນເຈົ້າພາບຮ່ວມຫລັກໃນການຈັດງານດັ່ງກ່າວ ໂດຍ ສຄອ ແຂວງຈຳປາສັກ ຈະໄດ້ມີການອອກແບບຕົບແຕ່ງ ເພື່ອສື່ໃຫ້ເຫັນວິຖີຊີວິດການເປັນຢູ່, ຮີດຄອງປະເພນີ, ວັດທະນະທຳທີ່ສວຍງາມ ແລະ ບັນດາແຫລ່ງທ່ອງທ່ຽວຕ່າງໆ ທາງດ້ານວັດທະນະທຳ ແລະ ທຳມະຊາດ ທີ່ຕິດພັນກັບການດຳລົງຊີວິດ ຂອງປະຊາຊົນບັນດາເຜົ່າແຂວງຈຳປາສັກ. ນອກຈາກນັ້ນ, ຍັງໄດ້ເຫັນເຖິງການຂະ ຫຍາຍຕົວທາງດ້ານເສດຖະກິດ ເປັນຕົ້ນ ເຂດເສດຖະກິດພິເສດ ແລະ ສະຖານທີ່ທ່ອງທ່ຽວທາງທຳມະຊາດທີ່ສວຍງາມ ແລະ ສິນຄ້າອື່ນໆ ທີ່ເປັນທ່າແຮງຂອງແຂວງຈຳປາສັກ.
ຈຸດປະສົງຫລັກໃນການຈັດງານໃນປີນີ້ ເພື່ອຊຸກຍູ້ສົ່ງເສີມໃຫ້ຄົນລາວ ຫັນມານຳໃຊ້ຜະລິດຕະພັນລາວໃຫ້ຫລາຍຂຶ້ນ. ພ້ອມກັນນັ້ນ ກໍເປັນການປຸກລະດົມຂົນຂວາຍ ແລະ ເພີ່ມທະວີການຜະລິດໃນລະດັບຄອບຄົວ ໃຫ້ກາຍເປັນສິນຄ້າ ທີ່ສາມາດສ້າງລາຍຮັບໃຫ້ແກ່ຄອບຄົວໄດ້, ທັງເປັນການສົ່ງເສີມການຜະລິດຂະໜາດນ້ອຍ ໃຫ້ກ້າວສູ່ຂະໜາດກາງ ແລະ ໃຫ້ກາຍເປັນຂະໜາດໃຫຍ່, ກາຍເປັນອຸດສາຫະກຳການຜະລິດ ທັງດ້ານປະລິມານ ແລະ ຄຸນນະພາບທີ່ໄດ້ມາດຕະຖານ ທີ່ພ້ອມຈະແຂ່ງຂັນ, ຈໍາໜ່າຍຕະຫລາດພາຍໃນ ແລະ ສົ່ງອອກສູ່ສາກົນໄດ້. ພ້ອມນີ້, ຍັງຈະເປັນການເປີດໂອກາດໃຫ້ບັນດາຫົວໜ່ວຍທຸລະກິດທີ່ກຳລັງຊອກຫາຄູ່ຄ້າໃໝ່ໆ ແລະ ຕ້ອງການແນະນຳສິນຄ້າ ແລະ ບໍລິການໃໝ່ໆຂອງບໍລິສັດ ໃຫ້ບັນດາແຂກທີ່ມາຊົມງານໄດ້ຮັບຊາບ, ທັງເປັນການແລກປ່ຽນຄວາມຮູ້, ເຕັກນິກດ້ານວິຊາການ, ວິທີການຜະລິດ ເພື່ອນຳມາພັດທະນາ ສິນຄ້າຂອງຕົນ, ທັງເປັນການໂຄສະນາຄວາມອຸດົມ ສົມບູນທາງດ້ານຮີດຄອງປະເພນີ-ວັດທະນະທຳ, ການຄ້າ-ການລົງທຶນ, ສະຖານທີ່ທ່ອງທ່ຽວ ແລະ ອື່ນໆ ທີ່ເປັນເອກະລັກ ຂອງແຂວງທີ່ເປັນເຈົ້າພາບຮ່ວມຈັດງານ ຕະຫລອດເຖິງທຸກແຂວງທີ່ເຂົ້າຮ່ວມງານໃນຄັ້ງນີ້ອີກດ້ວຍ.
ງານວາງສະແດງໃນຄັ້ງນີ້, ຈະມີຫລາຍຜະລິດຕະພັນ, ທີ່ຜະລິດ ແລະ ປະກອບ ຢູ່ ສປປ ລາວ, ເຂົ້າຮ່ວມຫລາຍກວ່າ 200 ຫ້ອງວາງສະແດງ ຈາກຫລາຍກວ່າ 130 ຜູ້ປະກອບການ ແລະ ຫົວ ໜ່ວຍທຸລະກິດ ຈາກຫລາຍຂະແໜງການເຊັ່ນ: ຂະແໜງຜະລິດຕະພັນ ສິນຄ້າໜຶ່ງເມືອງ ໜຶ່ງຜະລິດ ຕະພັນ (ໂອດັອບ), ຜະລິດຕະພັນ ເມດອິນລາວ, ຜະລິດຕະພັນ ຫັດຖະກຳ, ຜະລິດຕະພັນ ອາຫານ ແລະ ເຄື່ອງດື່ມ, ຜະລິດຕະພັນອຸດສາຫະກຳ. ນອກນີ້, ຍັງມີຜະລິດຕະພັນ ໄອທີ, ຂົນສົ່ງ, ທະນາຄານ ແລະ ການບໍລິການ ແລະ ຜະລິດຕະພັນລາວ ຫັດຖະກຳໄມ້ປ່ອງ, ຜະລິດຕະພັນເຟີນີເຈີ ແລະ ຜະລິດ ຕະພັນ ກະສິກຳ. ພິເສດ ໃນປີນີ້, ຍັງຈະໄດ້ພົບກັບສິນຄ້າຫລາກຫລາຍຈາກ 3 ປະເທດ ທີ່ມາລົງທຶນໃນ ສປປ ລາວ ໃນອັນດັບຕົ້ນໆຄື: ສປ ຈີນ, ຣາຊາອານາຈັກໄທ ແລະ ສສ ຫວຽດນາມ ເຊິ່ງເປັນປີທຳອິດທີ່ ສຄອຊ ໄດ້ເຊີນນັກລົງທຶນ 3 ປະເທດ ເຂົ້າຮ່ວມງານໃນຄັ້ງນີ້.
ນອກຈາກນີ້, ພາຍໃນງານຍັງມີຫລາຍກິດຈະກຳເຊັ່ນ: ການຈັດສໍາມະນາຕ່າງໆ ທີ່ເປັນການໃຫ້ຄວາມຮູ້, ງານພົບປະທຸລະກິດ, ກິດຈະກຳແຈກລາງວັນ ແລະ ກິດຈະກໍາບັນເທີງ ອື່ນໆອີກ.
