ພະຍາດອະຫິວາແພ່ລະບາດໜັກຢູ່ມາລາວີ ເສຍຊີວິດ 1.000 ກວ່າຄົນ

ອ້າງຕາມຂ່າວຕ່າງປະເທດ, ວັນທີ 25 ມັງກອນ, ກະຊວງສາທາລະນະສຸກມາລາວີ ເປີດເຜີຍວ່າ: ນັບຕັ້ງແຕ່ພະຍາດອະຫິວາ ແພ່ລະບາດຄັ້ງຫລ້າສຸດເມື່ອປີກາຍຈົນເຖິງປັດຈຸບັນໄດ້ມີຜູ້ຕິດເຊື້ອຫລາຍກວ່າ 30.600 ຄົນ ແລະ ເສຍຊີວິດ 1.002 ຄົນ. ນີ້ຖືເປັນການແພ່ລະບາດຢ່າງໜັກໜ່ວງທີ່ສຸດພາຍໃນປະເທດ. ໃນຂະນະນີ້ຢາວັກຊິນປ້ອງກັນພະຍາດອະຫິວາເກືອບ 3 ລ້ານໂດສ ທີ່ໄດ້ຮັບມາຈາກສະຫະປະຊາຊາດ ເມື່ອເດືອນພະຈິກປີກາຍນີ້ໃກ້ຈະໝົດທ່າມກາງຜູ້ຕິດເຊື້ອຍັງສືບຕໍ່ເພີ່ມຂຶ້ນຢ່າງຕໍ່ເນື່ອງ.