ຕາມຂ່າວຈາກ ວິທະຍຸ ສາກົນ ຫວຽດນາມ. ເມື່ອບໍ່ດົນມານີ້ ອົງການສະຫະປະຊາຊາດ (ສປຊ) ຄາດວ່າ: ອິນເດຍ ຈະລື່ນກາຍ ສປ ຈີນ ກາຍເປັນປະເທດທີ່ມີຈຳນວນປະຊາກອນຫລາຍທີ່ສຸດໃນໂລກ ສຳລັບປີນີ້ເຖິງວ່າລະດັບການເພີ່ມຂຶ້ນຂອງປະຊາກອນໃນປະເທດນີ້ພວມຊ້າລົງ ປີ 2022 ເປັນປີທຳອິດໃນຮອບ 60 ປີ ທີ່ຈຳນວນປະຊາກອນ ຂອງ ສປ ຈີນ ຫລຸດລົງ, ເປັນຂີດໝາຍແກ່ການເລີ່ມກ້າວເຂົ້າສູ່ໄລຍະປະຊາກອນຫລຸດລົງ ໃນເວລາຍາວນານ ແລະ ສົ່ງຜົນກະທົບຢ່າງເລິກເຊິ່ງ ເຖິງພື້ນຖານເສດຖະກິດ ຂອງ ສປ ຈີນ ແລະ ໃນໂລກ. ເຖິງຢ່າງໃດກໍຕາມປັດຈຸບັນ, ປະຊາກອນຂອງ ສປ ຈີນ ແລະ ອິນເດຍ ລື່ນກັນແຕ່ໜ້ອຍດຽວ ຫລັງຈາກ ສປ ຈີນ ມີປະຊາກອນ: 1,4 ຕື້ຄົນ, ສ່ວນ ອິນເດຍ ມີ 1,38 ຕື້ຄົນ. ຍິ່ງໄປກວ່ານັ້ນ, ດ້ວຍ 27,3% ປະຊາກອນ ຢູ່ໃນລະດັບ ແຕ່ 15–29 ປີ, ອິນເດຍແມ່ນໜຶ່ງໃນບັນດາປະເທດທີ່ມີປະຊາກອນໜຸ່ມທີ່ສຸດໃນໂລກ, ໃນຂະນະທີ່ ສປ ຈີນ ກ້າວເຂົ້າສູ່ໄລຍະປະຊາກອນມີອາຍຸເພີ່ມຂຶ້ນ. ລະດັບການເຕີບໂຕປະຊາກອນໃນແຕ່ລະປີ ຂອງປະເທດ ອາຊີໃຕ້ສະເລ່ຍແມ່ນ 1,2% ນັບແຕ່ປີ 2011 ເປັນຕົ້ນມາ, ຫລຸດລົງເມື່ອທຽບໃສ່ລະດັບ 1,7% ຂອງ 10 ປີກ່ອນນີ້.
(ບັນນາທິການຂ່າວ: ຕ່າງປະເທດ)
ຮຽບຮຽງຂ່າວໂດຍ: ສະໄຫວ ລາດປາກດີ
