ວິທະຍຸກະຈາຍສຽງຫວຽດນາມລາຍງານວ່າ: ເມື່ອບໍ່ດົນຜ່ານມາ ຢູ່ ຮ່າໂນ້ຍ, ໃນການຕ້ອນຮັບທ່ານ ຊູຊູກິ ຊຸນອິຈິ ລັດຖະມົນຕີກະຊວງການເງິນ ຍີ່ປຸ່ນ ທີ່ເດີນທາງຢ້ຽມຢາມ ຫວຽດນາມ, ທ່ານ ຟ້າມມິງຈິງ ນາຍົກລັດຖະມົນນຕີ ຫວຽດນາມ ຢັ້ງຢືນວ່າ: ຫວຽດນາມ ຍາມໃດກໍຖືຍີ່ປຸ່ນແມ່ນຄູ່ຮ່ວມມືຍຸດທະສາດສຳຄັນແຖວໜ້າ, ຍາວນານ; ສະໜັບສະໜູນຍີ່ປຸ່ນປະກອບສ່ວນຕັ້ງໜ້າເພື່ອສັນຕິພາບ, ການຮ່ວມມື, ການພັດທະນາຂອງພາກພື້ນ ແລະ ໃນໂລກ. ທ່ານ ຟ້າມມິງຈິງ ຍັງໃຫ້ຮູ້ວ່າ: ຫວຽດນາມ ຈະສືບຕໍ່ສົ່ງເສີມ, ສ້າງເງື່ອນໄຂສະດວກໃຫ້ແກ່ວິສາຫະກິດ ຍີ່ປຸ່ນ ກ່ຽວກັບການຜະລິດ, ດຳເນີນທຸລະກິດຢ່າງສະດວກ ແລະ ມີປະສິດທິຜົນຢູ່ ຫວຽດນາມ.
ທ່ານ ຊູຊູກິ ຊຸນອິຈິ ໄດ້ແຈ້ງໃຫ້ທ່ານ ຟ້າມມິງຈິງ ຮັບຊາບກ່ຽວກັບໝາກຜົນຂອງການເຮັດວຽກລະຫວ່າງ ທ່ານ ກັບ ທ່ານ ໂຮດຶກເຟິກ ລັດຖະມົນຕີກະຊວງການເງິນ ຫວຽດນາມ, ສອງຝ່າຍໄດ້ເຫັນດີເປັນເອກະພາບຫຼາຍເນື້ອໃນ, ພິເສດແມ່ນສືບຕໍ່ຊຸກຍູ້ການຮ່ວມມືໃນການພັດທະນາພື້ນຖານໂຄງລ່າງ. ຝ່າຍຍີ່ປຸ່ນ ພວມຕັ້ງໜ້າຄົ້ນຄວ້າ ແລະ ສົມທົບກັບບັນດາອົງການທີ່ກ່ຽວຂ້ອງຂອງ ຫວຽດນາມ ຢ່າງຕັ້ງໜ້າ.
