ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ ໄດ້ລາຍງານຕໍ່ກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນນະຄອນຫຼວງວຽງຈັນ (ນວ) ຊຸດທີ II ໃນວັນທີ 11 ມັງກອນ 2023 ໃຫ້ຮູ້ວ່າ: ໃນປີ 2022 ເສດຖະກິດນະຄອນຫຼວງວຽງຈັນຂະຫຍາຍຕົວໃນລະດັບ 4,83% (ແຜນດັດແກ້ 4,36%, ແຜນສູ້ຊົນ 6,5%) ລວມຍອດຜະລິດຕະພັນພາຍໃນ (GDP) ບັນລຸໄດ້ 62.243,93 ຕື້ກີບ (ແຜນການດັດແກ້ 58.412,26 ຕື້ກີບ, ຄາດໝາຍສູ້ຊົນ 63.076 ຕື້ກີບ) GDP ສະເລ່ຍຕໍ່ຫົວຄົນ 62,91 ລ້ານກີບ (ມະຕິສະພາດັດແກ້ 60,28 ລ້ານກີບ) ໃນນັ້ນຂະແໜງກະສິກຳ ຂະຫຍາຍຕົວເພີ່ມຂຶ້ນ 3,91% ກວມເອົາ 13,77% ຂອງ GDP ຂະແໜງອຸດສາຫະກຳຂະຫຍາຍຕົວເພີ່ມຂຶ້ນ 6,54% ກວມເອົາ 49,05% ຂອງ GDP ຂະແໜງການບໍລິການຂະຫຍາຍຕົວເພີ່ມຂຶ້ນ 2,52% ກວມເອົາ 36,36% ຂອງ GDP.
ທ່ານ ເຈົ້າຄອງນະຄອນຫຼວງວຽງຈັນ ກ່າວອີກວ່າ: ນະຄອນຫຼວງວຽງຈັນ ໄດ້ນໍາໃຊ້ເຄື່ອງມືທັນສະ ໄໝເຂົ້າໃນການເກັບລາຍຮັບຜ່ານລະບົບທະນາຄານ ໂດຍສະເພາະແມ່ນການຈັດເກັບລາຍຮັບພາສີ-ອາກອນ, ຄ່າທຳນຽມ ແລະ ຄ່າບໍລິການ ໂດຍຈັດເກັບຜ່ານລະບົບ Smart Tax ແລະ ລະບົບປະຕູດຽວແຫ່ງຊາດ ໄດ້ສຳເລັດການຫັນເອົາຫົວໜ່ວຍທຸລະກິດເຂົ້າລະບົບ TaxRIS ຈໍານວນ 7.406 ຫົວໜ່ວຍ ປະຕິບັດໄດ້ລື່ນແຜນ 13,93%, ການເກັບລາຍຮັບງົບປະມານ ສາມາດຈັດເກັບລາຍຮັບໄດ້ທັງໝົດ 5.610,32 ຕື້ກີບ ເທົ່າກັບ 100,25% ຂອງແຜນການປີ 2022 (ມະຕິສະພາ 5.596,26 ຕື້ກີບ) ທຽບໃສ່ປີ 2021 ເພີ່ມຂຶ້ນ 20,85% ຫຼື ເທົ່າກັບ 967,82 ຕື້ກີບ ໃນນັ້ນ ລາຍຮັບທີ່ສູນກາງປະຕິບັດຢູ່ນະຄອນຫຼວງວຽງຈັນ ປະຕິບັດໄດ້ 3.831,34 ຕື້ກີບ ເທົ່າກັບ 93,45% ຂອງແຜນການປີ 2022 (ມະຕິສະພາ 4.100 ຕື້ກີບ) ທຽບໃສປີຜ່ານມາ ເພີ່ມຂຶ້ນ 25,24% ຫຼື ເທົ່າກັບ 772,23 ຕື້ກີບ ລາຍຮັບຂອງນະຄອນຫຼວງວຽງຈັນ ປະຕິບັດໄດ້ 1.778,98 ຕື້ກີບ ລື່ນແຜນ 18,89% ຂອງແຜນການດັດແກ້ປີ 2022 (ມະຕິສະພາ 1.496,26 ຕື້ກີບ) ທຽບໃສປີຜ່ານມາ ເພີ່ມຂຶ້ນ 12,34% ເທົ່າກັບ 195,56 ຕື້ກີບ, ດ້ານລາຍຈ່າຍງົບປະມານ ປະຕິບັດໄດ້ 817,35 ຕື້ກີບ ເທົ່າກັບ 99,01% ຂອງແຜນການດັດແກ້ປີ 2022 (ມະຕິສະພາ 825,54 ຕື້ກີບ) ປະຢັດລາຍຈ່າຍໄດ້ 8,19 ຕື້ກີບ.
ສຳລັບ ທິດທາງແຜນການ ປີ 2023 ຈະເພີ່ມທະວີການຈັດຕັ້ງປະຕິບັດແຜນງານ, ໂຄງການ, ໜ້າວຽກ ແລະ ກິດຈະກຳຂອງໂຄງການຄໍ້າປະກັນສະບຽງອາຫານ ແລະ ຜະລິດເປັນສິນຄ້າ, ການຜະລິດກະສິກຳສະອາດ ເພື່ອການຊົມໃຊ້ພາຍໃນ ຫຼຸດຜ່ອນການນຳເຂົ້າ ແລະ ເປັນສິນຄ້າສົ່ງອອກ, ສົ່ງເສີມໃຫ້ໂຮງງານອຸດສາຫະກຳປຸງແຕ່ງ ແລະ ຫັດຖະກຳ ຂະຫຍາຍຕົວ 4% ມູນຄ່າຜະລິດຕະພັນອຸດສາຫະກຳປຸງແຕ່ງຂະຫຍາຍຕົວບໍ່ໃຫ້ຫຼຸດ 11,5%, ການຜະລິດຫັດຖະກຳບໍ່ໃຫ້ຫຼຸດ 8% ຊຸກຍູ້ການສ້າງລະບົບຈໍລະຈອນສິນຄ້າ ແລະ ເຂດໂລຈີສຕິກໃຫ້ເກີດຂຶ້ນ, ເພື່ອຮອງຮັບໃຫ້ແກ່ການເກີດຂຶ້ນຂອງທາງລົດໄຟລາວ-ຈີນ, ສືບຕໍ່ແກ້ໄຂບັນດາຂອດຂັ້ນ ແລະ ສິ່ງກີດຂວາງຕ່າງໆຢ່າງແຂງແຮງ, ເພື່ອສ້າງສະພາບແວດລ້ອມ ທີ່ອໍານວຍໃຫ້ແກ່ການດຶງດູດການລົງທຶນ, ສຸມໃສ່ຄົ້ນຄວ້າ, ກຳນົດບັນຊີໂຄງການລົງທຶນ ທີ່ເປັນບູລະມະສິດ ເພື່ອພັດທະນາໃນຮູບແບບການລົງທຶນຮ່ວມ ລະຫວ່າງພາກລັດ ແລະ ພາກເອກະຊົນ (PPP) ໂດຍສອດຄ່ອງກັບແຜນຍຸດທະສາດການພັດທະນາ ຕາມແຜນພັດທະນາເສດຖະກິດ-ສັງຄົມແຫ່ງຊາດ ຫຼື ແຜນຂອງຂະແໜງການ ແລະ ທ້ອງຖິ່ນສືບຕໍ່ດຶງດູດການລົງທຶນເຂົ້າມາໃນເຂດເສດຖະກິດພິເສດ ຢູ່ນະຄອນຫຼວງວຽງຈັນ, ສືບຕໍ່ສ້າງໃຫ້ສັງຄົມທົ່ວນະຄອນຫຼວງວຽງຈັນ ມີຄວາມສະຫງົບ, ປອດໄພ ແລະ ມີຄວາມເປັນລະບຽບຮຽບຮ້ອຍ ເພື່ອອຳນວຍໃຫ້ແກ່ການດຳລົງຊີວິດຂອງຊາວນະຄອນຫຼວງວຽງຈັນ, ເອົາ ໃຈໃສ່ແກ້ໄຂບັນຫາປະກົດການຫຍໍ້ທໍ້ ເປັນຕົ້ນແມ່ນ ການມົ້ວສຸມ, ຂີ້ລັກ, ປຸ້ນຈີ້, ຊີງຊັບ, ບັນຫາຢາເສບຕິດ ບັນຫາຂໍ້ຂັດແຍ່ງທີ່ດິນ ແລະ ບັນຫາອື່ນໆ.
ຂ່າວ-ພາບ: ນາງແສງຈັນ
