ຕາມຂ່າວຈາກວິທະຍຸສາກົນ ແຫ່ງ ສປ ຈີນ, ເວທີ ປຶກສາຫາລືການປະດິດສ້າງໃໝ່ດ້ານການຄ້າ ການບໍລິການໃນການຮ່ວມມື ສປ ຈີນ ແລະ ສິງກະໂປ ທີ່ເປັນພາກສ່ວນໜຶ່ງໃນເວທີປຶກສາຫາລືເສດຖະກິດສາກົນຫົງສຽວ ຄັ້ງທີ 5 ໄດ້ຈັດຂຶ້ນ ຢູ່ນະຄອນຊູ່ໂຈ່ ແຂວງຈ່ຽງຊູ່ຈີນ ເມື່ອບໍ່ດົນມານີ້. ສຳລັບການຄ້າການບໍລິການ ແລະ ການຄ້າດີຈີຕອນພວມກາຍເປັນຫົວຈັກໃໝ່ ສຳລັບການເຕີບໂຕດ້ານການຄ້າຂອງໂລກ. ກອງປະຊຸມເວທີປຶກສາຫາລືຄັ້ງນີ້ມີຫົວຂໍ້ຫລັກວ່າ: ການນຳໃຊ້ເຕັກນິກດີຈີຕອນທົ່ວໄປ ແມ່ນແຮງຂັບເຄື່ອນໃໝ່ ສຳລັບການຄ້າການບໍລິການຂອງໂລກ, ຊ່ຽວຊານນັກວິຊາການ ແລະ ຜູ້ຕາງໜ້ານັກທຸລະກິດໄດ້ລົງເລິກຄົ້ນຄວ້າປຶກສາຫາລືໂດຍປີ່ນອ້ອມປະເດັນຮ້ອນຕ່າງໆ ເຊັ່ນ: ການສ້າງເຂດທົດລອງການຄ້າເສລີ, ການ ຮ່ວມມືດ້ານການຄ້າດີຈີຕອນລະຫວ່າງ ສປ ຈີນ-ສິງກະໂປ, ເປີດປະຕູສູ່ພາຍນອກຂອງຂະແໜງການບໍລິການ, ການເຄື່ອນໄຫວຂ້າມຊາດຂອງຂໍ້ມູນຂ່າວສານ ແລະ ອື່ນໆ ເພື່ອຊຸກຍູ້ການຄ້າການບໍລິການໃຫ້ພັດທະນາຢ່າງມີຄຸນນະພາບສູງ. ຂະນະທີ່ໂຄງການຮ່ວມມື ສປ ຈີນ ແລະ ສິງກະໂປ ຈຳນວນໜຶ່ງໄດ້ບັນລຸເຖິງຂັ້ນເຊັນສັນຍາ, ໂດຍພົວພັນເຖິງການຄ້າ ສາກົນ, ການຈໍລະຈອນສິນຄ້າສາກົນ, ເສດຖະກິດສີຂຽວ, ການລົງທຶນດ້ານການເງິນ, ການປິ່ນປົວ ແລະ ບຳລຸງສຸຂະພາບ ແລະ ຂົງເຂດອື່ນໆ. ໂຄງການເຫລົ່ານີ້ຈະເສີມຂະຫຍາຍທ່າແຮງການຮ່ວມມືລະຫວ່າງ ສປ ຈີນ ແລະ ສິງກະໂປ, ເຕົ້າໂຮມ ແລະ ຈັດສັນຊັບພະຍາກອນດ້ານການປະດິດສ້າງໃໝ່ໃນຂອບເຂດທົ່ວໂລກ, ຮ່ວມມືສຸດຂີດເພື່ອຊຸກຍູ້ອຸດສາຫະກຳ ທີ່ມີ ການປະດິດສ້າງໃໝ່ ແລະ ພັດທະນາເປັນກຸ່ມໃນສະໄໝເສດຖະກິດດີຈີຕອນ.
(ບັນນາທິການຂ່າວ: ຕ່າງປະເທດ) ຮຽບຮຽງຂ່າວໂດຍ: ສະໄຫວ ລາດ ປາກດີ
