ໃນລະຫວ່າງວັນທີ 28-29 ຕຸລາ 2022 ສະຫາຍພົນຕີ ວົງຄໍາ ພົມມະກອນ ກໍາມະການສູນກາງພັກ ຮອງລັດຖະມົນຕີກະຊວງປ້ອງກັນປະເທດ ພ້ອມຄະນະ ໄດ້ລົງເຄື່ອນໄຫວຢ້ຽມຢາມເຮັດວຽກຢູ່ ແຂວງຫົວພັນ ໂດຍການຕ້ອນຮັບຂອງ ທ່ານ ວັນໄຊ ແພງສົມມາ ເຈົ້າແຂວງໆຫົວພັນພ້ອມຄະນະ.
ໃນນີ້ ສະຫາຍ ພົນຕີ ວົງຄໍາ ພົມມະກອນ ພ້ອມຄະນະໄດ້ລົງເຄື່ອນໄຫວຢ້ຽມຢາມກອງຮ້ອຍທະຫານຊາຍແດນ 218 ເພື່ອຕິດຕາມກວດກາໂຄງການກໍ່ສ້າງ ເປັນຕົ້ນສໍາຫຼວດ ແລະ ກໍານົດສະຖານທີ່ຄ້າຍຄູກໍ່ສ້າງພື້ນຖານໂຄງລ່າງກົມກອງໃຫ້ມີຄວາມແໜ້ນໜາຖາວອນ, ລົງເຄື່ອນໄຫວຢ້ຽມຢາມພໍ່ແມ່ປະຊາຊົນກຸ່ມບ້ານຜາແດງ ເມືອງກວັນ ແຂວງຫົວພັນ ແລະ ຈັດກອງປະຊຸມປຶກສາຫາລືເພື່ອເອກະພາບກັນກ່ຽວກັບໂຄງການກໍ່ສ້າງພັດທະນາຈຸດສຸມຜາແດງ ເມືອງກວັນ ແຂວງຫົວພັນ, ພົບປະໂອ້ລົມອໍານາດການປົກຄອງກຸ່ມບ້ານຜາແດງ.
ທ່ານ ອໍາພອນ ສອນວິໄລ ຮອງເລຂາພັກເມືອງ ໄດ້ລາຍງານໂດຍຫຍໍ້ກ່ຽວກັບການພັດທະນາເສດຖະກິດສັງຄົມ ພາຍໃນເມືອງໂດຍສະເພາະຢູ່ເຂດກຸ່ມບ້ານຜາແດງແມ່ນເຂດກຸ່ມບ້ານໜື່ງທີ່ຢູ່ລຽບຕາມຊາຍແດນລາວ-ຫວຽດນາມເປັນເຂດພູດອຍ ເຊີ່ງປະກອບມີ 11 ບ້ານ ພົນລະເມືອງເຜົ່າມົ້ງ100% ມີປະຊາກອນທັງໝົດ 4,279 ຄົນ ຍິງ 1,835 ຄົນ ປະຊາຊົນຍຶດຖືອາຊີບປູກຝັງ-ລ້ຽງສັດແບບທໍາຊາດ ສໍາລັບເສັ້ນທາງຄົມມະນາຄົມແມ່ນສາມາດໄປມາຫາສູ່ກັນໄດ້ຕະຫຼອດປີ ແລະ ມີໂຮງຮຽນທຸກໆບ້ານ ປະຕິບັດໄດ້ການຮໍ່າຮຽນຕາມອາຍຸເກນຂອງກະຊວງສຶກສາທິການ ແລະ ກິລາວາງອອກ.
ໂອກາດນີ້ສະຫາຍຮອງລັດຖະມົນຕີກະຊວງປ້ອງກັນປະເທດ ໄດ້ສະແດງຄວາມຍ້ອງຍໍຊົມເຊີຍຕໍ່ອໍານາດການປົກຄອງຂັ້ນເມືອງ,ຂັ້ນບ້ານ ແລະ ກຸ່ມບ້ານທີ່ໄດ້ເອົາໃຈໃສ່ຊີ້ນໍາ-ນໍາພາປະຊາຊົນພາຍໃນກຸ່ມບ້ານຂອງຕົນຍູ້ແຮງການພັດທະນາເສດຖະກິດສັງຄົມເພື່ອແກ້ໄຂຊີວິດການເປັນຢູ່ຂອງຄອບຄົວຢູ່ບັນດາບ້ານໃຫ້ດີຂຶ້ນເທື່ອລະກ້າວ ປະກອບສ່ວນເຂົ້າໃນຂົງເຂດວຽກງານດ້ານຕ່າງໆໂດຍສະເພາະແມ່ນການຈັດຕັ້ງປະຕິບັດແນວທາງປ່ຽນແປງໃໝ່ຮອບດ້ານຂອງພັກ-ລັດພ້ອມກັນປະກອບສ່ວນເຂົ້າໃນວຽກງານປ້ອງຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານຂອງພັກ ຕັ້ງໜ້າປຸກລະດົມຂົນຂວາຍພໍ່ແມ່ປະຊາຊົນໃຫ້ເຂົ້າໃຈແຈ້ງຕໍ່ແຜນພັດທະນາເສດຖະກິດສັງຄົມ ຕາມ 4 ເນື້ອໃນ 4 ຄາດໝາຍ ກໍ່ຄືການສ້າງບ້ານນ້ອຍກາຍເປັນບ້ານໃຫຍ່,ການສ້າງບ້ານໃຫຍ່ໃຫ້ກາຍເປັນຕົວເມືອງໃນຊົນນະບົດ ແລະ ສ້າງແຂວງເປັນຫົວໜ່ວຍຍຸດສາດ ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາໃຫ້ປະກົດຜົນເປັນຈິງ.
