ກອງປະຊຸມໄໝສາມັນ ເທື່ອທີ 1 ປະຈຳປີ 2022 ຂອງສະພາການສຶກສາຊັ້ນສູງແຫ່ງຊາດ ມີຂຶ້ນເມື່ອຕົ້ນເດືອນຕຸລາ 2022 ຜ່ານມາ ທີ່ຫ້ອງປະຊຸມກະຊວງ ສສກ ພາຍໃຕ້ການເປັນປະທານຂອງທ່ານ ຮສ ປອ ກອງສີ ແສງມະນີ ຮອງປະທານສະພາການສຶກສາຊັ້ນສູງແຫ່ງຊາດ ມີຄະນະກຳມະການທັງໝົດ 15 ທ່ານ ແລະ ພະນັກງານທີ່ກ່ຽວຂ້ອງເຂົ້າຮ່ວມ. ກອງປະຊຸມຄັ້ງນີ້ ພາຍຫຼັງໄດ້ຮັບຟັງຄຳເຫັນຊີ້ນຳ ແລະ ການກ່າວເປີດກອງປະຊຸມຂອງທ່ານປະທານກອງປະຊຸມແລ້ວ ຍັງໄດ້ຮັບຟັງການສະເໜີບັນດາເອກະສານຕ່າງໆ ແລະ ລາຍງານວຽກງານສະພາການສຶກສາຊັ້ນສູງແຫ່ງຊາດ ຈຳນວນ 4 ລາຍການ ຄື: ການສະເໜີຜົນງານຂອງຜູ້ສະເໜີຂໍຕໍາແໜ່ງວິຊາການຄູຂັ້ນສາດສະດາຈານ ແລະ ຮອງສາດສະດາຈານ ຈຳນວນທັງໝົດ 13 ທ່ານ ທີ່ສັງກັດຢູ່ມະຫາວິທະຍາໄລແຫ່ງຊາດ ສະເໜີລາຍງານຜົນການລົງເກັບກຳຂໍ້ມູນ ແລະ ປະເມີນສະຖາບັນເຕັກໂນໂລຊີສຸດສະກະ ເພື່ອຍົກສະຖານະເປັນສະຖາບັນສົມບູນ ສະເໜີລາຍງານຄວາມພ້ອມຂອງວິທະຍາໄລ 2 ແຫ່ງ ທີ່ສະເໜີຂໍຍົກເປັນສະຖາບັນ ຄື: ວິທະຍາໄລສຸກສະຫວັດ ແລະ ວິທະຍາໄລ ລາວ-ອາເມຣິກາ ແລະ ລາຍງານກ່ຽວກັບຜົນສຳເລັດໃນການປັບປຸງດຳລັດ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງສະພາການສຶກສາຊັ້ນສູງແຫ່ງຊາດ (ສະບັບປັບປຸງ) ເພື່ອຮັບຮອງ ແລະ ນຳສະເໜີອະນຸມັດຢ່າງເປັນທາງການໃນຂັ້ນຕອນຕໍ່ໄປ.
ຜ່ານການຮັບຟັງລາຍງານ ຄົ້ນຄວ້າ ແລະ ປະກອບຄວາມຄິດເຫັນຂອງຜູ້ເຂົ້າຮ່ວມກອງປະຊຸມ ຕໍ່ກັບເອກະສານຕ່າງໆ ແລະ ບັນຫາອື່ນໆແລ້ວ ກອງປະຊຸມໄດ້ເຫັນດີເປັນເອກະພາບຕົກລົງ ແລະ ຮັບຮອງເອົາບັນດາມະຕິຕ່າງໆ ໂດຍສະເພາະ ເຫັນດີຮັບຮອງເອົາຜົນງານຂອງຄູສອນມະຫາວິທະຍາໄລແຫ່ງຊາດຈຳນວນ 13 ທ່ານ ໃນນັ້ນ ໄດ້ຮັບຄະແນນເຕັມ 100% ມີ 11 ທ່ານ ແລະ ໄດ້ຮັບຄະແນນ 93% ມີ 2 ທ່ານ ເພື່ອຈະນໍາສະເໜີພິຈາລະນາແຕ່ງຕັ້ງຢ່າງເປັນທາງການຕາມຂັ້ນຕອນຕໍ່ໄປ ເຊິ່ງໃນຈຳນວນ 13 ທ່ານ ປະກອບມີ ທ່ານ ຮສ ປອ ວິຈິດ ລຳໄຊ ຕຳແໜ່ງວິຊາການທີ່ຂໍຂັ້ນສາດສະດາຈານ ສາຂາຊີວະວິທະຍາ ທ່ານ ບຸນທອນ ສຸຂະວົງ ຕໍາແໜ່ງວິຊາການທີ່ຂໍຂັ້ນຮອງສາດສະດາຈານ ສາຂາເສດຖະສາດພັດທະນາ ແລະ ນະໂຍບາຍ ທ່ານ ປອ ນາງ ວັນແສງ ຈຸລະມະນີ ຕຳແໜ່ງວິຊາການທີ່ຂໍຂັ້ນຮອງສາດສະດາຈານ ສາຂາເຄມີ ທ່ານ ປອ ແຫຼມທອງ ລັດດາວົງ ຕໍາແໜ່ງວິຊາການທີ່ຂໍຂັ້ນຮອງສາດສະດາຈານ ສາຂາຟີຊິກສາດ ແລະ ທ່ານ ປອ ສູນທອນ ສິງສຸໂພ ຕໍາແໜ່ງວິຊາການທີ່ຂໍຂັ້ນຮອງສາດສະດາຈານ ສາຂາຟີຊິກສາດ ທ່ານ ປອ ນາງ ມາລາວັນ ຈິດຕະວົງ ຕໍາແໜ່ງວິຊາການທີ່ຂໍຂັ້ນ ຮອງສາດສະດາຈານ ສາຂາວິທະຍາສາດສັດ ອາຫານ ແລະ ການຈັດການ ທ່ານ ປອ ວຽງສະກຸນ ນາປະເສີດ ຕຳແໜ່ງວິຊາການທີ່ຂໍຂັ້ນຮອງສາດສະດາຈານ ສາຂາວິທະຍາສາດການລ້ຽງສັດ ທ່ານ ປອ ສາຍທອງ ວິໄລວົງ ຕຳແໜ່ງວິຊາການ ທີ່ຂໍຂັ້ນຮອງສາດສະດາຈານ ສາຂາລະບົບການຜະລິດກະສິກຳ ທ່ານ ປອ ນາງ ດວງມາລາ ກຸນຊະນະ ຕຳແໜ່ງວິຊາການທີ່ຂໍຂັ້ນຮອງສາດສະດາຈານ ສາຂາໂຄງສ້າງສະຖາປັດຕະຍະກຳສາດ ທ່ານ ປອ ດອນແກ້ວ ຫຼ້າແກ່ນຈັນ ຕຳແໜ່ງວິຊາການ ທີ່ຂໍຂັ້ນຮອງສາດສະດາຈານ ສາຂາວິສະວະກຳໂທລະຄົມມະນາຄົມ ທ່ານ ແກ້ວ ກັນລະຍາ ສີຫາລາດ ຕຳແໜ່ງວິຊາການ ທີ່ຂໍຂັ້ນຮອງສາດສະດາຈານ ສາຂາ ວິສະວກໍາເອເລັກໂຕຣນິກ ທ່ານ ປອ ໄຊພອນ ກອງມະນີລາ ຕຳແໜ່ງວິຊາການ ທີ່ຂໍຂັ້ນຮອງສາດສະດາຈານ ສາຂາບໍລິຫານທຸລະກິດ ແລະ ທ່ານ ປອ ອູ່ຄຳ ສີສຸນົນ ຕຳແໜ່ງວິຊາການ ທີ່ຂໍຂັ້ນຮອງສາດສະດາຈານ ສາຂາເສດຖະສາດ.
ນອກຈາກນັ້ນ ກອງປະຊຸມຍັງໄດ້ເຫັນດີຮັບຮອງສະຖາບັນເຕັກໂນໂລຊີ ສຸດສະກະ ເປັນສະຖາບັນສົມບູນ ດ້ວຍຄະແນນສຽງເຫັນດີ 100% ແລະ ມອບໃຫ້ກົມການສຶກສາຊັ້ນສູງ ດໍາເນີນການຂໍອະນຸມັດອອກຂໍ້ຕົກລົງຂອງທ່ານລັດຖະມົນຕີກະຊວງ ສສກ ແຕ່ງຕັ້ງເປັນທາງການ ເຫັນດີຮັບຮອງເອົາ 2 ວິທະຍາໄລ ຄື: ວິທະຍາໄລ ສຸກສະຫວັດ ແລະ ວິທະຍາໄລ ລາວ-ອາເມຣິກາ ເປັນສະຖາບັນສຸກສະຫວັດ ບໍລິຫານເສດຖະກິດ ແລະ ສະຖາບັນ ລາວ-ອາເມຣິກາ ເປັນໄລຍະທົດລອງ 2 ປີ ເພື່ອໃຫ້ 2 ສະຖາບັນດັ່ງກ່າວໄດ້ປັບປຸງການຮຽນ-ການສອນ ການຄົ້ນຄວ້າວິທະຍາສາດ ແລະ ການຂະຫຍາຍພື້ນຖານໂຄງລ່າງໃນຕໍ່ໜ້າ ເພື່ອໃຫ້ສອດຄ່ອງຕາມລະບຽບການຂອງກະຊວງ ສສກ ແລະ ມອບໃຫ້ກົມການສຶກສາຊັ້ນສູງດຳເນີນການຂໍອະນຸມັດ ແລະ ຕິດຕາມປະເມີນ ຊຸກຍູ້ແຕ່ລະໄລຍະ ເພື່ອໃຫ້ໄດ້ເປັນສະຖາບັນສົມບູນໃນໄລຍະຕໍ່ໄປ ເຫັນດີຮັບຮອງເອົາ (ຮ່າງ) ດຳລັດວ່າດ້ວຍການຈັດຕັ້ງ ແລະ ການເຄື່ອນໄຫວຂອງສະພາການສຶກສາຊັ້ນສູງແຫ່ງຊາດ (ສະບັບປັບປຸງ) ມອບໃຫ້ກົມການສຶກສາຊັ້ນສູງ ປັບປຸງເນື້ອໃນຕາມການປະກອບຄຳເຫັນຂອງຄະນະກຳມະການສະພາ ແລ້ວສົ່ງໃຫ້ຄະນະກຳມະການສະພາ ມີຄຳເຫັນປະກອບໃສ່ແລ້ວສົ່ງກັບຄືນກອງເລຂາໃນເວລາອັນຄວນ ເພື່ອຂໍອະນຸມັດລົງນາມລັດຖະບານໃນຂັ້ນຕອນຕໍ່ໄປ.
