ຕາມຂ່າວຈາກວິທະຍຸສາກົນຫວຽດນາມ, ເມື່ອບໍ່ດົນມານີ້, ອາຊຽນ ແລະ ສະຫະພາບເອີຣົບ (ອີຢູ: EU) ໄດ້ລົງນາມຂໍ້ຕົກລົງ ການຂົນສົ່ງທາງອາກາດຮອບດ້ານສະບັບທຳອິດ (ASEAN-EU CATA) ຢູ່ທີ່ກອງປະຊຸມລັດຖະມົນຕີຄົມມະນາຄົມອາຊຽນ ຄັ້ງທີ 28 ຈັດຂຶ້ນ ຢູ່ບາລີ ປະເທດ ສ. ອິນໂດເນເຊຍ. ຂໍ້ຕົກລົງດັ່ງກ່າວແມ່ນຈະເພີ່ມທະວີ ການເຊື່ອມຕໍ່ທາງອາກາດ ລະຫວ່າງອາຊຽນ ແລະ ເອີຣົບ, ສ້າງເງື່ອນໄຂສະດວກໃຫ້ແກ່ການພົບປະແລກປ່ຽນປະຊາຊົນ ແລະ ເສດຖະກິດ ຂອງສອງພາກພື້ນ, ບັນດາຝ່າຍ ຈະເລີ່ມເຄື່ອນໄຫວໃຫ້ສັດຕະຍາບັນເພື່ອໃຫ້ຂໍ້ຕົກລົງມີຜົນສັກສິດຢ່າງເປັນທາງການ.
ທ່ານ ບູດີ ກາຢາສຸມາດີ(Budi Karya Sumadi) ລັດຖະມົນຕີກະຊວງຄົມມະນາຄົມຂົນສົ່ງ ຂອງ ສ. ອິນໂດເນເຊຍ ປະທານ ກອງປະຊຸມລັດຖະມົນຕີຄົມມະນາຄົມອາຊຽນ ຄັ້ງທີ 28 ຖືວ່າການລົງນາມສັນຍາດັ່ງກ່າວ ໄດ້ເພີ່ມພະລັງຊີວິດໃຫ້ແກ່ ພື້ນຖານເສດຖະກິດທົ່ວໂລກ, ພິເສດແມ່ນຢູ່ພາກພື້ນອາຊຽນ ແລະ ອີຢູ. ສັນຍາສະບັບນີ້ເປັນແງ່ຫວັງເພື່ອຈະເປີດກາລະໂອກາດອັນໃຫຍ່ຫລວງໃຫ້ແກ່ບັນດາບໍລິສັດການບິນ ຂອງອາຊຽນ ແລະ ອີຢູ ໃນການຂຸດຄົ້ນບັນດາການບໍລິການຜູ້ໂດຍສານ ແລະ ຈໍລະຈອນສິນຄ້າ ລະຫວ່າງສອງຝ່າຍ ແລະ ຢູ່ນອກພາກພື້ນ. ສຳລັບກອງປະຊຸມລັດຖະມົນຕີຄົມມະນາຄົມ ອາຊຽນ ຄັ້ງທີ 29 ຈະໄດ້ຈັດຂຶ້ນຢູ່ ສປປ ລາວ ໃນປີ 2023.
( ບັນນາທິການ: ຂ່າວຕ່າງປະເທດ)
ຮຽບຮຽງຂ່າວໂດຍ ສະໄຫວ ລາດປາກດີ
