ພິທີເຊັນບົດບັນທຶກຄວາມເຂົ້າໃຈ ໂຄງການເຊື່ອມສານດ້ານໂພຊະນາການ ຢູ່ໃນບ້ານເປົ້າໝາຍ ເມືອງຍົມມະລາດ ແລະ ໄຊບົວທອງ ແຂວງຄຳມ່ວນ ເມືອງລະ 13 ບ້ານ ໄດ້ຈັດຂຶ້ນໃນວັນທີ 18 ຕຸລາ 2022, ແນໃສ່ປະກອບສ່ວນເຂົ້າໃນ ແຜນພັດທະນາເສດຖະກິດ-ສັງຄົມ ຄັ້ງທີ 9 (2021-2025) ໂດຍເລັ່ງໃສ່ການປັບປຸງສຸຂະພາບ ແມ່ ແລະ ເດັກ, ລວມທັງການຢຸດຕິຄວາມອຶດຫິວ, ການບັນລຸຄວາມໝັ້ນຄົງດ້ານສະບຽງອາຫານ ແລະ ປັບ ປຸງໂພຊະນາການ, ການສົ່ງເສີມກະສິກຳແບບຍືນຍົງ ແລະ ແຜນງານແຫ່ງຊາດ ດ້ານການປັບປຸງວຽກງານໂພຊະນາການ ໃນຂົງເຂດວຽກງານ ຂອງກະຊວງສາທາລະນະສຸກ.
ໂຄງການເຊື່ອມສານດ້ານໂພຊະນາການ ແນໃສ່ສ້າງເງື່ອນໄຂຄວາມສະດວກ ໃຫ້ແກ່ຄົວເຮືອນ ໃນການເພີ່ມທະວີດ້ານໂພຊະນາການ ຢູ່ໃນບັນດາບ້ານ ແລະ ເມືອງເປົ້າໝາຍຂອງໂຄງການ ໂດຍມີ 4 ກິດ ຈະກຳຫລັກ ຄື: ປັບປຸງ ແລະ ສົ່ງເສີມວຽກງານສຸຂະພາບແມ່, ເດັກ ແລະ ໂພຊະນາການ; ປັບປຸງ ແລະ ສົ່ງເສີມ ວຽກງານການຜະລິດກະສິກຳ ເພື່ອປັບປຸງຊີວິດການເປັນຢູ່ຂອງປະຊາຊົນ; ປັບປຸງ ແລະ ສົ່ງເສີມວຽກງານນໍ້າສະອາດ ແລະ ສຸຂະອະນາໄມ ແລະ ສ້າງຄວາມເຂັ້ມແຂງ ໃນດ້ານການປະສານງານ ຂອງຫລາຍຂະແໜງການ ເພື່ອສະໜັບສະໜູນການເບິ່ງແຍງດູແລເດັກກ່ອນໄວຮຽນ ແລະ ການສ້າງສຳພັນສາ ມັກຄີໃນຄອບຄົວ ແລະ ຊຸມຊົນ.
ສຳລັບ ໄລຍະການຈັດຕັ້ງປະຕິບັດຂອງໂຄງການ 4 ປີ 2022-2025 (ເລີ່ມແຕ່ວັນເຊັນບົດບັນທຶກຄວາມເຂົ້າໃຈເປັນຕົ້ນໄປ) ມີມູນຄ່າລວມທັງໝົດ 983.209 ໂດລາສະຫະລັດ. ໃນນີ້ ເມືອງໄຊບົວທອງ 533.008 ໂດລາ ແລະ ເມືອງຍົມມະລາດ 450.201 ໂດລາສະຫະລັດ.
