ໃນວັນທີ 14 ຕຸລາ 2022 ທີ່ອົງການກາແດງແຫ່ງຊາດລາວ ຈັດພິທີມອບ-ຮັບເງິນຊ່ວຍເຫຼຶອວຽກງານມະນຸດສະທຳ ຈາກທ່ານ Noritaka HARASHIMA ທີ່ປຶກສາບໍລິສັດ ວັງຕັດ ຂຸດຄົ້ນບໍ່ແຮ່ ຈໍາກັດ ຈໍານວນ 12.500.000 ກີບ ທ່ານ Yuki MORINO ບໍລິສັດ ພັດທະນາພາກໃຕ້ ຈໍາກັດ 5 ລ້ານກີບ Paktai Pathana Co Ltd ແລະ ທ່ານ Masato FUJITA ຮ້ານອາຫານຟູຈິຕະ 2.500.000 ກີບ ລວມທັງໝົດ 20 ລ້ານກີບ ຕາງໜ້າຮັບໂດຍທ່ານ ສຈ ດຣ ພູທອນ ເມືອງປາກ ປະທານອົງການກາແດງແຫ່ງຊາດລາວ ໂດຍມີທ່ານນາງ ສີລິວັນ ປັດທຳມະວົງ ຮອງປະທານບໍລິສັດວັງຕັດ ຂຸດຄົ້ນບໍ່ແຮ່ ຈໍາກັດ ແລະ ພາກສ່ວນກ່ຽວຂ້ອງທັງສອງຝ່າຍເຂົ້າຮ່ວມ.
ໂອກາດນີ້ ທ່ານປະທານອົງການກາແດງແຫ່ງຊາດລາວ ໄດ້ກ່າວສະແດງຄວາມຂອບໃຈ ມາຍັງທຸກ ພາກສ່ວນທີ່ໃຫ້ການປະກອບສ່ວນຊຸກຍູ້ວຽກງານມະນຸດສະທຳຂອງອົງການກາແດງແຫ່ງຊາດລາວ ພ້ອມທັງໄດ້ແຈ້ງກ່ຽວກັບພາລະບົດບາດ ການຈັດຕັ້ງເຄື່ອນໄຫວວຽກງານຂອງອົງການກາແດງລາວແຫ່ງຊາດລາວ ທັງພາຍໃນ ແລະ ຕ່າງປະເທດ ໂດຍສະເພາະ ວຽກງານການຊ່ວຍເຫຼືອບັນເທົ່າທຸກແກ່ພໍ່ແມ່ປະຊາຊົນຜູ້ປະສົບໄພຈາກທຳມະຊາດໃນໄລຍະຜ່າມມາ ພ້ອມທັງຢືນຢັນ ຈະນຳໃຊ້ເງິນທີ່ໄດ້ຮັບການຊ່ວຍເຫຼືອຄັ້ງນີ້ ໃຫ້ໄປຮອດໄປເຖິງພໍ່ແມ່ປະຊາຊົນຜູ້ຕ້ອງການຄວາມຊ່ວຍເຫຼຶອ ກໍ່ໃຫ້ເກີດປະໂຫຍດສູງສຸດ ແລະ ຫວັງຢ່າງຍິ່ງວ່າຈະໄດ້ຮັບການຊຸກຍູ້ຈາກທ່ານອີກໃນໂອກາດຕໍ່ໄປ.
ໂອກາດນີ້ ທ່ານ ນາງ ສີລິວັນ ປັດທຳມະວົງ ໄດ້ກ່າວສະແດງຄວາມຍິນດີ ທີ່ຈະໃຫ້ການປະກອບສ່ວນຊຸກຍູ້ວຽກງານມະນຸດສະທຳ ຂອງອົງການກາແດງແຫ່ງຊາດລາວ ເພາະເຫັນໄດ້ຄວາມໝາຍຄວາມສຳຄັນຂອງວຽກງານດັ່ງກ່າວ ເຊິ່ງກ່ອນໜ້ານີ້ ກໍເຄີຍໃຫ້ການປະກອບສ່ວນຊຸກຍູ້ຊ່ວຍເຫຼືອສັງຄົມມາໂດຍຕະຫຼອດ ລວມທັງວຽກງານທາງດ້ານມະນຸດສະທຳຂອງອົງການກາແດງແຫ່ງຊາດລາວ ແລະ ພ້ອມໃຫ້ການຮ່ວມມືໃນການລະດົມຂົນຂວາຍການຊ່ວຍເຫຼືອວຽກງານດ້ານມະນຸດສະທຳ ຕາມເງື່ອນໄຂ ແລະ ຊ່ອງທາງທີ່ເປັນໄປໄດ້ ໃນໂອກາດຕໍ່ໄປ.
